Tinuod Kristohanong Panaghiusa—Sa Unsang Paagi Makab-ot?

¹ Unsay makapahiusa sa kapin sa unom ka milyong tawo gikan sa 234 ka nasod ug mga 380 ka grupo sa pinulongan? Ang pagsimba lamang kang Jehova nga Diyos. (Miq. 2:12; 4:1-3) Ang mga Saksi ni Jehova nahibalo gikan sa personal nga kasinatian nga ang tinuod nga Kristohanong panaghiusa maoy usa ka katinuoran karon. Ingong “usa ka panon” ilalom sa “usa ka magbalantay,” kita determinado sa pagsukol sa makapabahin nga espiritu niining kalibotana.​—Juan 10:16; Efe. 2:2.

² Ang di-mapakyas nga katuyoan sa Diyos mao nga ang tanang intelihente nga mga linalang mahiusa sa matuod nga pagsimba. (Pin. 5:13) Kay nahibalo sa kahinungdanon niini, kinasingkasing nga giampo ni Jesus ang panaghiusa sa iyang mga sumusunod. (Juan 17:​20, 21) Sa unsang paagi ang matag usa kanato makaamot sa panaghiusa sa Kristohanong kongregasyon?

³ Kon sa Unsang Paagi Makab-ot ang Panaghiusa: Kon wala ang Pulong ug ang espiritu sa Diyos, ang Kristohanong panaghiusa dili makab-ot. Ang atong pagpadapat sa atong nabasa sa Bibliya magtugot sa espiritu sa Diyos sa pag-agos nga walay babag diha sa atong kinabuhi. Kini makapaarang kanato ‘sa pagsunod sa pagkausa sa espiritu sa nagahiusang bugkos sa pakigdait.’ (Efe. 4:3) Kini magtukmod kanato sa pag-antos sa usag usa diha sa gugma. (Col. 3:​13, 14; 1 Ped. 4:8) Gipalambo mo ba ang panaghiusa pinaagi sa pagpamalandong sa Pulong sa Diyos matag adlaw?

⁴ Ang atong sugo sa pagsangyaw ug paghimog mga tinun-an makapahiusa usab kanato. Sa dihang moduyog kita sa uban diha sa Kristohanong ministeryo, “nga naningkamot kiliran sa kiliran alang sa pagtuo sa maayong balita,” kita mahimong “mga isigkamagbubuhat diha sa kamatuoran.” (Filip. 1:27; 3 Juan 8) Samtang buhaton nato kana, ang makapahiusang mga bugkos sa gugma sulod sa kongregasyon molig-on. Nganong dili dapiton ang usa nga wala pa nimo ikauban di pa dugay nga moduyog kanimo sa ministeryo sa kanataran niining semanaha?

⁵ Pagkadako sa atong pribilehiyo nga mahimong bahin sa bugtong tinuod nga internasyonal nga panag-igsoonay sa yuta karong adlawa! (1 Ped. 5:9) Sa Disyembre ug sa unang bahin sa Enero, mga linibo ka tawo dinhi sa Pilipinas ang makasinati mismo ning maong panaghiusa diha sa “Himayaa ang Diyos” nga Distritong mga Kombensiyon. Hinaot ang matag usa kanato makaamot ngadto niining bililhong panaghiusa pinaagi sa pagbasa sa Pulong sa Diyos matag adlaw, pagsulbad sa mga kasungian diha sa gugma, ug pinaagi sa pagsangyaw sa maayong balita “uban ang panag-uyon.”​—Roma 15:6.

Pangitaa ang Takos nga mga Tawo

¹ Ang mga instruksiyon ni Jesus maylabot sa pagtuman sa buluhatong pagsangyaw mahimong malisod alang kanato. Siya nag-ingon: “Sa bisan unsang siyudad o balangay nga kamo mosulod, pangitaa kon kinsa didto ang takos.” (Mat. 10:11) Tungod kay nagkadaghan karong adlawa ang mga tawo nga mogahin ug diyutayng panahon sa ilang balay, unsaon nato pagpangita ang takos nga mga tawo sa epektibong paagi?

² Susiha ang Inyong Teritoryo: Pagsugod pinaagi sa pagsusi sa inyong teritoryo. Kanus-a sagad anaa ang mga tawo diha sa balay? Asa kaha sila makaplagan sa maadlaw? Aduna bay tinong adlaw sa semana o oras sa adlaw nga sila mahimong mas madinawaton kon duawon? Ang pagpasibo sa imong ministeryo ngadto sa rutina ug mga kahimtang sa mga tawo sa inyong teritoryo makatabang kanimo sa pagkab-ot sa labing maayong mga resulta.​—1 Cor. 9:​23, 26.

³ Daghang magmamantala ang nagmalamposon panahon sa sayong mga oras sa gabii. Ang pipila ka tagbalay mas relaks ug mas makiling sa pagpamati nianang panahona. Kon mag-ulan ug dili ka makagawas tungod sa baha, ang pagsangyaw pinaagig telepono o pagsulat mahimong epektibo. Ang pagsangyaw sa mga teritoryo sa negosyo ug pagpamatuod sa publikong mga dapit maoy mga paagi usab aron maabot ang mga tawo sa maayong balita.

⁴ Sulod sa usa ka bulan sa linaing kalihokan, mihikay ang usa ka kongregasyon ug pagsangyaw sa kahaponon na sa mga adlawng Sabado ug Dominggo ug pagpamatuod sa gabii sa mga Miyerkoles ug Biyernes. Nag-organisar usab sila ug pagsangyaw pinaagig telepono ug naghikay sa pagsangyaw sa teritoryo sa negosyo. Kining maong mga kahikayan nakapatunghag dakong kadasig sa ministeryo nga ang kongregasyon nakahukom sa pagpadayon niana.

⁵ Magmakugihon sa Pagbalikduaw: Kon sa inyong teritoryo lisod ang pagkaplag ug tawo nga anaa sa balay sa dihang ikaw mobalikduaw, sulayi ang paghimog tinong kasabotan sa pagbalikduaw sa kataposan sa matag duaw, lakip ang unang duaw. Dayon, paneguroa nga tumanon ang maong kasabotan. (Mat. 5:37) Kon nahiangay, mahimong pangayoon mo ang numero sa telepono sa tagbalay. Makatabang usab kini kanimo sa pagkontak pag-usab sa maong tawo.

⁶ Ang atong makugihong mga paningkamot sa pagpangita sa takos nga mga tawo ug pag-ugmad sa interes nga atong makaplagan seguradong panalanginan ni Jehova.​—Prov. 21:5.