Gamita ang Imong Panahon sa Maalamong Paagi

¹ Ang atong tinguha sa pagpahimuot kang Jehova magtukmod kanato sa pagsentro sa atong kinabuhi diha sa espirituwal nga mga kalihokan. Ang iyang Pulong nagtudlo kanato nga ‘padayong unahon sa pagpangita ang gingharian’ ug ‘tinoon ang mas hinungdanong mga butang.’ (Mat. 6:33; Filip. 1:10) Sa unsang paagi makapalit kitag panahon alang sa mga interes sa Gingharian ug ikabutang nato ang dili-kaayo hinungdanong mga kalihokan sa ikaduhang dapit?—Efe. 5:15-17.

² Unaha ang mga Kalihokan sa Gingharian: Ieskedyul ang imong panahon aron dili kini mausik sa dili-kaayo hinungdanong mga kalihokan. Sugdan sa uban ang matag bulan pinaagi sa pag-eskedyul ug tinong mga panahon alang sa ministeryo sa kanataran diha sa ilang kalendaryo. Dayon paneguroon nila nga ang maong mga eskedyul dili mabalda sa ubang mga butang. Ingon usab niana ang atong buhaton aron mapalit ang panahon alang sa mga tigom, personal nga pagtuon, ug mga kombensiyon. Daghan ang adunay eskedyul sa adlaw-adlaw nga kalihokan nga magsugod o matapos pinaagig pagbasa sa Bibliya. Pag-eskedyul ug tinong panahon alang sa matag hinungdanong kalihokan, ug ayawg tugoti ang ubang mga butang sa pagbalda niana sa walay hinungdan.—Eccl. 3:1; 1 Cor. 14:40.

³ Ayawg Gamita sa Bug-os ang Kalibotan: Sa pipila ka nasod, ang esports, kalingawan, paglingawlingaw, pasatiempo, ug uban pang mga kalihokan dali rang mabatonan. Daghan ang mogugol ug sobrang panahon sa pagtan-awg telebisyon o paggamit ug mga kompiyuter. Apan, ang paggugol ug daghang panahon alang sa kalingawan ug sa bag-ong mga kahimanan nga gitanyag niining kalibotana mosangko gayod sa kahigawad. (1 Juan 2:15-17) Busa ang Kasulatan nag-awhag kanato nga dili gamiton sa bug-os ang kalibotan. (1 Cor. 7:31) Pinaagi sa pagsunod nianang maalamong tambag, imong ikapakita kang Jehova nga ang iyang pagsimba maoy imong giuna sa imong kinabuhi.—Mat. 6:19-21.

⁴ Hapit nang matapos kining presenteng sistema. Kadtong mag-una sa mga interes sa Gingharian magmalipayon ug makaangkon sa pag-uyon sa Diyos. (Prov. 8:32-35; Sant. 1:25) Busa, hinaot gamiton nato kining bililhong kabtangan, ang atong panahon, sa maalamong paagi.

Bahin 12: Pagdumalag Mauswagong mga Pagtuon sa Bibliya

Pagtabang sa mga Ginatun-an sa Pagsugod ug Pagdumalag mga Pagtuon sa Bibliya

¹ Sa dihang ang atong mga ginatun-an sa Bibliya mosugod na sa pagpakigbahin sa ministeryo sa kanataran, sila lagmit mahadlok nga maghunahuna bahin sa pagsugod ug pagdumala sa kaugalingon nilang mga pagtuon sa Bibliya. Sa unsang paagi matabangan nato sila nga makaugmad ug positibong tinamdan maylabot niining hinungdanong bahin sa atong ministeryo?—Mat. 24:14; 28:19, 20.

² Sa dihang kuwalipikado na ang ginatun-an sa Bibliya nga mahimong di-bawtismadong magmamantala, lagmit napahimuslan na niya pag-ayo ang Teokratikanhong Tunghaan sa Ministeryo. Ang pagbansay nga iyang nadawat bahin sa pagpangandam ug pagpresentar sa asaynment motabang kaniya sa pag-ugmad ug mga kahanas sa pagpanudlo nga gikinahanglan sa “usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.”—2 Tim. 2:15.

³ Panudlo Pinaagi sa Imong Panig-ingnan: Gibansay ni Jesus ang iyang mga tinun-an pinaagi sa paghatag ug tin-awng instruksiyon ug sa paghatag ug maayong panig-ingnan. Siya miingon: “Ang matag usa nga hingpit nga natudloan mahisama sa iyang magtutudlo.” (Luc. 6:40) Hinungdanon gayod nga imong sundon si Jesus pinaagi sa paghatag ug maayong panig-ingnan diha sa imong ministeryo. Samtang matikdan sa imong ginatun-an ang imong panig-ingnan diha sa ministeryo, iyang masabtan nga ang tumong sa paghimog mga balikduaw mao ang pagsugod ug mga pagtuon sa Bibliya.

⁴ Ipatin-aw ngadto sa ginatun-an nga sa dihang motanyag kitag pagtuon sa Bibliya, sagad dili na kinahanglang isaysay nato pag-ayo ang kahikayan sa pagtuon. Kasagaran nga labing maayo ang pagpasundayag lamang sa pagtuon ginamit ang usa o duha tingali ka parapo gikan sa usa ka tun-anang publikasyon. Ang mga sugyot nga makatabang sa paghimo niini anaa sa panid 4 sa Agosto 2005 nga Atong Ministeryo sa Gingharian ug sa panid 6 sa Mayo 2002 nga Atong Ministeryo sa Gingharian.

⁵ Kon nahiangay, dapita ang ginatun-an sa pag-uban kanimo o sa laing eksperyensiyadong magmamantala ngadto sa uban pang mga ginatun-an sa Bibliya. Mahimo siyang mokomento bahin sa usa ka parapo o usa ka yawing teksto. Sa ingon, pinaagig pagpaniid, ang ginatun-an daghag makat-onan bahin sa pagdumalag mauswagong mga pagtuon sa Bibliya. (Prov. 27:17; 2 Tim. 2:2) Dayega siya, ug hisgoti uban kaniya kon sa unsang paagi siya mahimong mouswag.

⁶ Ang pagbansay sa bag-ong mga magmamantala nga mahimong mga magtutudlo sa Pulong sa Diyos magsangkap kanila alang sa “maayong buhat” sa pagsugod ug pagdumalag kaugalingon nilang mga pagtuon. (2 Tim. 3:17) Makapalipay gayod ang pagbuhat duyog kanila sa pagpaabot sa mahigugmaong imbitasyon: “Si bisan kinsa nga may tinguha paimna sa tubig sa kinabuhi nga walay bayad”!—Pin. 22:17.