Bahin 3​—Pagdumalag Mauswagong mga Pagtuon sa Bibliya

Epektibong Paggamit sa Kasulatan

1. Nganong angay natong ipasiugda ang Kasulatan sa dihang magdumala ug mga pagtuon sa Bibliya?

¹ Ang atong tuyo sa pagdumalag mga pagtuon sa Bibliya mao ang “paghimog mga tinun-an” pinaagi sa pagtabang sa mga tawo sa pagsabot ug pagdawat sa mga pagtulon-an sa Pulong sa Diyos ug sa pagpadapat niana sa ilang mga kinabuhi. (Mat. 28:​19, 20; 1 Tes. 2:13) Busa, ang pagtuon kinahanglang masentro sa Kasulatan. Sa sinugdan, mapuslanon tingali ang pagtudlo sa mga ginatun-an kon unsaon sa pagpangita sa espesipikong mga teksto diha sa kaugalingon nilang kopya sa Bibliya. Apan, sa unsang paagi atong magamit ang Kasulatan sa pagtabang kanila nga mouswag sa espirituwal?

2. Unsaon nato paghukom kon unsang mga tekstoha sa Bibliya ang angayng basahon ug hisgotan?

² Pagpili ug mga Tekstong Basahonon: Sa imong pagpangandam, tinoa kon sa unsang paagi ang matag teksto nga gisitar diha sa tun-anan mapadapat sa punto nga gihisgotan, ug hukmi kon unsang mga tekstoha ang imong basahon ug hisgotan panahon sa pagtuon. Kasagaran, maayong basahon ang mga teksto nga nagpakitag Kasulatanhong pamatuod sa atong mga tinuohan. Ang mga teksto nga naghatag ug nagpaluyong impormasyon hayan dili na kinahanglang basahon. Hatagig pagtagad ang mga panginahanglan ug mga kahimtang sa matag ginatun-an.

3. Unsay kaayohan sa paggamit ug mga pangutana, ug sa unsang paagi mahimo nato kini?

³ Paggamit ug mga Pangutana: Imbes ipatin-aw ang mga teksto sa Bibliya ngadto sa ginatun-an, hangyoa siya nga maoy mopatin-aw sa mga teksto kanimo. Matukmod nimo siya sa paghimo niini pinaagi sa mahanasong paggamit ug mga pangutana. Kon tin-aw ang kapadapatan sa teksto, mahimong pangutan-on mo lang siya kon sa unsang paagi ang teksto nagpamatuod sa giingon diha sa parapo. Sa ubang bahin, ang mas espesipikong pangutana o sunodsunod nga mga pangutana basin gikinahanglan aron matabangan ang ginatun-an nga makab-ot ang hustong konklusyon. Kon gikinahanglan ang dugang mga katin-awan, kini angayng himoon human makatubag ang ginatun-an.

4. Unsa ka daghang pagpatin-aw ang gikinahanglan alang sa mga teksto nga atong gibasa?

⁴ Hupti Kining Yano: Ang usa ka hanas nga magpapana sagad nagkinahanglan lamag usa ka pana aron maigo ang ig-anan. Sa samang paagi, ang usa ka hanas nga magtutudlo wala magkinahanglan ug daghang pulong aron mapasiugda ang punto. Iyang ikahatag ang impormasyon sa yano, tin-aw, ug tukma nga paagi. Usahay, kinahanglan tingali nimong manukiduki diha sa Kristohanong mga publikasyon aron masabtan ang usa ka teksto ug ipatin-aw kana sa tukmang paagi. (2 Tim. 2:15) Apan likayi ang pagpatin-aw sa tanang bahin sa matag teksto diha sa pagtuon. Hisgoti lang kon unsay gikinahanglan aron mapasiugda ang punto nga gihisgotan.

5, 6. Sa unsang paagi atong matabangan ang mga ginatun-an sa pagpadapat sa Pulong sa Diyos diha sa ilang kinabuhi, apan unsay angay natong likayan?

⁵ Paghimog Praktikal nga Kapadapatan: Kon nahiangay, tabangi ang ginatun-an sa pagsabot kon sa unsang paagi mapadapat ang mga teksto sa Bibliya ngadto kaniya mismo. Pananglitan, sa dihang hisgotan ang Hebreohanon 10:​24, 25 uban sa ginatun-an nga wala pa makatambong sa Kristohanong mga tigom, makahisgot ka tingali ug usa ka tigom ug dapiton siya sa pagtambong niana. Apan ayaw siyag pugsa. Tugoting ang Pulong sa Diyos maoy motukmod kaniya sa paghimog gikinahanglang aksiyon aron mapahimut-an si Jehova.​—Heb. 4:12.

⁶ Samtang atong tumanon ang sugo sa paghimong mga tinun-an, hinaot atong “ipalambo ang pagkamasinugtanon pinaagi sa pagtuo” pinaagi sa atong epektibong paggamit sa Kasulatan.​—Roma 16:26.

Kon Unsay Isulti Labot sa mga Magasin

Ang Bantayanang Torre Nob. 15

“Kadaghanan sa mga tawo gustong makabaton ug maayong panglawas ug taas nga kinabuhi. Apan kon kana posible, gusto mo bang mabuhi sa walay kataposan? [Tugoting motubag. Dayon basaha ang Juan 17:3.] Kining magasina naghisgot sa saad sa Bibliya bahin sa kinabuhing walay kataposan. Gihisgotan usab niini kon sama sa unsa ang kinabuhi sa dihang matuman na kanang saara.”

Pagmata! Nob. 22

“Sa miaging 20 ka tuig, dakong kaugmaran ang nahimo sa pagsabot ug pagtambal sa AIDS. Bisan pa niana, daghang tawo ang nakadawat gihapon ug sayop nga impormasyon. [Ipakita ang kahon nga “Sayop nga mga Pagtuo Bahin sa AIDS,” ug tugoting mokomento.] Kining magasina naghisgot kon sa unsang paagi ang mga ginikanan makapanalipod sa ilang mga anak.” Basaha ang Deuteronomio 6:​6, 7.

Ang Bantayanang Torre Dis. 1

“Usa ka kinaiya nga nagpalahi sa mga tawo gikan sa mga mananap mao ang katakos sa pag-ila kon unsay husto ug sayop. Ikasubo, daghang tawo ang naghimo ug daotang mga butang. Nganong ingon niana ang nahitabo sa hunahuna mo? [Tugoting motubag. Dayon basaha ang Jeremias 17:9 o Pinadayag 12:9.] Kining magasina naghisgot kon unsay makatabang kanato sa pagkahibalo ug sa pagbuhat kon unsay matarong.”

Pagmata! Dis. 8

“Ang mga pag-uswag sa teknolohiya wala makapausab sa paninugdang panginahanglan sa tawo sa panaghigalaay. Apan nakamatikod ka ba nga ang mga kausaban diha sa katilingban nakapalisod karon sa pag-ugmad ug suod nga panaghigalaay? [Tugoting motubag. Dayon basaha ang Proverbio 18:24.] Kining magasina naghisgot kon sa unsang paagi kita makabaton ug makahupot ug tinuod nga mga higala.”