“Alagara si Jehova Uban ang Pagmaya”

1. Unsay tinubdan sa dakong kangaya alang sa mga alagad ni Jehova?

¹ “Pagmaya kanunay diha sa Ginoo,” misulat si apostol Pablo. “Sa makausa pa ako moingon, Pagmaya!” (Filip. 4:4) Ang pribilehiyo sa pagpaambit sa maayong balita ug pagtabang sa samag-karnerong mga tawo sa pagsimba kang Jehova maoy tinubdan sa dakong kangaya. (Luc. 10:17; Buh. 15:3; 1 Tes. 2:19) Apan, kon atong makaplagan nga usahay mawad-an kitag kangaya diha sa ministeryo, unsay atong mahimo?

2. Sa unsang paagi ang pagsentro kanunay sa hunahuna sa tinubdan sa atong buluhaton makaamot sa atong kangaya?

² Usa ka Buluhaton nga Hinatag sa Diyos: Hinumdomi nga ang atong buluhatong pagsangyaw naggikan kang Jehova. Oo, pagkadako sa atong pribilehiyo nga mahimong “mga isigkamagbubuhat sa Diyos” pinaagi sa pagmantala sa mensahe sa Gingharian ug paghimog mga tinun-an! (1 Cor. 3:9) Si Kristo Jesus nagauban kanato niining di-na-masubli nga buluhaton. (Mat. 28:18-20) Ang mga manulonda usab aktibong nalangkit ug nakig-uban kanato sa dakong espirituwal nga pagpangani nga nagakahitabo karon. (Buh. 8:26; Pin. 14:6) Ang Kasulatan, uban sa mga kasinatian sa katawhan sa Diyos, naghatag ug di-malalis nga pamatuod nga si Jehova nagpaluyo niining buluhatona. Busa, sa dihang kita mosangyaw, kita moadto “ingon nga mga pinadala gikan sa Diyos, ilalom sa panan-aw sa Diyos, kauban ni Kristo.” (2 Cor. 2:17) Pagkadakong katarongan sa kangaya!

3. Unsay bahin sa pag-ampo sa paghupot sa atong kangaya diha sa pag-alagad sa Diyos?

³ Ang pag-ampo hinungdanon aron mahuptan ang atong kangaya diha sa pag-alagad sa Diyos. (Gal. 5:22) Sanglit mahimo lamang nato ang buluhaton sa Diyos pinaagi sa iyang kusog, kita kinahanglang mangamuyo alang sa iyang espiritu, nga dagaya niyang ihatag niadtong nagapangayo kaniya. (Luc. 11:13; 2 Cor. 4:​1, 7; Efe. 6:18-20) Ang pag-ampo bahin sa atong ministeryo motabang kanato sa paghupot ug hustong panglantaw sa dihang makasugamak kitag negatibong mga sanong. Magpaarang kini kanato sa pagpadayon sa pagsangyaw nga maisogon ug malipayon.​—Buh. 4:29-31; 5:40-42; 13:50-52.

4. Sa unsang paagi ang maayong pagpangandam makatabang sa pagpauswag sa atong kangaya diha sa pagsangyaw, ug unsa ang pipila ka praktikal nga mga paagi nga kita makapangandam?

⁴ Pangandam Pag-ayo: Ang usa ka praktikal nga paagi sa pagpauswag sa atong kangaya sa dihang makig-ambit kita diha sa ministeryo mao ang atong pagpangandam pag-ayo. (1 Ped. 3:15) Ang maong pagpangandam wala magkinahanglan ug daghang panahon. Dangtan lag pipila ka minutos ang pagrepaso sa gisugyot nga mga presentasyon alang sa kinabag-ohang mga magasin o haom nga presentasyon sa literatura nga giplanohan mong itanyag. Alang sa haom nga pasiuna, makasusi ka sa librong Nangatarongan o sa nangaging mga gula sa Atong Ministeryo sa Gingharian. Nakaplagan sa ubang mga magmamantala sa Gingharian nga makatabang ang pagsulat sa mubong presentasyon diha sa usa ka gamayng papel. Sa popanahon, ilang tan-awon ang maong papel aron kini mapalunhaw sa ilang panumdoman. Kini motabang kanila sa pagbuntog sa kakulba ug maghatag kanila ug kompiyansa sa pagsangyaw nga maisogon.

5. Sa unsang paagi ang kangaya makabenepisyo kanato ug sa uban?

⁵ Ang kangaya magdalag daghang kaayohan. Ang mangayaong tinamdan makahimo sa atong mensahe nga mas madanihon. Ang kangaya magpalig-on kanato sa paglahutay. (Neh. 8:10; Heb. 12:2) Labaw sa tanan, ang atong mangayaong pag-alagad maghimaya kang Jehova. Busa, atong ‘alagaron si Jehova uban ang pagmaya.’​—Sal. 100:2.

Kon Unsay Isulti Labot sa mga Magasin

Ang Bantayanang Torre Okt. 15

“Daghang desisyon nga atong atubangon adunay layog-abot nga mga epekto sa atong kinabuhi. Unsay makatabang kanato aron malikayan ang paghimog di-maalamong mga desisyon? [Tugoting motubag. Dayon basaha ang Proverbio 3:6.] Kining gulaa sa Ang Bantayanang Torre nagpresentar sa lima ka giya nga gipasukad sa Bibliya nga makatabang kanato sa paghimog maalamong mga desisyon.”

Pagmata! Okt. 22

“Namatikdan mo ba nga sa masubsob makadungog kitag bahin sa mga kagaw nga dili na madutlan ug tambal? [Tugoting motubag.] Kining magasina nagsusi sa mga rason maylabot niini ug nagsugyot kon unsay atong mahimo sa pagpanalipod sa atong kaugalingon. Gihisgotan usab niini ang saad sa Bibliya mahitungod sa usa ka kalibotan diin wala nay magmasakiton.” Basaha ang Isaias 33:24.

Ang Bantayanang Torre Nob. 1

“May panahon nga kitang tanan giluiban sa atong pagsalig. Napangutana mo ba sukad ang imong kaugalingon, ‘Aduna bay si bisan kinsa nga akong kasaligan?’ [Tugoting motubag. Dayon basaha ang Proverbio 3:5.] Kining magasina nagpatin-aw kon nganong kita bug-os nga makasalig sa Diyos. Gihisgotan usab niini kon sa unsang paagi atong matino kon kinsang mga tawhana ang takos sa atong pagsalig.”

Pagmata! Nob. 8

“Ang mga produkto nga hinimo sa petrolyo makaapektar halos sa tanang bahin sa atong kinabuhi. Nahibulong ka ba sukad kon maunsa kaha ang kinabuhi nga walay petrolyo? [Tugoting motubag.] Kining magasina naghisgot kon sa unsang paagi ang aseite adunay dakong papel diha sa modernong katilingban. Gipatin-aw usab niini nga kita dili angayng mahadlok nga mahurot ang suplay sa aseite sa umaabot.”