Nanglupad Pinaagi sa mga Pako nga Sama sa mga Agila

UNSAY bation sa usa ka tawo human nag-antos ug lima ka tuig sa mga kampong konsentrasyon sa Nazi? Mawad-an bag paglaom? Magdumot ba? Magtinguha sa pagpanimalos?

Katingalahan man nga pamation, usa ka tawo nga ingon niana misulat: “Ang akong kinabuhi napalambo labaw kay sa akong gilaoman.” Nganong mibati siya ug ingon niana? Siya miasoy: “Nakakita akog dalangpanan ilalom sa mga pako sa Labing Hataas, ug nasinati ko ang katumanan sa mga pulong ni manalagnang Isaias, sa dihang siya miingon: ‘Kadtong nagahulat kang Jehova magabag-o sa ilang kusog. Sila manlupad pinaagi sa mga pako nga sama sa mga agila. Sila . . . manlakaw ug dili mangaluya.’”​—Isaias 40:31.

Kining Kristohanong lalaki, kansang lawas nakaagig labing mapintas nga pagtratar nga mahanduraw, may espiritu nga sa mahulagwayon mikayab pataas, usa ka espiritu nga ang Nazi sa mapintason dili makabuntog. Sama kang David siya nakakitag dalangpanan diha sa landong sa “mga pako” sa Diyos. (Salmo 57:1) Gipahimuslan niining Kristohanon ang pasumbingay nga gigamit ni manalagnang Isaias, nga gitandi ang iyang espirituwal nga kusog nianang sa usa ka agila nga naglupad nga pataas ug pataas sa panganod.

Gibati mo ba sukad nga nabug-atan sa mga problema? Tino nga buot ka usab modangop ilalom sa mga pako sa Labing Hataas, sa ‘paglupad pinaagi sa mga pako nga sama sa mga agila.’ Aron masabtan kon sa unsang paagi mahimo kini, makatabang nga makabatog kasayoran bahin sa agila, nga masubsob gigamit nga mahulagwayon diha sa Kasulatan.

Ilalom sa Estandarte sa Agila

Sa tanang langgam nga naobserbahan sa karaang mga tawo, ang agila tingali mao ang labing dinayeg tungod sa katulin ug katahom sa paglupad niini. Daghang karaang mga sundalo, lakip niadtong sa Babilonya, Persia, ug Roma, nagmartsa ilalom sa estandarte sa agila. Ang kasundalohan ni Ciro nga Bantogan mao ang usa niini. Ang Bibliya nagtagna nga kining Persianhong hari mahisama sa usa ka langgam nga mandadagit nga nagagikan sa sidlakan sa pagtukob sa Empiryo sa Babilonya. (Isaias 45:1; 46:11) Duha ka gatos ka tuig human gisulat kining tagnaa, ang mga sundalo ni Ciro, nga may mga agila diha sa ilang mga estandarte sa gubat, mihugpa sa siyudad sa Babilonya sama sa usa ka agila nga nagmakmak sa tukbonon niini.

Di pa dugay, ang mga manggugubat nga sama kang Carlomagno ug Napoleon ug ang mga nasod sama sa Tinipong Bansa ug Alemanya nagpili usab sa agila ingon nga ilang simbolo. Ang mga Israelinhon gisugo sa dili pagsimba sa mga larawan sa mga agila o sa bisan unsang ubang linalang. (Exodo 20:4, 5) Bisan pa, ang mga magsusulat sa Bibliya naghisgot sa mga kinaiya sa agila sa paglarawan sa ilang mensahe. Busa ang agila, ang langgam nga labing masubsob nga gihisgotan sa Kasulatan, gigamit sa pagsimbolo sa mga butang sama sa kaalam, panalipod sa Diyos, ug pagkatulin.

Ang Mata sa Usa ka Agila

Ang mahait nga panan-aw sa agila nahimo nang sanglitanan. Bisan pag ang bulawang agila talagsa rang motimbang ug kapin sa lima ka kilo, ang mata niini sa aktuwal mas dako kay sa tawo, ug ang panan-aw niini mas mahait. Si Jehova mismo, nga nagbatbat ngadto kang Job sa katakos sa agila sa pagpangita sa pagkaon niini, miingon: “Ngadto sa halayo ang mga mata niini nagpadayon sa pagpangita.” (Job 39:27, 29) Si Alice Parmalee, sa iyang librong All the Birds of the Bible, nagtaho nga “kas-a dihay usa ka agila nga nakakitag usa ka patayng isda nga naglutawlutaw sa linaw lima ka kilometros ang kalayoon ug midayb pahandag sa eksaktong lugar. Dili lamang nakita sa agila ang gamayng butang nga layo kaayo ang distansiya kay sa makita sa tawo, kondili gipunting kanunay sa langgam ang panan-aw diha sa isda gikan sa lima ka kilometro nga pagdayb niini.”

