Ihalad Kang Jehova ang Atong Labing Maayo

¹ Ang Balaod ni Jehova sa Israel nagtino nga ang mga mananap nga ihalad kaniya kinahanglang “himsog.” Ang depektoso nga mananap dili dalawaton. (Lev. 22:18-​20; Mal. 1:​6-9) Dugang pa, sa dihang gihimo ang halad, ang tanang tambok​—ang kinalamiang bahin​—iya ni Jehova. (Lev. 3:​14-​16) Ingong Amahan ug Dakong Agalon sa Israel, si Jehova takos sa labing maayo.

² Sama sa karaang kapanahonan, ang Diyos maikagon kaayo sa kalidad sa atong mga halad karon. Ang atong pag-alagad angayng magbanaag sa nahiangayng kahadlok kang Jehova. Siyempre, lainlain ang mga kahimtang sa matag tawo. Apan, kita adunay maayong katarongan sa pagsusi sa atong kaugalingon aron matino nga atong ginahatag kaniya ang atong labing maayo.​​—Efe. 5:10.

³ Bug-os-Kalag nga Pag-alagad: Aron ang atong ministeryo makapasidungog kang Jehova ug makatandog sa mga kasingkasing sa atong mga mamiminaw, kini dili mahimong rutina lamang. Ang atong mga ekspresyon bahin sa atong Diyos ug sa iyang talagsaong mga katuyoan kinahanglang magsumikad sa mapasalamatong mga kasingkasing. (Sal. 145:7) Gipasiugda niini ang kahinungdanon sa pagmentinar ug usa ka maayong programa sa personal nga pagbasa ug pagtuon sa Bibliya.​​—Prov. 15:28.

⁴ Ang paghatag kang Jehova sa atong labing maayo maglakip usab sa pagsundog sa iyang gugma alang sa katawhan. (Efe. 5:​1, 2) Ang gugma alang sa katawhan magpalihok kanato sa pagpaningkamot sa pag-abot sa daghang tawo kutob sa maarangan dala ang nagahatag-kinabuhi nga mensahe sa kamatuoran. (Mar. 6:34) Magpasibot kini kanato sa pagpakitag personal nga interes niadtong atong ikaestorya. Mapadayonon kining magpahunahuna kanato bahin kanila human ang unang duaw ug magtukmod kanato sa pagbalik. Magdasig kini kanato sa pagbuhat sa atong tanang maarangan sa pagtabang kanila sa pag-uswag sa espirituwal.​​—Buh. 20:24; 26:​28, 29.

⁵ “Halad sa Pagdayeg”: Ang laing paagi sa paghatag kang Jehova sa atong labing maayo maoy pinaagi sa atong pagkamakugihon diha sa ministeryo. Sa dihang kita organisado pag-ayo ug nasentro ang pagtagad diha sa buluhaton sa ministeryo, malampos nato ang labing maayo sumala sa panahon nga atong mabatonan. (1 Tim. 4:10) Ang maayong pagpangandam magpaarang kanato sa pagsulti uban ang katin-aw ug kainit, sa ingon niana kini magpauswag sa posibilidad sa usa ka paborableng pagsanong. (Prov. 16:21) Samtang atong ipaambit ang maayong balita ngadto sa uban, ang atong kinasingkasing nga mga ekspresyon sa tukma matawag nga “halad sa pagdayeg.”​​—Heb. 13:15.

Mga Batan-on​—Basaha ang Pulong sa Diyos!

¹ Ang pagkabatan-on maoy panahon sa mga suliran ug mabug-at nga mga desisyon. Daghan kaninyong Kristohanong mga batan-on sa adlaw-adlaw ginapit-os aron lapason ang mga sukdanan sa Diyos maylabot sa pamatasan. Sa dili pa kamo mohimog personal nga mga desisyon bahin sa edukasyon, panarbaho, ug kaminyoon, kinahanglang napahimutang na ninyo ang inyong espirituwal nga mga tumong. Nianang paagiha lamang nga inyong mahimo ang ubang mga desisyon nga makahatag ug kaayohan sa nahibilin ninyong kinabuhi. Ang tinong espirituwal nga mga tumong motabang kaninyo sa paglihok nga maalamon ug sa paghimo sa inyong kinabuhi nga malamposon. Pinaagi sa pagbasa ug pagpamalandong sa Pulong sa Diyos nga regular, mapalihok kamo sa pagkinabuhi uyon sa inspiradong tambag niini, ug ang inyong maayong mga paningkamot magmalamposon.​​—Jos. 1:8; Sal. 1:​2, 3.

² Sa Unsang Paagi Kini Makahatag Kaninyog Kaayohan? Ang kalibotan ni Satanas napuno sa mga panghaylo sa pagbuhat ug kalapasan. (1 Juan 2:​15, 16) Kamo may nahibaloan tingaling mga klasmet o uban pa nga sama ninyog pangedaron nga nasugamak sa kadaotan kay nagpadala sa pagpig-ot sa barkada. Ang pagsunod sa tambag sa Bibliya mohatag kaninyog moral ug espirituwal nga kalig-on sa pagsalikway sa daotang dalan. Dugang pa, ang tambag sa Pulong sa Diyos motabang kaninyo sa paglikay sa malipatlipatong mga lit-ag ni Satanas. (2 Cor. 2:​11; Heb. 5:14) Ang paglakaw diha sa mga dalan sa Diyos maghatag kaninyog tinuod nga kalipay​—personal nga katagbawan sa inyong pagkinabuhi.​​—Sal. 119:​1, 9, 11.

³ Ang di-matuis nga mga prinsipyo sa Pulong sa Diyos molabaw sa tawhanong kaalam. (Sal. 119:98-​100) Ang kahibalo sa mga prinsipyo sa Bibliya ug pagpamalandong sa gibutyag nga mga katuyoan ni Jehova uban ang kinasingkasing nga pag-ampo motabang kaninyo sa pagtukod ug suod nga relasyon uban sa labing maalamong Awtor sa Bibliya, si Jehova nga Diyos. Siya nagsaad: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.”​​—Sal. 32:8.

⁴ Gahinig Panahon ang Pagbasa Niana: Usa ka Kristohanong batan-on nga babaye naghimog tumong sa pagbasa sa tibuok Bibliya, ug iyang nahuman kini sulod sa usa ka tuig. Sa unsang paagi siya nakabenepisyo? Siya miingon: “Daghan kaayo ang akong nakat-onan bahin kang Jehova​—mga butang nga nakapasuod pa kanako ngadto kaniya ug nakapalihok kanako sa pagkahadlok kaniya sa nahibilin nakong kinabuhi.” (Sant. 4:8) Nabasa na ba ninyo ang tibuok Bibliya? Kon wala pa, nganong dili himoong tumong ang pagbuhat niana? Panalanginan gayod ni Jehova ang inyong mga paningkamot, ug inyong anihon ang dagkong mga ganti.