• Pahimusli ang Atong Pagtuon sa Unsay Tinuod nga Gitudlo sa Bibliya?
    Ministeryo sa Gingharian—2006 | Pebrero

    • Pahimusli ang Atong Pagtuon sa Unsay Tinuod nga Gitudlo sa Bibliya?

      1 Ang makaiikag nga bahin sa “Diyosnong Pagkamasinugtanon” nga Distritong Kombensiyon mao ang pagluwat sa librong Unsay Tinuod nga Gitudlo sa Bibliya? Sa dili madugay ato kining gamiton sa atong ministeryo sa kanataran, ilabina sa dihang magdumala kitag mga pagtuon sa Bibliya sa balay. Busa, kinahanglang masinati kita niining bag-ong publikasyon. Posible kana tungod kay atong tun-an kini sa Pagtuon sa Libro sa Kongregasyon sugod sa semana sa Abril 17, 2006.

      2 Ang magtatan-aw sa Pagtuon sa Libro sa Kongregasyon magtagad sa mga pangutana nga makita sa sinugdanan sa matag kapitulo. Dayon ang pagtuon dumalahon pinaagi sa paggamit sa mga pangutana sa ubos sa panid. Ang yawing mga teksto basahon ug hisgotan, ug ang kahon nga “Kon Unsay Gitudlo sa Bibliya” sa kataposan sa matag kapitulo mapuslanon sa pagsubli sa materyal tungod kay ang maong kahon adunay Kasulatanhong mga tubag sa mga pangutana sa sinugdanan sa kapitulo. Malingaw ka sa pagkomento tungod kay kining libroha maghisgot sa mga ulohan sa tin-aw, simple, ug makapainteres nga paagi.

      3 Ang apendise niining libroha naghatag ug mga detalye bahin sa lainlaing mga ulohan. Atong magamit kini kon ang mga estudyante sa Bibliya nagkinahanglag dugang kasayoran bahin sa usa ka ulohan. Usahay, may mga bahin sa apendise nga hisgotan panahon sa Pagtuon sa Libro sa Kongregasyon. Ang tanang materyal diha sa apendise kinahanglang basahon sa magbabasa sa pagtuon sa libro, ug ang mas tag-as nga mga artikulo mahimong kobrehan seksiyon por seksiyon. Ang mga pangutana sa pagtuon dili makita diha sa apendise. Apan mahimong pakomentohon sa magtatan-aw kadtong presente pinaagi sa pagsuknag mga pangutana nga nagpasiugda sa pangunang mga punto.

      4 Ang librong Gitudlo sa Bibliya paspas nga pagatun-an panahon sa Pagtuon sa Libro sa Kongregasyon. Kita wala dahoma nga ingon usab niana ka paspas ang atong pagtuon sa dihang tun-an nato kining libroha sa uban, ilabina kon sila diyutay o wala pay kahibalo bahin sa Bibliya. (Buh. 26:28, 29) Sa mga pagtuon sa Bibliya sa balay, kinahanglan natong hisgotan pag-ayo ang mga teksto, ipatin-aw ang mga ilustrasyon, ug uban pa. Busa, himoang tumong ang pagtambong matag semana ug ang pagpakig-ambit sa bug-os sa atong pagtuon sa librong Unsay Tinuod nga Gitudlo sa Bibliya?