makapasabot ka kanila sa personal kaayong paagi nga si Jehova may pagtagad kanila ug siya motabang gayod kanila latas sa mga pagsulay nga ilang gisagubang pagkakaron.​—Isa. 41:​10, 13; 1 Ped. 5:7.

Ipakita ang Kalipay Diha sa Ginahimo Karon sa Diyos. Sa dihang magtinguha nga dasigon ang imong mga igsoon, ipunting ang atensiyon sa ginahimo karon ni Jehova. Ang pagsulti bahin niining mga butanga sa paaging magpakita nga nakapalipay kini kanimo makapukaw ug susamang mga pagbati diha sa mga kasingkasing sa imong mga tigpatalinghog.

Hunahunaa kon giunsa pagtabang ni Jehova kanato sa pagsagubang sa mga kapit-osan sa kinabuhi. Gipakita niya kanato ang labing maayong paagi sa pagkinabuhi. (Isa. 30:21) Gipatin-aw niya ang mga hinungdan sa krimen, inhustisya, kakabos, sakit, ug kamatayon ug gisulti kanato kon sa unsang paagi iyang taposon kining tanan. Gipalibotan niya kitag mahigugmaong mga igsoon. Gihatag niya kanato ang bililhong pribilehiyo sa pag-ampo. Gisaligan niya kita sa pribilehiyo nga mahimong iyang mga Saksi. Gipadayag niya kanato nga si Kristo naentrono na sa mga langit ug ang kataposang mga adlaw sa daang sistema tuling nagsingabot sa kataposan.​—Pin. 12:1-12.

Idugang sa maong mga panalangin ang atong mga tigom sa kongregasyon, mga asembliya, ug mga kombensiyon. Sa dihang hisgotan nato ang maong mga tagana sa paaging magpakitag tinuod nga pagpabili niini, imong mapalig-on ang determinasyon sa uban nga dili pasagdan ang panagkatigom uban sa ilang mga igsoon.​—Heb. 10:23-25.

Ang mga taho nga mohatag ug ebidensiya sa pagpanalangin ni Jehova sa atong mga paningkamot diha sa ministeryo sa kanataran sa susama maoy tinubdan sa kusog. Sa unang siglo sa dihang si Pablo ug Bernabe nagpaduol sa Jerusalem, sila nakahatag ug “dakong kalipay sa tanang igsoon” pinaagi sa pag-asoy nga detalyado sa pagkakabig sa mga tawo sa mga nasod. (Buh. 15:3) Ikaw usab makahatag ug kalipay sa mga igsoon pinaagi sa pagpakig-ambit ug makapalig-ong mga kasinatian kanila.

Ang dugang nga pagpalig-on mosangpot sa dihang ang mga indibiduwal matabangan sa pagkasabot sa pagkabililhon sa ilang ginahimo. Dayega sila tungod sa ilang pagpakigbahin sa Kristohanong ministeryo. Dayega sila kansang kalihokan limitado na kaayo tungod sa pagkatigulang ug sakit apan nagapakitag matinumanong paglahutay. Pahinumdomi sila nga si Jehova dili malimot sa gugma nga ilang gipakita alang sa iyang ngalan. (Heb. 6:10) Ang pagtuo nga sinulayan maoy bililhon kaayong kabtangan. (1 Ped. 1:​6, 7) Ang atong mga igsoon angayng pahinumdoman niini.

Hisgoting Mahinamon ang Paglaom sa Unahan. Ang dinasig nga mga saad bahin sa mga butang sa unahan maoy dakong tinubdan sa pagdasig sa tanan nga nahigugma sa Diyos. Tingali kadaghanan sa imong mamiminaw subsob nakadungog niining mga pulonga. Apan pinaagi sa pagpabili nga imong ipakita sa dihang hisgotan mo kining mga saara, ikaw makapabuhi niini, makapasilsil ug pagsalig diha sa katumanan niini, ug makapahimo sa mga kasingkasing nga matugob sa pagkamapasalamaton. Ang pagpadapat sa imong nakat-onan sa Teokratikanhong Tunghaan sa Ministeryo makatabang nimo sa paghimo niana.

Si Jehova mismo mao ang Dakong Magdadasig ug Maghahatag ug kusog sa iyang katawhan. Bisan pa niana, ikaw makakooperar kaniya sa pagpaila sa maong pagdasig ug pagpalig-on. Sa dihang magpakigpulong ka sa kongregasyon, gamitang epektibo ang higayon sa pagbuhat niana.

IKAW ba sa personal nakapauswag sa matag usa sa mga talambagan nga punto sa programa niining tunghaana? Nakompleto ba usab nimo ang gisugyot nga mga pagbansaybansay? Ginapadapat mo ba ang matag punto sa dihang magahatag ug mga pakigpulong, diha sa tunghaan kaha o sa ubang mga tigom, ug sa dihang magapakigbahin sa ministeryo sa kanataran?

Magpadayon sa pagpahimulos sa edukasyon sa Teokratikanhong Tunghaan sa Ministeryo. Bisan kon unsa ka dugay nang naghatag kag mga pakigpulong, adunay mga natad diin makahimo kag dugang pag-uswag.