‘Magmaokupado Kaayo’ sa Imong Ministeryo
1 Sa dihang atong mabasahan nga si apostol Pablo nagtrabaho sa pagpanghimog tolda samtang didto sa Corinto, makahinapos tingali kita nga kini naglimite sa iyang kahigayonan sa pagsangyaw. Apan, ang Buhat 18:5 nag-asoy: “Si Pablo okupado kaayo sa pulong, nga nagpamatuod ngadto sa mga Hudiyo nga si Jesus mao ang Kristo.” Nganong si Pablo okupado man kaayo sa buluhatong pagsangyaw? Bisan tuod daghan diha sa Corinto ang nahimo nang mga magtutuo, gipanghimatud-an sa Ginoo nga aduna pay daghang mahimong mga tinun-an sa maong siyudad. (Buh. 18:8-11) Kita ba adunay susamang katarongan nga magmaokupado kaayo diha sa atong ministeryo? Oo. Adunay daghan pang mga tawo nga makaplagan ug matudloan sa kamatuoran.
2 Gugola ang Dugang Panahon sa Pag-alagad Sulod sa Abril: Lagmit imong tumong nga magmapuliki sa pagsangyaw sa maayong balita kada bulan. Apan adunay pipila ka bulan nga ilabinang nanginahanglan nga kita ‘magmaokupado kaayo’ niining buluhatona. Kini naglakip sa bulan sa Abril, ilabina kay ang atong espesyal nga kampanya sa brosyur nga Padayon sa Pagbantay! magpadayon hangtod sa Abril 17. Motugot ba ang imong mga kahimtang sa pag-oksilyare payunir o sa pagpauswag sa imong kalihokan diha sa ministeryo niining bulana? Daghan niadtong mihimo niana ang dagayang gipanalanginan. (2 Cor. 9:6) Kon ginahimo nimo ang imo gayong maarangan, hinumdomi nga si Jehova nahimuot sa imong tibuok-kalag nga pag-alagad. (Luc. 21:2-4) Bisag unsa pay imong mga kahimtang, himoang tumong nga ‘magmaokupado kaayo’ diha sa imong ministeryo sulod sa Abril ug Mayo. Ug ayaw kalimot sa paghatag sa imong taho sa pag-alagad sa kanataran sa kataposan sa bulan.
3 Duawa ang mga Bag-ohan nga Nakatambong sa Memoryal: Dinhi sa Pilipinas sa miaging tuig, ang nanambong sa Memoryal maoy 438,418. Ang total nga tumatambong niining tuiga mahibaloan ra unya. Bisan pa niana, gipaila sa mga taho nga dunay talagsaong kahigayonan alang sa dakong “pagpangani.” (Mat. 9:37, 38) Busa, sa sayong maarangan, hikaya ang pagduaw sa mga interesado nga nakatambong sa Memoryal sa miaging Marso 24 aron buligan sila sa espirituwal. Ang pag-unyaunya sa maong mga duaw magtugot sa ‘usa nga daotan sa pagsakmit sa napugas nga pulong sa gingharian diha sa ilang mga kasingkasing.’ (Mat. 13:19) Ang pagduaw gilayon magpakita nga ikaw “okupado kaayo” sa imong ministeryo.
4 Padayong Tabangi ang mga Di-aktibo: Kinahanglan hikayon sa mga ansiyano ang pagduaw sa mga di-aktibo sa dili pa matapos ang Abril aron dasigon sila sa pagpakig-ambit diha sa ministeryo kon motugot ang ilang mga kahimtang. Ang mga ansiyano maningkamot sa pagtino sa natagong hinungdan sa problema sa maong tawo ug kon unsa ang labing maayong paagi sa pagtabang kaniya nga magmaaktibo pag-usab sa pag-alagad kang Jehova. Kining maong mahigugmaong tabang nagpakita nga ang mga ansiyano seryoso sa ilang responsabilidad ingong mga magbalantay sa “panon sa Diyos.” (1 Ped. 5:2; Buh. 20:28) Maoy among paglaom nga ang pipila kanila magmaaktibo pag-usab diha sa ministeryo sa kanataran sulod niining espesyal nga bulan sa Abril.
5 Tabangi ang Mas Daghan pa nga Mahimong Di-bawtismadong mga Magmamantala: Kuwalipikado na ba ang imong mga anak ingong bag-ong mga magmamantala sa maayong balita? Komosta ang uban nga imong ginatun-an sa Bibliya? Kon sila maaprobahan sa mga ansiyano, dili ba ang Abril usa ka maayong panahon alang kanila sa pagsugod sa pagsangyaw? Kon ang usa ka tawo nakahimo nag pag-uswag ug nakatuon na sa brosyur nga Gikinahanglan ug sa librong Kahibalo, ang pagtuon sa Bibliya mahimong ipadayon sa librong Simbaha ang Diyos. Ang imong tumong mao ang pagtabang sa ginatun-an nga makabaton ug mas dakong pagsabot sa kamatuoran, nga mahimong kuwalipikado ingong di-bawtismadong magmamantala, ug mahimong dedikado ug bawtismado nga Saksi ni Jehova.—Efe. 3:17-19; 1 Tim. 1:12; 1 Ped. 3:21.
6 Ang imong mapinadayonon ug tiunay nga interes sa imong mga ginatun-an sa Bibliya mahimong makatabang kanila sa ngadtongadto sa pagsagop gayod sa kamatuoran. Usa ka Saksi ang nakahibalag ug tigulangong magtiayon nga kinasingkasing nga miuyon sa pagtuon sa Bibliya. Apan gioktaba sa maong magtiayon ang pagtuon sa tulo ka sagunson nga mga semana. Sa kadugayan nasugdan ra ang pagtuon. Dayon, ang magtiayon nagkanselar sa pagtuon halos kada laing semana. Apan, sa kataposan ang asawa miuswag hangtod nga siya nabawtismohan. “Human siya mabawtismohi,” ang igsoong lalaki nahinumdom, “ang iyang mga mata napuno sa mga luha sa kalipay, nga nagpatunghag mga luha sa kalipay sa akong asawa ug kanako.” Oo, ang pagkahimong “okupado kaayo” sa maayong balita makahatag ug dakong kalipay!
7 Ang tagna sa Bibliya ug ang mga hitabo sa kalibotan nagpaila nga kita nagkinabuhi sa naghinapos na gayod nga yugto sa panahon sa kataposan. Karon na ang panahon nga magpadayon sa pagbantay, nga ‘magmaokupado kaayo’ sa pagpahibalo sa maayong balita ngadto sa uban. Aduna kita ing talagsaong instrumento sa pagtabang kanato sa paghimo niini diha sa espesyal nga brosyur nga Padayon sa Pagbantay! Gamita kana sa maalamong paagi diha sa imong ministeryo. Si apostol Pablo naghatag ug pasalig nga ang maong paghago sa tino “dili makawang may kalabotan sa Ginoo.”—1 Cor. 15:58.