Pagsugod ug mga Pagtuon sa Bibliya Diha sa Pultahan ug Pinaagig Telepono

1, 2. Sa unsang paagi atong ikapahiuyon ang atong programa sa pagtuon sa Bibliya aron matabangan ang puliki nga mga tawo?

¹ Puliki ang mga tawo karon. Bisan pa niana, daghan ang nagpakitag interes sa espirituwal nga mga butang. Sa unsang paagi atong matabangan sila aron matagbaw ang ilang espirituwal nga panginahanglan? (Mat. 5:3) Daghang magmamantala ang nakahimo sa pagtuon sa Bibliya uban sa mga tawo diha sa ilang pultahan o pinaagig telepono. Imo bang mapalapad ang imong ministeryo niining paagiha?

² Aron makasugod ug mga pagtuon sa Bibliya, kinahanglan kitang andam sa pagpasundayag sa pagtuon sa Bibliya sa dihang may kahigayonan. Sa unsang paagi ug asang dapita mahimo kini?

3. Nganong atong ipasundayag dayon ang pagtuon sa Bibliya sa unang duaw, ug sa unsang paagi himoon kini?

³ Diha sa Pultahan: Sa dihang makahibalag kag tawo nga andam makighisgot bahin sa Bibliya, paklia lang dayon ang parapo nga giandam na nimong daan, sama sa unang parapo sa leksiyon 1 sa brosyur nga Gikinahanglan, ug sugdi dayon ang pagtuon. Basaha ang parapo, isukna ang pangutana, ug hisgoti ang usa o duha ka gisitar nga mga teksto. Kasagarang mahimo kini diha mismo sa pultahan sulod lang sa lima ngadto sa napulo ka minuto. Kon ganahan ang maong tawo sa inyong panaghisgot, hikaya nga hisgotan ninyo ang ikaduhang parapo o ang duha ka nahibiling mga parapo sa sunod higayon.—Ang dugang mga sugyot bahin sa paggamit ug direktang paagi sa pagsugod ug mga pagtuon makita sa Mayo 2002 nga Atong Ministeryo sa Gingharian, p. 6.

4. Sa unsang paagi atong masugdan ang usa ka pagtuon sa Bibliya diha sa pultahan sa dihang mohimog mga balikduaw?

⁴ Ang susamang paagi mahimong gamiton sa pagsugod ug mga pagtuon sa Bibliya sa dihang mobalikduaw. Pananglitan, mahimo nimong ipakita ang brosyur nga Gikinahanglan ug ipasiugda ang ngalan sa Diyos, nga gamiton ang leksiyon 2, mga parapo 1-2. Sa sunod duaw, imong mahisgotan kon unsay giingon sa Bibliya bahin sa mga hiyas ni Jehova, nga gamiton ang mga parapo 3-4. Alang sa mosunod nga panaghisgot, mahisgotan nimo ang mga parapo 5-6 ug ang hulagway diha sa panid 5 aron ipasiugda kon sa unsang paagi ang pagtuon sa Bibliya makatabang kanato nga mailhan si Jehova. Mahimo kining tanan samtang nagtindog lang diha sa pultahan.

5, 6. (a) Nganong ang pipila ka tawo mas gustong magtuon sa Bibliya pinaagig telepono? (b) Unsang paagi ang atong magamit sa dihang magtanyag ug pagtuon pinaagig telepono?

⁵ Pinaagig Telepono: Ang pipila ka tawo mas andam tingaling motuon sa Bibliya pinaagig telepono kay sa atubangay nga pagtuon. Tagda ang mosunod nga kasinatian: Samtang namalaybalay, nahimamat sa usa ka sister ang batan-ong babaye nga maoy usa ka inahan ug puliki nga propesyonal. Sa dihang wala maabti pag-usab sa sister ang maong babaye sa iyang balay, nakahukom siya sa pagtawag kaniya sa telepono. Miingon ang batan-ong babaye nga wala gayod siyay panahon sa pagtuon sa Bibliya. Ang sister miingon: “Sa 10 o 15 minutos, makakat-on kag bag-ong mga butang, bisan sa telepono lang.” “Aw, kon sa telepono lang, OK!” mitubag ang maong babaye. Wala madugay, usa ka regular nga pagtuon ang gidumala pinaagig telepono.

⁶ Ang pipila ba sa inyong ginaduaw andam magtuon pinaagig telepono? Masulayan nimo ang paagi nga gihubit di pa dugay, o sa yano makaingon ka: “Kon gusto nimo, mahimo natong tun-an ang Bibliya pinaagig telepono. Mopabor ka ba niana?” Pinaagi sa pagpahiuyon sa atong programa sa pagtuon sa Bibliya ngadto sa nagkalainlaing mga kahimtang sa uban, matabangan nato sila nga “makaplagan ang mismong kahibalo sa Diyos.”—Prov. 2:5; 1 Cor. 9:23.

Kon Unsay Isulti Bahin sa mga Magasin

Ang Bantayanang Torre Agos. 15

“Human sa usa ka makapasubong kamatayon, daghan ang nahibulong kon unsa kahay mahitabo sa dihang mamatay. Sa imong hunahuna, masabtan kaha nato kon unsa ang kamatayon? [Patubaga.] Kining magasina nagpatin-aw kon unsay giingon sa Bibliya bahin sa kahimtang sa mga patay. Gihisgotan usab niini ang saad sa Diyos nga banhawon ang atong namatay nga mga minahal.” Basaha ang Juan 5:28, 29.

Pagmata! Agos. 22

“Nahibalo ka ba nga ang turismo gitawag ug numero unong agalon sa kalibotan? [Patubaga.] Ang pag-uswag sa turismo nagdalag mga kaayohan ug mga suliran usab. Kining magasina nagsusi sa mga kaayohan ug kadaot nga gipahinabo sa modernong industriya sa turismo. Naghatag usab kinig pipila ka mapuslanong mga sugyot alang sa mga tigbiyahe sa lainlaing mga nasod.”

Ang Bantayanang Torre Sept. 1

“Niining kalibotana karon, ang pagkamaunongon maoy usa ka hiyas nga subsob ginadayeg apan wala buhata. Dili ba dalayegon kon mas daghang tawo ang mahisama sa usa ka higala nga gihubit dinhi? [Basaha ang Proverbio 17:17. Unya patubaga.] Kining magasina naghisgot sa mga kaayohan nga ikahatag sa pagkahimong maunongon ngadto sa atong pamilya ug mga higala.”

Pagmata! Sept. 8

“Tingali nahingangha ka bahin sa pagtinabangay nga naglungtad diha sa kinaiyahan. [Hisgoti ang usa sa gisitar nga mga pananglitan diha sa artikulo.] Dili ba makapaguol nga wala kitay nakitang pagtinabangay taliwala sa mga tawo? [Patubaga.] Kining magasina nagpatin-aw kon sa unsang paagi ipadangat sa Diyos ang kalinaw ug kaharmonya dinhi sa atong yuta.” Basaha ang Isaias 11:9.