‘Pamatud-i Ninyo nga Kamo Andam’

¹ Sa iyang dakong tagna mahitungod sa kataposan niining sistemaha sa mga butang, si Jesus nagpasidaan batok sa pagkalinga sa kalibotanong mga kabalaka sa kinabuhi. (Mat. 24:36-39; Luc. 21:​34, 35) Sanglit ang pagbuto sa dakong kasakitan mahimong mahitabo sa bisan unsang panahon, hinungdanon gayod nga atong sundon ang tambag ni Jesus: “Pamatud-i . . . ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.” (Mat. 24:44) Unsay makatabang kanato niining bahina?

² Pakigbisog Batok sa mga Kabalaka ug mga Kabaldahan: Ang usa sa espirituwal nga mga lit-ag nga kinahanglan natong bantayan mao ang mga kabalaka bahin sa panginabuhi. (Luc. 21:34) Sa pipila ka nasod, ang kakabos, kawalay-trabaho, ug kamahal sa palaliton makapalisod sa pagbaton sa mga kinahanglanon sa kinabuhi. Sa ubang mga nasod, ang pagbaton ug materyal nga mga kabtangan ordinaryo na. Kon ang kabalaka bahin sa materyal nga mga butang mosugod sa pagdominar sa atong hunahuna, mahimong dili na nato ikapunting ang atong pagtagad nganha sa mga kamatuoran sa Gingharian. (Mat. 6:19-24, 31-33) Ang Kristohanong mga tigom motabang kanato sa paghupot sa atong pagtagad nga mapunting sa mga kamatuoran sa Gingharian. Gihimo ba nimong tumong ang pagtambong sa matag tigom?​—Heb. 10:​24, 25.

³ Ang kalibotan karon puno sa mga kabaldahan nga daling mopahikaw kanato sa bililhong panahon. Ang paggamit ug kompiyuter mahimong lit-ag kon ang usa mogahin ug sobrang panahon sa pagpangitag impormasyon sa Internet, pagbasa ug pagpadalag E-mail, o pagdulag mga dula sa kompiyuter. Makagugol kitag daghang oras diha sa telebisyon, mga pelikula, mga kalingawan, pagbasag sekular nga mga basahon, ug esports, nga magbilin kanatog diyutayng panahon o kusog alang sa espirituwal nga mga pangagpas. Bisan tuod ang paglingawlingaw ug pagrelaks makahatag ug temporaryong kalagsik, ang personal ug pamilyahanon nga pagtuon sa Bibliya makahatag ug dumalayong mga kaayohan. (1 Tim. 4:​7, 8) Gipalit mo ba ang panahon aron sa pagpamalandong sa Pulong sa Diyos matag adlaw?​—Efe. 5:15-17.

⁴ Pagkamapasalamaton nato nga ang organisasyon ni Jehova naghikay ug usa ka programa sa espirituwal nga instruksiyon nga motabang kanato nga ‘molampos sa pag-ikyas sa tanang butang nga gitakdang mahitabo, sa pagbarog atubangan sa Anak sa tawo’! (Luc. 21:36) Hinaot pahimuslan nato pag-ayo kining maong mga tagana ug ‘pamatud-an nato nga kita andam’ aron ang atong pagtuo mahimong “usa ka hinungdan sa pagdayeg ug himaya ug dungog sa pagpadayag ni Jesu-Kristo.”​—1 Ped. 1:7.

Ang Pagdayeg Magapalagsik

¹ “Di ba nagbinuotan man ko karong adlawa?” mibakho ang batang babaye sa panahon sa tingkatulog. Nahingangha ang inahan sa maong pangutana. Bisan pag nakamatikod sa paningkamot sa batang babaye nga magbinuotan nianang adlawa, ang inahan wala gayod makasulti bisag usa ka pulong sa pagdayeg. Ang mga luha sa batang babaye angayng magpahinumdom nga kitang tanan​—mga batag tigulang—nagkinahanglan ug pagdayeg. Gipalagsik ba nato kadtong anaa sa atong palibot pinaagi sa pagpahayag ug apresasyon sa maayong butang nga ilang nahimo?​—Prov. 25:11.

² Adunay daghang maayong mga katarongan nga atong dayegon ang atong mga isigka-Kristohanon. Ang mga ansiyano, ministeryal nga mga alagad, ug mga payunir naningkamot pag-ayo sa pagtuman sa ilang mga responsabilidad. (1 Tim. 4:10; 5:17) Ang mahinadlokon-sa-Diyos nga mga ginikanan naghimo kutob sa ilang maarangan sa pagmatuto sa ilang mga anak diha sa mga dalan ni Jehova. (Efe. 6:4) Ang Kristohanong mga batan-on nakigbisog gayod sa pagsukol sa “espiritu sa kalibotan.” (1 Cor. 2:12; Efe. 2:1-3) Ang uban matinumanong nag-alagad kang Jehova bisan sa katigulangon, mga suliran sa panglawas, o ubang mga pagsulay. (2 Cor. 12:7) Silang tanan takos nga dayegon. Ato bang gipasalamatan ang ilang dalayegon nga mga paningkamot?

³ Personal ug Espesipiko: Malipay gayod kitang tanan sa pagkabati ug pagdayeg gikan sa plataporma. Apan, ang pagdayeg mas makapalagsik pa gayod kon kini personal nga itumong kanato. Pananglitan, diha sa kapitulo 16 sa iyang sulat ngadto sa mga taga-Roma, si Pablo mihimog espesipikong mga kapahayagan sa pagdayeg mahitungod kang Febe, Prisca ug Aquila, Trifena ug Trifosa, ug Persida, ug sa uban pa. (Roma 16:1-4, 12) Pagkamakapalagsik gayod sa iyang mga pulong ngadto sa maong matinumanong mga igsoon! Ang maong pagdayeg nagpasalig sa atong mga igsoong lalaki ug babaye nga sila gikinahanglan ug magpasuod pa gayod kanato. Nakahatag ka na bag espesipikong personal nga pagdayeg di pa dugay?​—Efe. 4:29.

⁴ Kinasingkasing: Aron mahimong tinuod nga makapalagsik, ang pagdayeg kinahanglang sinsero. Mailhan sa mga tawo kon kita nagsulti ba nga kinasingkasing o “nagaulog-ulog” lamang. (Prov. 28:23) Samtang atong bansayon ang atong kaugalingon sa pagtan-aw ug maayong mga hiyas diha sa uban, ang atong kasingkasing matukmod sa pagdayeg. Hinaot magmadagayaon kita sa paghatag ug tinuod nga pagdayeg, sa pagkasayod nga “ang usa ka pulong sa hustong panahon Oh pagkamaayo!”​—Prov. 15:23.