Imantala ang Kamatuoran Bahin Kang Jesus

¹ Ang dinihogang mga Kristohanon, nga gipaluyohan sa ilang mga kauban nga ubang mga karnero, “may buluhaton sa pagpamatuod bahin kang Jesus.” (Pin. 12:17) Hinungdanon kini nga buluhaton, kay ang kaluwasan posible lamang pinaagi kaniya.​—Juan 17:3; Buh. 4:12.

² ‘Ang Dalan, ang Kamatuoran, ug ang Kinabuhi’: “Ako ang dalan ug ang kamatuoran ug ang kinabuhi,” matod ni Jesus. “Walay makaadto sa Amahan kon dili pinaagi kanako.” (Juan 14:6) Pinaagi lamang kang Jesus, “ang dalan,” nga kita makaduol sa Diyos diha sa pag-ampo ug makabaton ug inuyonang relasyon uban Kaniya. (Juan 15:16) Si Jesus mao “ang kamatuoran” sa pagkaagi nga ang mga tagna ug mga landong nga anaa sa Hebreohanong Kasulatan natuman diha kaniya. (Juan 1:17; Col. 2:​16, 17) Sa pagkatinuod, ang pangunang tumong sa tinuod nga tagna mao ang pagbutyag ug dugang kahayag sa iyang hinungdanong papel sa pagpatuman sa katuyoan sa Diyos. (Pin. 19:10) Dugang pa, si Jesus mao “ang kinabuhi.” Aron maangkon ang gasa nga kinabuhing walay kataposan, ang tanan kinahanglang magpasundayag ug pagtuo sa iyang halad lukat.​—Juan 3:​16, 36; Heb. 2:9.

³ Ulo ug Nagamandong Hari: Kinahanglang ilhon usab sa mga tawo ang dakong administratibong gahom ni Jehova nga iyang gitugyan sa iyang Anak. Si Jesus naentrono na ingong Hari sa Gingharian sa Diyos​—nga “kaniya ang pagkamasinugtanon sa mga katawhan maiya.” (Gen. 49:10) Dugang pa, si Jehova nagtudlo kaniya ingong Ulo sa kongregasyon. (Efe. 1:​22, 23) Kinahanglan natong tabangan ang atong mga ginatun-an sa Bibliya nga makasabot kon sa unsang paagi gitultolan ni Jesus ang kongregasyon ug gigamit “ang matinumanon ug maalamong ulipon” sa pagtaganag espirituwal nga “pagkaon sa hustong panahon.”​—Mat. 24:45-47.

⁴ Maluloy-ong Hataas nga Saserdote: Kay nakasinatig mga pagsulay ug pag-antos ingong tawo, si Jesus “makaarang sa pagtabang kanila nga ginasulayan.” (Heb. 2:​17, 18) Pagkamakapadasig alang sa dili-hingpit nga mga tawo ang pagkahibalo nga si Jesus mosimpatiya sa ilang mga kahuyangan ug malulotong mangamuyo alang kanila! (Roma 8:34) Pinasukad sa halad ni Jesus ug pinaagi sa iyang mga pag-alagad ingong Hataas nga Saserdote, kita makaduol kang Jehova “uban ang kagawasan sa pagsulti” aron mabatonan ang “tabang sa hustong panahon.”​—Heb. 4:​15, 16.

⁵ Hinaot nga ang atong mga paningkamot sa pagpahibalo sa uban sa kamatuoran bahin kang Jesus magtukmod kanila sa pagsunod ug pag-alagad kaniya duyog kanato.​—Juan 14:​15, 21.

Abagi ang Imong Magtatan-aw sa Pagtuon sa Libro sa Kongregasyon

¹ Kitang tanan makakuhag daghang benepisyo gikan sa Pagtuon sa Libro sa Kongregasyon. Sa miaging bulan atong nahisgotan kon sa unsang paagi tumanon sa magtatan-aw sa Pagtuon sa Libro sa Kongregasyon ang iyang papel. Apan unsay atong mahimo sa pag-abag kaniya ug sa ingon makabenepisyo kita ug ang uban?

² Tambong Matag Semana: Tungod kay ang mga grupo sa pagtuon sa libro gihuptang gamay, hinungdanon ang imong pagtambong. Himoang tumong ang pagtambong matag semana. Makatabang ka usab pinaagi sa pag-abot ug sayo, tungod kay kini magtugot sa magtatan-aw nga makasugod sa hapsay nga paagi.​—1 Cor. 14:40.

³ Makapalig-ong mga Komento: Ang laing paagi nga ikaw makaabag mao ang pagkahimong andam kaayo ug pinaagi sa paghatag ug makapalig-ong mga komento. Ang mga komento nga nagsentro sa usa lamang ka punto mao ang labing maayo, ug magdasig usab kini sa uban sa pagkomento. Ayawg komentohi ang tanang punto diha sa parapo. Kon may usa ka punto diha sa materyal nga nakatandog sa imong kasingkasing, palamboa ang panaghisgot pinaagi sa pagpaambit sa imong hunahuna diha sa komento.​—1 Ped. 4:10.

⁴ Kon makapribilehiyo ka sa pagbasa sa mga parapo alang sa kaayohan sa grupo, magmakugihon sa pagtuman sa maong asaynment. Ang maayong pagbasa makaamot sa kalamposan sa pagtuon.​—1 Tim. 4:13.

⁵ Grupo nga Pagsangyaw: Ang mga tigom sa dayon nang pagsangyaw ginahimo diha sa daghang dapit sa pagtuon sa libro, ug ang imong pagpaluyo sa maong mga kahikayan makatabang sa magtatan-aw samtang siya manguna sa buluhatong pagsangyaw. Isipa kining mga kahikayana ingong mga kahigayonan nga masuod sa imong mga igsoon ug makadasig kanila.

⁶ Mga Taho sa Pag-alagad sa Kanataran: Ang paghatag gilayon sa imong taho sa pag-alagad sa kanataran sa matag kataposan sa bulan maoy laing paagi sa pag-abag sa magtatan-aw. Mahimo mong ihatag ang imong taho deretso kaniya o ibutang kana sa kahon nga gigahin alang sa mga taho sa pag-alagad diha sa Kingdom Hall. Ang sekretaryo makagamit sa maong kahon sa pagtigom sa mga taho sa pag-alagad sa kanataran nga nakolekta sa mga magtatan-aw sa pagtuon sa libro.

⁷ Ang imong kooperasyon uban sa imong magtatan-aw sa Pagtuon sa Libro sa Kongregasyon pabilhan gayod. Labaw sa tanan, makasalig ka nga si Jehova ‘magauban sa espiritu nga imong ginapakita.’​—Filip. 4:23.