Ang Paglahutay Ginagantihan

¹ “Pinaagi sa paglahutay sa inyong bahin mabatonan ninyo ang inyong mga kalag.” (Luc. 21:19) Kanang mga pulonga, nga maoy bahin sa tagna ni Jesus mahitungod sa “kataposan sa sistema sa mga butang,” nagpatin-aw nga aron atong mahuptan ang atong integridad, kita kinahanglang andam sa pag-atubang sa daghang pagsulay. Apan pinaagi sa kusog ni Jehova, ang matag usa kanato ‘makalahutay hangtod sa kataposan’ ug “maluwas.”​—Mat. 24:​3, 13; Filip. 4:13.

² Ang paglutos, mga problema sa panglawas, kalisod sa panalapi, ug emosyonal nga kasakit makapahimo sa matag adlaw nga usa ka pagsulay. Apan, dili nato angayng kalimtan nga si Satanas mosulay sa pagbungkag sa atong integridad kang Jehova. Ang matag adlaw nga kita magpabiling maunongon sa atong Amahan maoy laing adlaw nga kita nakaambit sa paghatag ug tubag sa hagit sa Tigtamay. Pagkamakapatagbaw ang pagkahibalo nga ang atong “mga luha” sa dihang nakasinati ug pagsulay dili makalimtan! Bililhon kini ngadto kang Jehova, ug ang atong integridad makapalipay sa iyang kasingkasing!​—Sal. 56:8; Prov. 27:11.

³ Nalunsay Pinaagi sa mga Pagsulay: Pinaagi sa kasakitan mabutyag ang kahuyangan sa pagtuo o depekto sa personalidad, sama sa garbo o kawalay-pailob. Inay kay mosulay sa paglingkawas o pagtapos sa mga pagsulay sa di-kasulatanhong paagi, angay natong patalinghogan ang tambag sa Pulong sa Diyos nga “ipatapos sa pagkamainantoson ang buluhaton niini.” Ngano man? Tungod kay ang matinumanong paglahutay sa mga pagsulay motabang kanato nga mahimong “bug-os ug maayo sa tanang bahin.” (Sant. 1:2-4) Ang pagkamalahutayon motabang kanato sa pag-ugmad sa bililhong mga hiyas, sama sa pagkamakataronganon, empatiya, ug kaluoy.​—Roma 12:15.

⁴ Sinulayang Kalidad sa Pagtuo: Sa dihang molahutay kita sa mga pagsulay, atong maangkon ang sinulayang kalidad sa pagtuo nga dakog bili sa mga mata sa Diyos. (1 Ped. 1:​6, 7) Ang maong pagtuo magsangkap kanato aron magpabiling malig-on latas sa umaabot nga mga pagsulay. Dugang pa, atong masabtan nga kita giuyonan sa Diyos, ug kini magpalig-on sa atong paglaom, nga magpahimo niining mas tinuod alang kanato.​—Roma 5:3-5.

⁵ Ang labing maayong ganti sa pagkamalahutayon gipasiugda sa Santiago 1:​12, nga nagkanayon: “Malipayon ang tawo nga nagpadayon sa pag-antos sa pagsulay, tungod kay sa pagkahimong inuyonan iyang madawat ang purongpurong sa kinabuhi.” Busa, huptan natong malig-on ang atong debosyon ngadto kang Jehova, nga masaligon nga siya dagayang moganti “niadtong nagpadayon sa paghigugma kaniya.”

Bahin 2—Pagdumalag Mauswagong mga Pagtuon sa Bibliya

Pagpangandam sa Pagdumala sa Pagtuon

¹ Ang epektibong pagpanudlo sa usa ka pagtuon sa Bibliya naglangkit ug labaw pa kay sa paghisgot lamang sa materyal ug pagsusi sa gisitar nga mga teksto. Kinahanglan natong ipresentar ang impormasyon sa paagi nga makatandog sa kasingkasing sa estudyante. Kini nagkinahanglan ug bug-os nga pagpangandam nga anaa sa hunahuna ang kaayohan sa estudyante.​—Prov. 15:28.

² Kon Unsaon sa Pagpangandam: Sugdi pinaagi sa pag-ampo kang Jehova mahitungod sa maong tawo ug sa iyang mga panginahanglan. Hangyoa si Jehova sa pagtabang kanimo nga maabot ang kasingkasing sa estudyante. (Col. 1:​9, 10) Aron tin-awng masabtan ang tema, pamalandonga kadiyot ang ulohan sa kapitulo o leksiyon, ang mga sub-ulohan, ug ang bisan unsang mga hulagway. Pangutan-a ang imong kaugalingon, ‘Unsa ba gayod ang pangunang tumong sa materyal?’ Kini motabang kanimo sa pagpasiugda sa pangunang mga punto samtang dumalahon nimo ang pagtuon.

³ Sublia pag-ayo ang materyal parapo por parapo. Puntinga ang mga tubag sa pinatik nga mga pangutana, nga markahan lamang ang yawing mga pulong ug mga prase. Analisaha kon sa unsang paagi nalangkit ang gisitar nga mga teksto ngadto sa pangunang punto sa parapo, ug hukmi kon unsang mga tekstoha ang basahon panahon sa pagtuon. Makaplagan tingali nimo nga mapuslanon ang paghimog mugbong mga nota diha sa panaplin sa publikasyon. Angayng tin-aw nga masabtan sa estudyante nga ang iyang nakat-onan maoy gikan sa Pulong sa Diyos.​—1 Tes. 2:13.

⁴ Ipahiuyon ang Leksiyon sa Panginahanglan sa Estudyante: Sunod, hisgoti ang leksiyon nga anaa sa hunahuna ang partikular nga estudyante. Hunahunaa daan ang mga pangutana nga iya tingaling isukna ug ang mga punto nga hayan malisdan siya sa pagsabot o pagdawat. Pangutan-a ang imong kaugalingon: ‘Unsay iyang kinahanglang masabtan o buhaton aron makahimo siyag espirituwal nga pag-uswag? Sa unsang paagi akong maabot ang iyang kasingkasing?’ Dayon ipasibo ang imong pagpanudlo sumala sa kahimtang. Usahay, kinahanglan tingali nimong mag-andam ug ilustrasyon, pagpatin-aw, o sunodsunod nga mga pangutana aron matabangan ang estudyante sa pagsabot sa kahulogan sa usa ka punto o teksto. (Neh. 8:8) Apan ayaw pagdugang ug impormasyon nga wala kinahanglana aron mapalutaw ang tema. Ang mubong repaso pagkahuman sa pagtuon makatabang kaniya sa paghinumdom sa pangunang mga punto.

⁵ Pagkamalipayon nato sa dihang ang mga bag-ohan mopatunghag matarong nga bunga alang sa kadayeganan ni Jehova! (Filip. 1:11) Aron matabangan sila nga makab-ot ang maong tumong, pangandam pag-ayo sa matag higayon nga modumala kag pagtuon sa Bibliya.