Gamita ang Pulong sa Diyos sa Hustong Paagi

¹ Sa dihang nagsangyaw sa usa ka opisyal, “Gibuka ni Felipe ang iyang baba ug, sugod [sa usa ka] Kasulatan, iyang gipahayag kaniya ang maayong balita bahin kang Jesus.” (Buh. 8:35) Si Felipe “nagagamit sa pulong sa kamatuoran sa hustong paagi.” (2 Tim. 2:15) Karon, hinunoa, ang nagapanawng mga magtatan-aw nakamatikod nga daghang magmamantala ang talagsa rang mogamit sa Bibliya sa dihang magsangyaw. Gigamit ba nimo ang Bibliya diha sa imong ministeryo?

² Ang Pulong sa Diyos mao ang tinubdan sa tanan natong ginatuohan ug ginatudlo. (2 Tim. 3:​16, 17) Kana mao ang magdani sa mga tawo ngadto kang Jehova ug mag-edukar kanila alang sa kinabuhi. Mao kanay katarongan nga hinungdanong gamiton nato ang Bibliya diha sa atong ministeryo inay kay makig-estorya lamang mahitungod sa mga topiko nga nakapainteres kanato. (Heb. 4:12) Tungod kay kadaghanang tawo diyutay lag nahibaloan bahin sa Bibliya, kita angayng mobasa gikan niana aron ipakita kanila ang praktikal nga giya nga gisugyot niini ug ang kaugmaon nga gitanyag niini alang sa katawhan.

³ Deretsong Basaha Gikan sa Bibliya: Mahimo nimong sulayan nga mosangyaw nga walay dalang bag. Imong ikabutang ang literatura nga buot mong itanyag sa nipis nga porpolyo ug bitbita ang Bibliya o isulod kana sa bulsa. Dayon, sa dihang may ikaestorya ka na, imong ikapagawas ang Bibliya nga dili bation sa tawo nga mosulay kang magsermon. Ipahiangay ang luna mo nianang paagiha aron ang imong mamiminaw makasunod sa imong gibasa sa Bibliya. Hayan hangyoon mo siya sa pagbasag kusog sa usa ka bersikulo. Mas dakog epekto ang mahimo kon iyang makita ang ginaingon sa Bibliya kay sa mabatian lamang kana gikan nimo. Siyempre, aron katabangan siya sa gipasabot sa teksto, ipasiugda ang mga pulong nga nagpasabot sa ideya.

⁴ Usa-Kasulatan nga Presentasyon: Human ikapaila ang imong kaugalingon, mahimo kang moingon: “Ang mga tawo modangop sa lainlaing mga tinubdan aron magiyahan ang ilang kinabuhi. Sa imong hunahuna unsa ang kinamaayohang tinubdan sa praktikal nga giya? [Tugoting motubag.] Unsay imong hunahuna bahin niini nga pahayag? [Basaha ang Proverbio 2:​6, 7, ug tugoting motubag.] Ang tawhanong kaalam napamatud-ang kulang kaayo, nga nagtultol sa daghang tawo ngadto sa kawalay-paglaom. Apan, ang kaalam sa Diyos kanunayng napamatud-ang kasaligan ug mapuslanon.” Dayon ipakita ang publikasyon nga imong ginatanyag, ug ipasiugda gikan niana ang usa ka pananglitan sa praktikal nga kaalam sa Diyos.

⁵ Si Jesus migamit sa Kasulatan aron tabangan ang matinud-anog-kasingkasing nga mga tawo. (Luc. 24:32) Si Pablo mipamatuod pinaagig Kasulatan sa mga butang nga iyang gitudlo. (Buh. 17:​2, 3) Ang atong pagsalig ug kalipay diha sa ministeryo mouswag samtang mahimo kitang mas hanas gayod sa paggamit sa Pulong sa Diyos sa hustong paagi.

Ang Teokratikanhong Tunghaan sa Ministeryo sa 2002

¹ Ang katakos sa pagsulti giyanoyano lang sa kadaghanang tawo. Apan, ang pagpanulti maoy usa ka gasa gikan kang Jehova. Kini nagtugot kanato sa pagkomunikar sa uban ug sa pagbutyag sa atong mga hunahuna ug mga pagbati. Labaw sa tanan, uban niana atong madayeg ang atong Diyos.​—Sal. 22:22; 1 Cor. 1:4-7.

² Ang mga lalaki, babaye, ug mga bata ginabansay diha sa Teokratikanhong Tunghaan sa Ministeryo aron imantala ang ngalan ni Jehova. (Sal. 148:​12, 13) Ang programa sa tunghaan sa 2002 magkobre sa daghang matang sa mga ulohan sa Bibliya nga makahatag kanatog personal nga kaayohan ug magamit diha sa ministeryo. Pinaagi sa pagpangandam alang sa tunghaan ug pagpakig-ambit niana, atong mapauswag ang atong kahibalo ug atong mga kahanas ingong mga magtutudlo sa Pulong sa Diyos.​—Sal. 45:1.

³ Basaha ang Bibliya Adlaw-Adlaw: Kon sagad kita adunay Bibliya nga mabatonan, atong kapahimuslan ang bisan unsang libreng panahon nga atong nabatonan aron mabasa kini. Kadaghanan kanato adunay pipila ka bakanteng mga minutos sa maadlaw nga atong magamit niining paagiha. Pagkamapuslanon ang pagbasa labing menos usa ka panid kada adlaw, nga mao ray gikinahanglan aron makasunod sa programa sa pagbasa sa Bibliya nga gilaraw diha sa eskedyul sa tunghaan!​—Sal. 1:1-3.

⁴ Ang katakos sa pagbasag maayo sa Bibliya makatabang kanato nga maabot ang kasingkasing sa atong mamiminaw ug mapalihok sila sa pagdayeg kang Jehova. Ang mga igsoong lalaki nga modumala sa Asaynment Num. 2 sa tunghaan angayng magbansay, magbansay, magbansay sa pagbasa sa maong asaynment nga kusog. Ang magtatan-aw sa tunghaan mohatag ug komendasyon ug mga sugyot aron mapauswag ang pagbasa.

⁵ Gamita ang Nangatarongan nga Libro: Ang mga Asaynment Num. 3 ug Num. 4 gibase sa Nangatarongan nga libro. Ang kadaghanan kanato malagmit mas pang mahunahunaon nga maningkamot gayod sa mas kanunayng paggamit niining praktikal nga tabang diha sa ministeryo sa kanataran. Ang mga igsoong babaye angayng mopilig mga tagboanan nga magamit sa teritoryo. Ang magtatan-aw sa tunghaan kinahanglang maghatag ug linaing pagtagad sa ilang paagi sa pagtudlo ug sa paggamit sa Kasulatan.

⁶ Hinaot nga ang Teokratikanhong Tunghaan sa Ministeryo motabang natong tanan nga padayong gamiton ang hinatag-sa-Diyos nga gasa sa pagpanulti aron sa pagmantala sa maayong balita ug sa pagdayeg sa atong dakong Diyos, si Jehova!​—Sal. 34:1; Efe. 6:19.