Tungod sa hait nga panan-aw niini, ang agila maoy usa ka hustong simbolo sa kaalam, usa sa pangunang mga hiyas ni Jehova. (Itandi ang Ezekiel 1:10; Pinadayag 4:7.) Ngano man? Ang kaalam naglangkit sa pagkakita-daan sa mga sangpotanan sa bisan unsang aksiyon nga atong himoon. (Proverbio 22:3) Ang agila, nga may katakos sa pagkakita sa layo kaayong distansiya, makakita sa kapeligrohan sa halayo pa ug maghimog mga panagana, sama sa tawong maalamon sa ilustrasyon ni Jesus, kinsa nakakitang-daan sa pag-abot sa bagyo ug nagtukod sa iyang balay diha sa dakong bato. (Mateo 7:24, 25) Makaiikag, sa Kinatsila, ang pagbatbat ug tawo ingong sama sa usa ka agila nagpasabot nga siya adunay salabotan o maayog panabot.

Kon makahigayon ka sa pagkakitag usa ka agila sa duol, panid-i ang paagi sa paggamit niini sa mga mata. Dili ka pasiplatan niinig tan-aw; hinunoa, daw usausahon ug tan-aw ang detalye sa imong panagway. Sa susama, ang tawong maalamon mainampingong magaanalisar sa butang sa dili pa mohimog desisyon imbes mosalig sa iyang kinaiyahan o sa iyang mga pagbati. (Proverbio 28:26) Samtang ang hait nga panan-aw sa agila naghimo kaniya nga usa ka hustong simbolo sa hiyas sa Diyos nga kaalam, ang iyang matahom nga paglupad mahulagwayong gigamit usab sa mga magsusulat sa Bibliya.

“Ang Dalan sa Usa ka Agila Diha sa Kalangitan”

“Ang dalan sa usa ka agila diha sa kalangitan” talagsaon sa katulinon niini ug sa paagi sa paglupad niini nga daw wala gayoy paghago, nga walay ginasubayng tinong dalan ug walay ginabiling agi. (Proverbio 30:19) Ang katulinon sa paglupad sa agila maoy gihisgotan sa Lamentaciones 419, diin ang mga sundalong Babilonyanhon gihubit: “Ang among mga manggugukod matulin pa kay sa mga agila. Sila mainitong minggukod kanamo ibabaw sa kabukiran.” Sa dihang makit-an sa usa ka agila nga naglupadlupad sa ibabaw ang biktima niini, ipuwesto niini ang mga pako ug mosugod kini sa titip nga pagdayb, diin kini makaabot sa gikusgong 130 kilometros matag oras, sumala sa ubang mga taho. Dili ikahibulong, gigamit sa Kasulatan ang agila ingong kapulong sa katulin, ilabina may kalabotan sa militaryong kusog.​—2 Samuel 1:23; Jeremias 4:13; 49:22.

Si Isaias, sa laing bahin, naghisgot bahin sa walay hago nga paglupad sa usa ka agila. “Kadtong nagahulat kang Jehova magabag-o sa ilang kusog. Sila manlupad pinaagi sa mga pako nga sama sa mga agila. Sila managan ug dili kapuyan; sila manlakaw ug dili mangaluya.” (Isaias 40:31) Unsa ang sekreto sa malutawlutawon nga paglupad sa agila? Diyutayng kusog lang ang gikinahanglan sa pagpasaka sa itaas sanglit nagagamit ang agila ug mga thermal, o mga lindog sa nagsakang init nga hangin. Ang mga lindog sa nagsakang init nga hangin dili-makita, apan hanas ang agila sa pagpangita niini. Sa dihang makita na ang lindog sa nagsakang init nga hangin, bukharon sa agila ang mga pako ug ikog niini ug maglibotlibot sulod sa lindog sa init nga hangin, nga magpasaka sa agila sa taas ug taas pa. Sa maabot na ang igong gihabogon, magpalutawlutaw kini sa sunod nga lindog sa nagsakang init nga hangin, diin ang proseso ginasubli. Niining paagiha ang agila makapabilin sa paglupad sa daghang oras sa kinamenosan nga paggamit sa kusog.

