Kita Adunay Utang sa Uban

¹ Gibati ni apostol Pablo nga iyang obligasyon ang pagsangyaw sa mga tawo. Nahibalo siya nga si Jehova ang naghimog kahikayan aron maluwas ang tanang matang sa mga tawo pinaagi sa bililhong dugo sa Iyang Anak. (1 Tim. 2:3-6) Busa, si Pablo miingon: “Ngadto sa mga Grego ug sa mga Barbaro, sa mga maalamon ug sa mga walay salabotan ako utangan.” Siya maikagon ug makugihong naghago aron mabayran ang iyang utang sa iyang mga isigkatawo pinaagi sa pagpaambit sa maayong balita kanila.—Roma 1:14, 15.

² Sama kang Pablo, ang mga Kristohanon karon matinguhaon nga ipakig-ambit ang maayong balita sa ilang mga silingan sa tanang higayon. Tungod kay ang “dakong kasakitan” tulin nga nagsingabot, ang pagpangita sa matinud-anon-ug-kasingkasing nga mga tawo maoy dinalian. Hinaot ang tiunay nga gugma alang sa mga tawo maoy magtukmod kanato nga magkugi niining nagaluwas-sa-kinabuhi nga buluhaton.—Mat. 24:21; Ezeq. 33:8.

³ Pagbayad sa Atong Utang: Ang pangunang paagi nga ipaabot nato ang maayong balita sa mga tawo maoy pinaagi sa pagsangyaw sa balay-balay. Diha sa mga teritoryo diin daghan ang mga tawong dili maabtan sa ilang mga balay, pinaagi sa paghupot ug tukmang mga rekord ug pagbalik sa lainlaing mga panahon, atong makontak ang mas daghang tawo. (1 Cor. 10:33) Ikapaabot usab nato ang maayong balita sa mga tawo pinaagi sa pagsangyaw diha sa komersiyal nga teritoryo, sa kadalanan, sa mga parke, sa mga parkinganan, ug pagsangyaw pinaagig telepono. Makasukna kita sa atong kaugalingon, ‘Gihimo ko ba ang akong maarangan sa pagpahimulos sa tanang paagi sa pagsangyaw aron ikapaambit ang mensahe sa kinabuhi?’—Mat. 10:11.

⁴ Dulot nga gibati sa usa ka payunir nga iyang responsibilidad nga ipaabot ang maayong balita sa tanang tawo diha sa iyang teritoryo. May usa ka balay nga sirado kanunay ang salimbong sa bentana ug kanunay nga walay tawo. Apan usa ka adlaw niana, sa dihang ang payunir wala magsangyaw, iyang namatikdan ang usa ka kotse sa atubangan niadtong balay nga kanunayng walay tawo. Kay dili gustong masayloan ang maong kahigayonan, siya mitimbre. Usa ka lalaki ang mitubag, ug ang unang kabildohay mitultol sa daghan pang balikduaw pinaagi niadtong maong sister ug iyang bana. Sa kadugayan, ang maong lalaki midawat sa pagtuon sa Bibliya, ug siya bawtismado na karon. Siya mapasalamaton nga ang maong sister mibati nga utangan ug mao nga iyang responsabilidad ang pagsangyaw ngadto sa uban.

⁵ Tungod kay tulin nga nagsingabot ang kataposan, panahon na karon sa pagbayad sa atong utang sa atong isigkatawo pinaagi sa pagpanlimbasog nga kusganon diha sa buluhatong pagsangyaw.—2 Cor. 6:1, 2.

Bahin 10: Pagdumalag Mauswagong mga Pagtuon sa Bibliya

Pagbansay sa mga Ginatun-an Diha sa Balay-Balay nga Ministeryo

¹ Sa dihang modesisyon ang mga ansiyano nga ang usa ka ginatun-an sa Bibliya kuwalipikado na nga mahimong di-bawtismadong magmamantala, siya makasugod pagkuyog sa kongregasyon diha sa publikong pagsangyaw. (Tan-awa ang Organisado Aron Buhaton ang Kabubut-on ni Jehova, p. 79-81.) Sa unsang paagi makatabang kita sa ginatun-an aron makaarang na siya sa pagsangyaw sa balay-balay?

² Mag-uban sa Pagpangandam: Kinahanglanon ang maayong pagpangandam. Ipakita sa ginatun-an kon asa niya hikaplagi ang gisugyot nga mga presentasyon diha sa Atong Ministeryo sa Gingharian ug sa librong Nangatarongan, ug tabangi siya sa pagpilig yano nga presentasyon nga magamit diha sa lokal nga teritoryo. Sukad sa sinugdan, dasiga siya nga ipasiugda ang Bibliya diha sa iyang ministeryo.—2 Tim. 4:2.

³ Ang mga pagbansaybansay mapuslanon kaayo alang sa bag-ong magmamantala. Samtang ang ginatun-an mag-ensayo sa presentasyon, ipakita kaniya kon unsaon pagdumala nga mataktikanhon ang mga reaksiyon nga maoy kasagaran diha sa teritoryo. (Col. 4:6) Pasaligi siya nga ang Kristohanong mga ministro dili kinahanglang mahibalo sa tubag sa matag pangutana nga mahimong ipatungha sa tagbalay. Sa pagdumala sa maong mga pangutana, kasagarang labing maayo nga motanyag sa paghimog pagdukiduki ug pagbalik aron dugang mahisgotan ang maong butang.—Prov. 15:28.

⁴ Magkuyog sa Pagsangyaw: Sa dihang ang ginatun-an magpakigbahin sa unang higayon sa balay-balay nga ministeryo, paobserbaha siya samtang gamiton nimo ang presentasyon nga giandam ninyong duha. Unya ilangkit siya sa panaghisgot. Sa pipila ka kahimtang, basin labing maayo nga bahin lang sa presentasyon ang isulti sa bag-ong magmamantala, sama sa pagbasag usa ka teksto ug pagkomento bahin niana. Konsideraha ang personalidad ug mga abilidad sa ginatun-an. (Filip. 4:5) Dayega siya kanunay samtang mauswagon nimo siyang ginabansay sa nagkalainlaing bahin sa buluhatong pagsangyaw.

⁵ Hinungdanon nga tabangan ang bag-ong magmamantala sa pagbaton ug regular nga eskedyul sa pagpakigbahin sa ministeryo, nga makigbahin niana kada semana kon mahimo. (Filip. 3:16) Himoa ang tinong mga kahikayan nga kamo magkuyog sa pagsangyaw, ug dasiga siya nga mokuyog usab sa ubang masibotong mga magmamantala. Ang ilang panig-ingnan ug pagpakig-uban makatabang niya aron siya mahimong hanas ug magmalipayon diha sa pagsangyaw sa balay-balay.