Pangutana

◼ Unsa ang labing maayong paagi sa paghatag ug mga amot alang sa kaayohan sa mga kaigsoonan nga nanginahanglan sa ubang mga nasod?

Usahay, makadungog kita bahin sa atong mga kaigsoonan sa ubang nasod nga nanginahanglan sa materyal tungod sa paglutos, katalagman, o uban pang malisod nga mga kahimtang. Ang ubang mga igsoon natukmod sa pagpadalag mga salapi nga deretso ngadto sa mga sangang buhatan sa maong mga nasod. Himoon tingali ang usa ka hangyo nga ang salapi gamiton sa pagtabang sa usa ka tawo, usa ka kongregasyon, o sa usa ka espesipikong proyekto nga gitukod.—2 Cor. 8:1-4.

Bisan tuod dalayegon ang maong mahigugmaong kahingawa alang sa mga isigkamagtutuo, kasagaran adunay mga panginahanglan nga mas dinalian kay nianang gihunahuna sa nagpadala ug amot. Sa pipila ka kahimtang, ang espesipikong panginahanglan nga buot tabangan sa nag-amot naatiman na. Siyempre, makasalig kita nga kon dunay ipadala nga mga amot ngadto sa atong lokal nga sangang buhatan alang sa tibuok-kalibotang buluhaton, sa Kingdom Hall Fund, o sa mga hinabang alang sa nakaagom ug katalagman, ang gidonar nga mga pondong salapi gamiton sumala sa gihangyo sa naghatag ug amot.

Ang tanang sanga gibansay na pag-ayo sa pagsanong dayon sa wala-damhang mga panginahanglan sa mga igsoon. Sa tanang kahimtang, ang sanga magpahibalo kanunay sa Nagamandong Lawas maylabot nianang butanga. Kon gikinahanglan ang dugang tabang, ang Nagamandong Lawas mahimong maghangyo sa kasikbit nga mga sanga sa pagtabang o ang mga pondong salapi mahimong ipadala nga deretso gikan sa hedkuwarter.—2 Cor. 8:14, 15.

Busa, ang tanang amot alang sa tibuok-kalibotang buluhaton, mga proyekto sa pagpanukod sa ubang mga nasod, o mga hinabang para sa nakaagom ug katalagman angayng ipadala ngadto sa sangang buhatan diha sa nasod nga imong gipuy-an, pinaagi man sa kongregasyon o deretso. Niining paagiha, ang “matinumanon ug maalamong ulipon,” pinaagi sa organisasyonal nga mga kahikayan nga gitukod sa Nagamandong Lawas, nag-atiman sa mga panginahanglan sa mga kaigsoonan sa tibuok kalibotan diha sa hapsay nga paagi.—Mat. 24:45-47; 1 Cor. 14:33, 40.