Ang Mensahe nga Kinahanglang Atong Imantala

“KAHADLOKI ANG MATUOD NGA DIYOS UG TUMANA ANG IYANG MGA SUGO”

DUGAY na sa wala pa ang Kristohanong panahon, si Jehova misulti sa matinumanong si Abraham bahin sa usa ka kahikayan nga ang “tanang nasod sa yuta” magapanalangin sa ilang kaugalingon. (Gen. 22:18) Iyang gidasig usab si Solomon sa pagsulat mahitungod sa usa ka paninugdang kinahanglanon nga gipaabaga sa tanang tawo: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Eccl. 12:13) Apan sa unsang paagi mahibalo ang mga tawong nagpuyo sa tanang nasod bahin niining mga butanga?

Bisan pag kanunay nga may mga tawong nagtuo sa pulong sa Diyos, ang Bibliya nagpakita nga ang dakong tibuok-yutang pagpamatuod uban sa maayong balita nga makaabot sa tanang nasod gitagana alang sa “adlaw sa Ginoo.” Kini nagsugod niadtong 1914. (Pin. 1:10) Mahitungod sa maong panahon, ang Pinadayag 14:​6, 7 mitagna nga ang usa ka hinungdanong pagmantala ubos sa manulondaanong pagdumala pagahimoon “ngadto sa tanang nasod ug tribo ug pinulongan ug katawhan.” Sila pagaawhagon: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.” Kabubut-on sa Diyos nga kining mensahea imantala. Kita may pribilehiyo sa pagpakigbahin sa maong buluhaton.

“Ang Matuod nga Diyos.” Sa dihang si Jehova nagpahayag, “Kamo mao ang akong mga saksi,” kadto gihimo diha sa kahimtang nga ang isyu sa pagka-Diyos gilantugian. (Isa. 43:10) Ang mensaheng kinahanglang ipahayag dili lamang aron ang mga tawo makabaton gayod ug relihiyon o motuo sa usa ka diyos. Hinunoa, kinahanglang sila hatagag higayon nga mahibalo nga ang Maglalalang sa langit ug sa yuta mao ang bugtong matuod nga Diyos. (Isa. 45:​5, 18, 21, 22; Juan 17:3) Ang matuod nga Diyos lamang ang kasaligang makatagna sa umaabot. Atong pribilehiyo ang pagpunting nga ang pagkatuman sa pulong ni Jehova sa nangagi magahatag ug lig-ong pasikaranan sa pagsalig nga mamatuman ang tanan niyang gisaad alang sa umaabot.​—Jos. 23:14; Isa. 55:​10, 11.

Siyempre, daghan nga atong ginasangyawan nagsimbag ubang mga diyos o kaha nangangkon nga walay diyos nga gisimba. Aron pamatian, kinahanglang kita mosugod pinaagi sa usa ka butang diin kamong duha may interes. Makabenepisyo kita sa panig-ingnan nga natala sa Buhat 17:22-31. Matikdi nga bisan pag mataktikanhon si apostol Pablo, tin-aw niyang gipahayag ang pagkamay-tulubagon sa tanang tawo ngadto sa Diyos nga mao ang Maglalalang sa langit ug sa yuta.

Pagpaila sa Ngalan sa Diyos. Ayaw pakyasa ang pagpaila sa matuod nga Diyos pinaagi sa ngalan. Gimahal ni Jehova ang iyang ngalan. (Ex. 3:15; Isa. 42:8) Buot niya nga ang mga tawo makaila sa maong ngalan. Gipahinabo niya nga ang iyang mahimayaong ngalan malakip diha sa Bibliya sa kapig 7,000 ka beses. Atong responsabilidad nga ang mga tawo makaila niana.​—Deut. 4:35.

Ang mga kalaoman sa umaabot nga kinabuhi alang sa tanang tawo nagdepende sa ilang pagkaila kang Jehova ug pagsangpit kaniya diha sa pagtuo. (Joel 2:32; Mal. 3:16; 2 Tes. 1:8) Bisan pa niana, ang kadaghanang tawo wala makaila kang Jehova. Naglakip kana sa daghan kaayong nag-angkon nga nagsimba sa Diyos sa Bibliya. Bisan pag sila adunay Bibliya ug nagbasa niana, mahimong sila wala gihapon makaila sa personal nga ngalan sa Diyos kay gitangtang kana gikan sa daghang modernong mga hubad. Ang nahibaloan lamang sa pipila ka tawo sa ngalang Jehova mao nga ang ilang relihiyosong mga pangulo nagsugo nga dili nila kana gamiton.

