Kon sa Unsang Paagi Mosangyaw sa Teritoryong Negosyohanan

1. Unsa ang pipila ka bentaha sa pagsangyaw diha sa teritoryong negosyohanan?

¹ Gusto ba nimong mosangyaw diha sa teritoryo diin ang mga tawo sagad maabiabihon sa mga bisita ug makahibalag ka kanunay ug mga tawo? Makahimo ka niana diha mismo sa teritoryo sa imong kongregasyon. Sa unsang paagi? Pinaagi sa pagduaw sa mga tindahan nga makaplagan didto. Ang mga magmamantala nga magsangyaw sa katindahanan sagad makapahimulos ug maayong mga resulta.

2. Sa unsang paagi organisahon ang pagsangyaw diha sa mga tindahan?

² Ang ubang mga kongregasyon adunay negosyohanang mga distrito ingong bahin sa teritoryo nga giasayn kanila. Ang igsoong lalaki nga nag-atiman sa teritoryo hayan makaandam ug linaing mapa nga mga kard niining nagdasok nga negosyohanang mga dapit. Ang bisan unsang residensiyal nga teritoryo nga mapa nga mga kard nga naglakip sa negosyohanang mga seksiyon angayng tin-aw nga magpaila nga ang mga tindahan dili kobrehan ingong bahin sa residensiyal nga teritoryo. Sa ubang mga teritoryo, ang mga tindahan mahimong kobrehan dungan sa mga residensiya. Kon wala ka pa gayod makasangyaw diha sa mga tindahan, sulayi una ang pagsangyaw diha sa pipila ka gagmayng mga tindahan.

3. Unsay makatabang kanato nga magmaepektibo sa dihang magsangyaw diha sa katindahanan?

³ Gamita ang Yanong Paagi: Sa dihang magsangyaw diha sa katindahanan, hinungdanon nga magsinina nga samag motambong ka sa tigom sa Kingdom Hall. Maayo usab kon mopili kag oras sa dihang dili puliki ang tindahan. Kon mahimo, mosulod ka sa tindahan sa dihang walay mga pumapalit nga nagpaabot nga silbihan. Hangyo nga makigsulti sa manedyer o sa tawo nga gisaligan. Ayawg tas-a ang imong isulti ug deretso sa punto. Unsay mahimo mong isulti?

4-6. Unsay atong mahimong isulti sa dihang mosangyaw sa usa ka tindera/tindero o manedyer?

⁴ Sa dihang makigsulti sa tindera/tindero o manedyer, hayan makaingon ka ug sama niini: “Ang mga negosyante puliki kaayog mga eskedyul nga talagsa ra namo silang maabtan sa balay, busa giduaw ka namo sa imong trabahoanan. Ang among mga magasin naghatag ug tibuok-kalibotang panglantaw sa mga panghitabo karon.” Dayon ipasiugda ang usa ka mubong punto gikan sa usa ka magasin.

⁵ O masulayan nimo kining yanong paagi: “Daghang tawo ang gustong makabaton ug dugang kahibalo bahin sa Bibliya apan diyutay ra kaayo silag panahon. Kini nga tract naghisgot ug libreng programa sa pagtuon nga mabatonan aron sa pagtabang kanimo sa pagtubag sa imong mga pangutana bahin sa Bibliya.” Dayon ipakita ang mga panid 4-5 sa tract nga Gusto Ka Bang Makabaton ug Dugang Kahibalo Bahin sa Bibliya?

⁶ Kon morag puliki ang tindera/tindero, mahimong itanyag lang nimo ang tract ug moingon: “Mohapit lang ko pag-usab kon dili ka na kaayo puliki. Gusto nakong mahibaloan kon unsay imong hunahuna bahin niini nga tract.”

7. Sa unsang paagi atong maugmad ang interes nga atong makaplagan diha sa teritoryong negosyohanan?

⁷ Ugmara ang Interes nga Gipakita: Makadumala ka pa gani ug pagtuon sa Bibliya diha sa teritoryong negosyohanan. Usa ka espesyal payunir regular nga naghatod ug mga magasin ngadto sa usa ka negosyanteng lalaki. Sa dihang nagpahayag ug apresasyon ang maong lalaki sa iyang nabasahan, gipasundayag sa payunir ang kahikayan sa pagtuon sa Bibliya, ginamit ang brosyur nga Gikinahanglan. Nasugdan ang pagtuon diha mismo sa trabahoanan sa maong lalaki. Naghunahuna sa mga kahimtang, ang payunir naglimite niana ngadto sa 10 hangtod sa 15 minutos sa matag pagtuon. Hinaot kita, usab, magpadayon sa pagpangita sa takos nga mga tawo pinaagi sa pagsangyaw diha sa teritoryong negosyohanan.

Kon Unsay Isulti Labot sa mga Magasin

Ang Bantayanang Torre Hul. 15

“Kadaghanan sa mga tawo lagmit magduhaduha kon may hitabo nga sama niini [kon unsay gipakita sa hapin] nga itaho sa mga balita karong mga adlawa. Unsay imong hunahuna? [Tugoting motubag. Dayon basaha ang Marcos 4:39.] Unsay ebidensiya nga tinuod gayod ang mga milagro nga gihimo ni Jesus? Kining gulaa sa Ang Bantayanang Torre naghisgot niining pangutanaha.”

Pagmata! Hul. 22

“Niining kalibotana karon, ang mga kriminal kanunayng magmugnag bag-ong mga paagi sa panglimbong sa way-pagsuspetsa nga mga tawo. Nabalaka ka ba bahin niini? [Tugoting motubag.] Kining gulaa sa Pagmata! naghisgot sa pipila ka pangunang mga pahamatngon nga makatabang kanato sa pagpanalipod sa atong kaugalingon batok sa panglimbong.” Basaha ang Proverbio 22:3.

Ang Bantayanang Torre Agos. 1

“Tungod kay ang katawhan nabahinbahin pag-ayo, nagtuo ang uban nga ang bugtong paagi aron makab-ot ang kalinaw sa kalibotan maoy pinaagi sa usa ka tibuok-kalibotang kagamhanan. Nagtuo ka ba nga posible kini? [Tugoting motubag. Dayon basaha ang Daniel 2:44.] Kining magasina naghisgot kon unsay gipalampos sa Gingharian sa Diyos karon ug kon sa unsang paagi ipatungha niini ang kalinaw sa tibuok kalibotan sa di madugay.”

Pagmata! Agos. 8

“Kitang tanan maguol kon makabati kita nga gipahimuslan ang mga bata. Tingali nahibulong ka, ‘May pagtagad ba gayod ang Diyos?’ [Tugoting motubag. Dayon basaha ang Salmo 72:12-14.] Kining artikuloha naghisgot kon unsay pagbati sa Diyos mahitungod sa mga bata ug kon sa unsang paagi sa di madugay iyang ipahinabo ang permanenteng kahupayan sa tanang gidaogdaog.”