SEKSIYON 6

Unsay Katuyoan sa Diyos Alang sa Yuta?

GILALANG sa Diyos ang yuta aron mahimong hingpit nga puy-anan sa tawo. Ang iyang Pulong nag-ingon: “Iya ni Jehova ang mga langit, apan ang yuta iyang gihatag sa mga anak sa mga tawo.”—Salmo 115:16.

Sa wala pa lalanga ang unang tawo, si Adan, gipili sa Diyos ang gamayng bahin sa yuta nga gitawag ug Eden ug gihimo kining matahom nga hardin. Ang Kasulatan nag-ingon nga ang tinubdan sa suba sa Euprates ug Tigris (Hidekel) mao ang Eden.a Gikaingon nga ang hardin sa Eden nahimutang kaniadto sa dapit nga gitawag karon ug sidlakang Turkey. Oo, tinuod gayod nga may hardin sa Eden kaniadto!

Ang Diyos naglalang kang Adan ug nagbutang kaniya sa hardin sa Eden “aron sa pagtikad niini ug sa pag-atiman niini.” (Genesis 2:15) Sa ulahi, ang Diyos naglalang ug usa ka asawa alang kang Adan—si Eva. Sila gisugo sa Diyos: “Magmabungahon ug magdaghan kamo ug pun-a ang yuta ug gamhi kini.” (Genesis 1:28) Tin-aw nga ang Diyos “wala maglalang [sa yuta] sa wala lamay kapuslanan, [apan] nag-umol niini aron pagapuy-an.”—Isaias 45:18.

Apan, si Adan ug Eva mirebelde sa Diyos pinaagi sa tinuyong pagsupak sa iyang balaod. Busa, gipapahawa sila sa Diyos sa hardin sa Eden. Ang Paraiso nawala. Ug dili lamang kana ang kadaot nga gipahinabo sa sala ni Adan. Ang Kasulatan nag-ingon: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 5:12.

Gikalimtan na ba ni Jehova ang iyang orihinal nga katuyoan—nga ang yuta mahimong paraiso nga puy-an sa malipayong mga tawo? Wala! Ang Diyos nag-ingon: “Ang akong pulong nga mogula gikan sa akong baba . . . dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.” (Isaias 55:11) Ang Paraiso mapasig-uli sa yuta!

Unsa unyay kahimtang sa kinabuhi sa Paraiso? Tagda ang mga saad sa Kasulatan sa sunod nga duha ka panid.

a Ang Genesis 2:10-14 nag-ingon: “Dihay suba nga migula gikan sa Eden aron sa pagtubig sa tanaman, ug gikan didto kini nabahin ug kini nahimong upat ka sanga. Ang ngalan sa una maoy Pison . . . ang ngalan sa ikaduhang suba maoy Gihon . . . ang ngalan sa ikatulong suba maoy Hidekel [o, Tigris]; mao kini ang nagaagay padulong sa sidlakan sa Asirya. Ug ang ikaupat nga suba mao ang Euprates.” Wala masayri kon diin nahimutang ug kon unsay ngalan karon sa unang duha ka suba.

Ang Umaabot nga Paraisong Yuta

Ang mga patay pagabanhawon: “Ang tanan nga anaa sa handomanang mga lubnganan makadungog sa iyang tingog ug manggula.”—Juan 5:28, 29.

Mawala na ang pagkatigulang, sakit, o kamatayon: “Walay pumoluyo nga moingon: ‘Ako masakiton.’” (Isaias 33:24) “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.”—Pinadayag 21:4.

Dagaya ang makapahimsog nga pagkaon: “Ang yuta magapatungha gayod sa iyang bunga; ang Diyos, ang atong Diyos, magapanalangin kanato.”—Salmo 67:6.

Nindot nga mga balay ug makapatagbawng buluhaton: “Sila gayod magtukod ug mga balay ug magpuyo niini . . . Gamiton sa bug-os sa akong mga pinili ang buhat sa ilang mga kamot.”—Isaias 65:21, 22.

Wala nay gubat, krimen, o kapintasan: “Gipahunong [ni Jehova] ang mga gubat hangtod sa kinatumyan sa yuta.” (Salmo 46:9) Ang “mga daotan . . . pagaputlon gikan sa yuta.”—Proverbio 2:22.