Pagsangyaw sa Gingharian—Usa ka Bililhong Pribilehiyo

¹ Kada adlaw, bilyonbilyong molupyo sa yuta ang nagpahimulos sa dagayang tagana ni Jehova alang sa kinabuhi. (Mat. 5:45) Apan diyutay lang kaayo ang nagpahimulos sa talagsaong kahigayonan sa pagpakitag pagpabili sa ilang Maglalalang pinaagi sa pagsangyaw sa maayong balita sa Gingharian sa Diyos. (Mat. 24:14) Unsa ka dako ang imong pagmahal ning maong bililhong pribilehiyo?

² Ang pagsangyaw sa Gingharian magpasidungog sa Diyos ug maghatag ug paglaom ug kalinaw sa mga tawo nga nagmagul-anon tungod sa gubot nga mga panahon karon. (Heb. 13:15) Alang niadtong mosanong sa mensahe, kini nagkahulogan ug kinabuhing walay kataposan. (Juan 17:3) Unsang sekular nga karera o propesyon ang mohatag nianang mga benepisyoha? Gipakita ni apostol Pablo ang iyang pagpabili sa ministeryo diha sa paagi sa iyang pagtuman niana. Giisip niya kana ingong usa ka bahandi.—Buh. 20:20, 21, 24; 2 Cor. 4:1, 7.

³ Pagmahal sa Atong Bililhong Pribilehiyo: Ang usa ka paagi nga atong gipakita ang atong pagpabili sa pribilehiyo sa pagsangyaw mao ang paghatag ug pagtagad sa kalidad sa atong pag-alagad. Nagagahin ba kitag panahon sa pagpangandam ug presentasyon nga makatandog sa kasingkasing sa atong gisangyawan? Mapauswag ba nato ang atong katakos sa paggamit sa Kasulatan ug sa pagpangatarongan sa mga tawo? Bug-os ba natong gikobrehan ang giasayn kanato nga teritoryo? Makamao ba kitang mosugod ug modumala ug pagtuon sa Bibliya? Sama sa matinumanong mga Kristohanon kaniadto ug karon, kita gitukmod sa hustong panglantaw niining buluhatona, ug atong gimahal ang atong pribilehiyo.—Mat. 25:14-23.

⁴ Kon ato nang gibati ang mga epekto sa pagkatigulang, dili maayong panglawas, o uban pang kalisdanan, makapahupay gayod ang pagkasayod nga ang atong masibotong mga paningkamot sa pagpakigbahin diha sa ministeryo gipabilhan pag-ayo. Gipasaligan kita sa Pulong sa Diyos nga gipabilhan ni Jehova ang maong mga paningkamot sa pag-alagad kaniya, bisan kadtong mga paningkamot nga morag dili kaayo dalayegon para sa uban.—Luc. 21:1-4.

⁵ Ang pagsangyaw sa Gingharian makahatag ug dakong katagbawan. Usa ka 92-anyos nga sister miingon: “Pagkadakong pribilehiyo sa pagpalandong sa kapin sa 80 ka tuig sa dedikadong pag-alagad sa Diyos—nga walay pagbasol! Kon ako pang magamit pag-usab ang akong kinabuhi, ako kining gamiton sa mao gihapong paagi tungod kay, sa tinuoray, ‘ang mahigugmaong-kalulot sa Diyos mas maayo pa kay sa kinabuhi.’” (Sal. 63:3) Hinaot mahalon usab nato kining bililhong pribilehiyo gikan sa Diyos—ang buluhatong pagsangyaw sa Gingharian.

Bahin 11—Pagdumalag Mauswagong mga Pagtuon sa Bibliya

Pagtabang sa Bag-ong mga Magmamantala sa Paghimog mga Balikduaw

¹ Sa dihang ang usa ka ginatun-an sa Bibliya mosugod sa pagpakigbahin sa buluhatong pagsangyaw, makahibalag siyag mga tawo nga magpakitag interes sa maayong balita. Sa unsang paagi atong matabangan ang bag-ong magmamantala sa paghimog epektibong mga balikduaw ug sa pag-ugmad sa interes nga iyang makaplagan?

² Ang pagpangandam alang sa pagbalikduaw magsugod sa unang duaw. Dasiga ang bag-ong magmamantala nga magpakitag sinserong interes sa iyang mga gikaestorya. (Filip. 2:4) Anam-anam nga bansaya ang bag-ong magmamantala sa pag-agda sa mga tagbalay nga ipahayag ang ilang mga hunahuna, pagpaminaw sa ilang mga komento, ug pagmatikod sa mga butang nga ilang gikabalak-an. Sa dihang dunay magpakitag interes, ipasulat sa bag-ong magmamantala ang hinungdanong mga impormasyon bahin sa maong duaw. Gamita ang maong mga impormasyon sa pagtabang kaniya sa pagplano sa umaabot nga mga panaghisgot.

³ Pagpangandam sa Pagbalikduaw: Repasoha ang inyong naestoryahan sa unang duaw, ug ipakita sa bag-ong magmamantala kon unsaon pagpili ug usa ka bahin sa mensahe sa Gingharian nga makadani sa tagbalay. (1 Cor. 9:19-23) Andama ninyong duha ang mubong presentasyon nga mogamit sa usa ka teksto sa Bibliya uban sa usa ka parapo diha sa tun-anang publikasyon. Dugang pa, pag-andam ug usa ka pangutana nga mahimong ipatungha sa kataposan sa panaghisgot aron mao kiniy himoong basehanan alang sa sunod nga pagduaw. Ipakita sa bag-ong magmamantala kon sa unsang paagi madugangan ang kahibalo sa maong tawo bahin sa Pulong sa Diyos sa matag sunod nga pagduaw.

⁴ Mapuslanon usab nga tudloan ang bag-ong magmamantala ug usa ka yanong introduksiyon. Human komostaha ang tagbalay, siya makaingon: “Nagustohan nako ang atong panaghisgot sa miagi, ug mibalik mi aron ipaambit kanimo ang lain pang impormasyon sa Bibliya bahin sa [isulti ang ulohan].” Tingali kinahanglan usab nimong ipakita sa bag-ong magmamantala kon unsay angayng himoon kon laing tawo ang maabtan sa balay.

⁵ Makugihong Pagpaloap: Dasiga ang bag-ong magmamantala nga magmakugihon sa pagbalik dayon sa tanang nagpakitag interes. Kinahanglan tingaling mobalik sa makadaghan aron maabtan ang mga tawo sa balay. Tudloi ang bag-ong magmamantala kon unsaon paghimog kasabotan sa pagbalikduaw, ug tabangi siya nga masabtan ang panginahanglan sa pagbalik sumala sa gisaad. (Mat. 5:37) Bansaya ang bag-ong magmamantala nga mahimong maluloton, may konsiderasyon, ug matinahoron samtang pangitaon niya ang samag-karnero nga mga tawo ug ugmaron ang ilang interes.—Tito 3:2.