Sa Israel, ilabina sa Rift Valley nga nanganawkanaw gikan sa Ezion-geber sa kadaplinan sa baybay sa Pulang Dagat hangtod sa Dan sa amihanan, ang mga agila maoy pamilyar nga talan-awon. Daghan kaayo sila ilabina sa tingpamulak ug tinghunlak sa dihang molalin sila. Sa miaging pipila ka tuig duolan sa 100,000 ka agila ang naihap. Sa dihang mapainit sa adlaw ang hangin sa buntag, ginatos ka langgam nga mandadagit ang makitang naglupadlupad ibabaw sa mga pangpang nga maoy utlanan sa Rift Valley.

Ang walay hago nga paglupad sa agila maoy matahom kaayong ilustrasyon kon sa unsang paagi ang kusog ni Jehova makapadasig kanato sa espirituwal ug emosyonal nga paagi aron kita makapadayon sa atong buluhaton. Maingon nga ang agila dili makalupad nianang gihabugona sa kaugalingong kusog niini, kita dili makasagubang kon kita mosalig sa atong kaugalingong mga katakos. “Sa tanang butang ako adunay kusog tungod kaniya nga nagahatag ug gahom kanako,” matod pa ni apostol Pablo. (Filipos 4:13) Sama sa usa ka agila nga kanunayng nagpangita sa dili-makitang mga lindog sa nagsakang init nga hangin, kita ‘magpadayon sa pagpangayo’ sa dili-makitang aktibong gahom ni Jehova pinaagi sa atong tim-os nga mga pag-ampo.​—Lucas 11:9, 13.

Ang nanglalin nga mga agila sagad makakitag mga lindog sa nagsakang init nga hangin pinaagi sa pagpaniid sa ubang mga langgam nga mandadagit. Ang naturalistang si D. R. Mackintosh nagtaho nga sa usa ka higayon 250 ka agila ug mga buwitre ang nakita nga nagtuyok sa paglupad pataas sa mao ra gihapong lindog sa nagsakang init nga hangin. Ang mga Kristohanon karon makakat-on usab sa pagsalig diha sa kusog ni Jehova pinaagi sa pagsundog sa matinumanong mga panig-ingnan sa ubang diyosnong mga alagad.​—Itandi ang 1 Corinto 11:1.

Sa Landong sa mga Pako sa Agila

Ang usa sa labing delikadong yugto sa kinabuhi sa usa ka agila maoy sa panahon nga magtuon kini sa paglupad. Daghang agila ang nangamatay sa pagsulay. Ang kuyabog nga Israelinhong nasod nameligro usab sa dihang mipahawa kini sa Ehipto. Busa ang mga pulong ni Jehova ngadto sa mga Israelinhon haom kaayo: “Kamo nagpakakita sa gibuhat ko sa mga Ehiptohanon, kon giunsa ko pagdala kamo ibabaw sa mga pako sa mga agila ug gidala ko kamo nganhi kanako.” (Exodo 19:4) May mga taho bahin sa mga agila nga nagdala makadiyot ug kuyabog sa likod niini aron ang kuyabog dili mahagsa sa iyang unang pagsulay sa paglupad. Si G. R. Driver, nagkomento diha sa Palestine Exploration Quarterly bahin niining mga tahoa, miingon: “Ang [Biblikanhong] paglarawan dili diay usa ka hinanduraw nga ideya apan gipasukad sa aktuwal nga hitabo.”

Ang agila maoy sulondan kaayong mga ginikanan sa ubang mga paagi usab. Dili lamang tagan-an nila ang mga piso ug regular nga pagkaon kondili mainampingong pinohon sa inahang langgam ang karne nga dad-on sa laki nga agila diha sa salag aron matulon kini sa kuyabog nga agila. Sanglit ang ilang mga salag sagad gitukod diha sa mga pangpang o sa tag-as nga mga kahoy, ang kuyabog apupa sa klima. (Job 39:27, 28) Ang naglagiting nga adlaw, nga kasagaran sa kayutaan sa Bibliya, makamatay sa kuyabog kon dili pa sa pag-atiman sa mga ginikanan niini. Bukharon sa hamtong nga agila ang mga pako niini, usahay sa daghang oras sa usa ka panahon, aron malandongan ang mahuyang nga mga piso.

