Unsay Imong Unahon?

¹ Unsay imong tubag nianang pangutanaha? Siyempre, kitang tanan gustong mag-una sa intereses sa Gingharian. (Mat. 6:33) Apan makapangutana kita sa atong kaugalingon, ‘Gipakita ba sa akong mga pagpili nga giuna nako ang intereses sa Gingharian?’ Ang Bibliya nagdasig kanato: “Padayong pamatud-i kon unsa kamo sa inyong kaugalingon.” (2 Cor. 13:5) Sa unsang paagi atong mapamatud-an nga giuna nato ang Gingharian?

² Atong Panahon: Makasugod kita pinaagi sa pagsusi kon giunsa nato paggamit ang atong panahon. (Efe. 5:15, 16) Unsa ka daghang panahon ang atong gigugol matag semana sa pagpakig-uban sa ubang mga tawo, pagtan-awg telebisyon, paggamit sa Internet, o paglingawlingaw? Kon atong ilista kon unsa ka daghang panahon ang atong gigugol niining mga butanga ug itandi kana sa gidaghanon sa panahon nga atong gigugol sa espirituwal nga mga kalihokan, tingali matingala kita. Nagtrabaho ba kitag taas nga panahon nga wala magtagad sa sagradong pag-alagad aron lang makabaton ug luhong mga butang? Unsa ka subsob natong gisakripisyo ang mga tigom o pagsangyaw kay kita mibiyahe sa hinapos sa semana aron maglingawlingaw?

³ Hikaya ang mga Unahonon: Kadaghanan kanato walay igong panahon sa pagbuhat sa tanang butang nga gusto natong buhaton. Busa aron mauna ang intereses sa Gingharian, kinahanglan natong susihon ang atong mga unahonon ug dayon mag-eskedyul ug panahon alang sa “mas hinungdanong mga butang.” (Filip. 1:10) Kini naglakip sa pagtuon sa Pulong sa Diyos, pagpakigbahin sa ministeryo, pag-atiman sa pamilya, ug pagtambong sa Kristohanong mga tigom. (Sal. 1:1, 2; Roma 10:13, 14; 1 Tim. 5:8; Heb. 10:24, 25) Ang ubang mga kalihokan, sama sa kasarangan nga ehersisyo ug makapahimuot nga lingawlingaw, maoy mapuslanon. (Mar. 6:31; 1 Tim. 4:8) Apan kining mga butanga nga dili kaayo hinungdanon kinahanglang dili makabalda sa intereses sa Gingharian.

⁴ Giuna sa usa ka batan-ong lalaki ang intereses sa Gingharian pinaagi sa pagsulod sa bug-os-panahong ministeryo imbes moeskuyla sa kolehiyo aron makabaton ug sekular nga karera. Nagtuon siyag laing pinulongan ug mibalhin aron sa pag-alagad diin mas dako ang panginahanglan. Siya miingon: “Malipayon kaayo ako sa akong kinabuhi dinhi. Ang ministeryo makapadasig kaayo! Unta himoon usab sa tanang batan-on ang sama niini aron masinati usab nila ang akong gibati nga katagbawan. Wala nay mas maayo pa kay sa pag-alagad kang Jehova sa atong bug-os maarangan.” Sa pagkatinuod, ang pag-una sa Gingharian magdalag mga panalangin, apan labawng hinungdanon, kini makapalipay sa atong langitnong Amahan, si Jehova.—Heb. 6:10.

Sa Unsang Paagi Kita Makatabang?

¹ Ang pangutanang “Sa unsang paagi kita makatabang?” subsob nga gisukna sa mga Saksi ni Jehova sa dihang makadungog sila nga dunay katalagman nga nahitabo sa ubang bahin sa kalibotan. Sumala sa gipakita sa asoy sa Buhat 11:27-30, ang mga Kristohanon sa unang siglo naghatag ug mga hinabang ngadto sa mga igsoon nga nagpuyo sa Judea tungod sa gutom.

² Sa atong panahon, ang atong organisasyonal nga kahikayan nagtaganag salapi nga magamit isip hinabang alang sa mga naapektohan sa kinaiyanhon o hinimog-tawo nga mga katalagman ug sa uban pang mga panahon sa panginahanglan.

³ Pananglitan, sa miaging duha ka tuig daghang kaigsoonan ang naghatag ug hinabang nga salapi alang sa mga naapektohan sa tsunami sa Habagatang Asia, ug sa bagyong Katrina sa habagatang Tinipong Bansa. Gipabilhan gayod kining kinasingkasing nga sanong sa paghatag ug salapi ngadto sa pondo sa organisasyon alang sa hinabang. Ugaling lang, kon ang mga donasyon espesipikong gipaila alang sa usa ka katalagman, sa ubang mga nasod kinahanglang gamiton lamang ang maong pondo alang sa katuyoan nga gipaila sa naghatag ug sulod sa usa ka tinong yugto sa panahon, bisag naatiman na ang mga panginahanglan sa atong mga igsoon diha sa lokal ug naghinobra na ang mga donasyon.

⁴ Tungod niini, among gisugyot nga ang mga donasyon alang sa hinabang mas maayong ihatag ngadto sa tibuok-kalibotang buluhaton. Kining pondoha gamiton alang sa hinabang ug alang sa pagpalambo sa espirituwal nga mga panginahanglan sa atong Kristohanong kapunongan. Kon sa usa ka rason ang usa ka tawo gustong mohatag ug donasyon alang sa hinabang nga bulag sa mga kontribusyon alang sa tibuok-kalibotang buluhaton, kini dawaton gihapon ug gamiton kon dunay panginahanglan alang sa hinabang. Apan, mas maayo unta kon ang maong mga donasyon mapadapat bisan asa o sa bisan unsang paagi.

⁵ Kon direkta natong ihatag ang atong mga donasyon ngadto sa tibuok-kalibotang buluhaton, kita makabaton ug dugang pondo nga magamit alang sa tanang bahin sa buluhaton sa Gingharian ug dili lamang alang sa umaabot nga mga panginahanglan sa hinabang. Nahiuyon kini sa diwa sa Efeso 4:16, samtang kita nakigtambayayong sa paghatag kon unsay gikinahanglan sa “[pagpatubo] sa lawas alang sa pagpalig-on sa kaugalingon niini diha sa gugma.”