Busa tukma kaayo nga ang mga pako sa agila gigamit sa Kasulatan ingong simbolo sa panalipod sa Diyos. Ang Deuteronomio 32:9-12 nagbatbat kon giunsa ni Jehova pagpanalipod ang mga Israelinhon sa dihang mipanaw sila sa kamingawan: “Kay ang bahin ni Jehova mao ang iyang katawhan; si Jacob mao ang pahat sa iyang panulondon. Iyang nakaplagan siya didto sa yuta sa kamingawan, ug sa haw-ang, nagdaguhong nga disyerto. Iyang gilibotan siya, giatiman siya, gibantayan siya sama sa kalimutaw sa iyang mata. Ingon sa usa ka agila nga nagpukaw sa iyang salag, naglupad sa ibabaw sa iyang mga kuyabog, nagbuklad sa iyang mga pako, gikuha sila, gidala sila ibabaw sa iyang mga pako, si Jehova lamang ang padayon nga nagtultol kanila.” Hatagan kita ni Jehova sa samang mahigugmaong panalipod kon kita mosalig kaniya.

Ang Dalan sa Kaikyasan

Usahay sa panahong mag-atubang kita ug mga problema, tingali makita nato ang atong kaugalingon nga mangandoy sa paglupad halayo gikan sa atong mga kalisod. Mao gayod kanay gibati ni David. (Itandi ang Salmo 55:6, 7.) Apan bisag nagsaad si Jehova nga iya kitang tabangan sa dihang magsagubang kitag mga pagsulay ug mga pag-antos niining sistemaha, siya wala magtanyag ug bug-os nga kaikyasan. Kita adunay pasalig sa Bibliya: “Walay tintasyon nga midangat kaninyo gawas sa unsay sagad diha sa mga tawo. Apan ang Diyos kasaligan, ug dili niya itugot nga tintalon kamo labaw sa kon unsay inyong maagwanta, apan uban sa tintasyon siya usab maghimog kalingkawasan aron kamo makahimo sa pag-agwanta niini.”​—1 Corinto 10:13.

Ang “kalingkawasan” o “dalan sa kaikyasan” (King James Version) naglangkit sa pagsalig kang Jehova. Mao kini ang nakita ni Max Liebster, kansang mga komento gikutlo sa sinugdanan niining artikuloha. Sa iyang mga tuig diha sa mga kampo konsentrasyon, siya nakadangat sa pag-ila ug pagsalig kang Jehova. Ingon sa nasayran ni Max, si Jehova nagapalig-on kanato pinaagi sa iyang Pulong, sa iyang espiritu, ug sa iyang organisasyon. Bisan diha sa mga kampo, gipangita sa mga Saksi ang isigkamagtutuo ug gihatagan sila ug espirituwal nga tabang, gipakig-ambit ang mga hunahuna sa Kasulatan ug ang bisan unsang basahon sa Bibliya nga mabatonan. Ug ingon sa masubsob nga gipamatuod sa matinumanong mga nangaluwas, gilig-on sila ni Jehova. “Kanunay akong nangayo sa tabang ni Jehova,” miingon si Max, “ug ang iyang espiritu naglig-on kanako.”

Bisag unsa pay pagsulay nga atong atubangon, kita makasalig usab sa balaang espiritu sa Diyos, basta kita magpadayon sa pagpangayo niana. (Mateo 7:7-11) Napalagsik niini nga “gahom nga labaw sa kasarangan,” kita manlupad imbes madaog sa atong mga problema. Kita magpadayon sa paglakaw sa dalan ni Jehova, ug dili kita pangapuyon. Kita manlupad pinaagi sa mga pako nga sama sa mga agila.​—2 Corinto 4:7; Isaias 40:31.

[Blurb sa panid 10]

Dili ka pasiplatan niinig tan-aw

[Picture Credit Line sa panid 9]

Letrato: Cortesía de GREFA

[Picture Credit Line sa panid 10]

Letrato: Cortesía de Zoo de Madrid