Sa unsang paagi ikapaila nato ang ngalan sa Diyos sa mga tawo? Walay sama ka epektibo kay sa ipakita kini kanila diha sa Bibliya​—ang ilang kaugalingong kopya kon mahimo. Sa pipila ka hubad, kanang ngalana makita sa libolibo ka beses. Diha sa uban, makita lamang kini diha sa Salmo 83:18 o Exodo 6:3-6, o tingali makita kini diha sa potnot sa Exodo 3:​14, 15 o 6:3. Sa ubay-ubayng hubad, ang kapuling mga pulong, sama sa “Ginoo” ug “Diyos,” gipatik sa linaing tipo sa letra sa dihang anaa ang personal nga ngalan sa Diyos diha sa orihinal-pinulongang teksto. Kon bug-os nga wala gamita sa modernong mga maghuhubad ang personal nga ngalan sa Diyos, basin kinahanglang imong gamiton ang daandaang hubad sa Bibliya aron ipakita sa mga tawo kon unsay gihimo. Sa pipila ka nasod ikapunting mo ang balaang ngalan diha sa relihiyosong mga himno o sa usa ka sinulat diha sa publikong tinukod.

Bisan alang niadtong nagsimbag ubang mga diyos, ang Jeremias 10:10-13 diha sa Bag-ong Kalibotang Hubad epektibong magamit. Kini wala lamang magpahayag sa ngalan sa Diyos kondili tin-awng nagsaysay kon kinsa siya.

Ayawg itago ang ngalang Jehova luyo sa mga titulo nga sama sa “Diyos” ug “Ginoo,” sama sa ginahimo sa Kakristiyanohan. Wala kini magpasabot nga ang ngalan kinahanglang gamiton sa pagsugod sa matag panagkabildo. Tungod sa pagkamapihigon, putlon sa pipila ka tawo ang panaghisgot. Apan tapos ikapahiluna ang pasikaranan sa panagkabildo, ayaw likayi ang paggamit sa balaang ngalan.

Mamatikdan nga ang Bibliya nagagamit sa personal nga ngalan sa Diyos nga mas subsob kay sa giipong gidaghanon sa mga higayong kini nagagamit sa mga panawag nga sama sa “Ginoo” ug “Diyos.” Bisan pag tinuod, ang mga magsusulat sa Bibliya wala magtinguha nga ilakip ang balaang ngalan diha sa matag tudling-pulong. Gilakip lang nila kana sa kinaiyanhon, gawasnon, ug matinahorong paagi. Kana maayong sumbanan nga pagasundon.

Ang Persona nga Nailhan sa Maong Ngalan. Bisan pag ang kamatuoran nga ang Diyos adunay personal nga ngalan maoy usa ka hinungdanong kamatuoran mismo, kana sinugdanan lamang sa pagkaila kaniya.

Aron higugmaon si Jehova ug sangpiton siya diha sa pagtuo, ang mga tawo kinahanglang mahibalo kon unsang matanga siya sa Diyos. Sa dihang gipaila ni Jehova ang iyang ngalan kang Moises didto sa Bukid sa Sinai, wala lamang Niya litoka ang pulong “Jehova.” Iyang gipaila ang pipila Niya ka talagsaong mga hiyas. (Ex. 34:​6, 7) Kana usa ka panig-ingnan nga angay natong sundogon.

Kon ikaw nagasangyaw ngadto sa bag-ong interesadong mga tawo o nagahatag ug mga pakigpulong diha sa kongregasyon, sa dihang maghisgot ka mahitungod sa mga panalangin sa Gingharian, ipunting kon unsay gipaila niini bahin sa Diyos nga nagbungat sa maong mga saad. Sa dihang maghisgot sa iyang mga sugo, ipasiugda ang kaalam ug ang gugma nga gipabanaag niana. Tin-awa nga ang mga kinahanglanon sa Diyos wala magpabug-at kanato kondili, hinunoa, gidisenyo aron makahatag kanatog kaayohan. (Isa. 48:​17, 18; Miq. 6:8) Ipakita kon sa unsang paagi ang matag usa sa mga pagpahayag sa gahom ni Jehova adunay gipadayag bahin sa iyang personalidad, sa iyang mga sukdanan, sa iyang katuyoan. Ipunting ang atensiyon diha sa katimbang nga gipakita sa paagi sa pagpasundayag ni Jehova sa iyang mga hiyas. Ipabati sa mga tawo ang imong pagpahayag sa imong kaugalingong mga pagbati mahitungod kang Jehova. Ang imong gugma kang Jehova makatabang sa pagpukaw sa maong gugma diha sa uban.

Ang dinaliang mensahe alang sa atong adlaw nag-awhag sa tanang tawo sa pagkahadlok sa Diyos. Pinaagi sa atong isulti, angay nga magtinguha kita nga pukawon ang maong diyosnong kahadlok. Kini nga kahadlok maoy angay nga kahadlok, kataha kang Jehova, dakong pagtahod alang kaniya. (Sal. 89:7) Naglakip kini sa pagkaamgo nga si Jehova mao ang supremong Maghuhukom ug ang atong kalaoman sa umaabot nga kinabuhi nagdepende sa atong pagkainuyonan niya. (Luc. 12:5; Roma 14:12) Busa, ang maong kahadlok nalambigit sa halalom nga gugma alang kaniya ug, ingong resulta, sa kusganong tinguha nga pahimut-an siya. (Deut. 10:​12, 13) Ang diyosnong kahadlok magtukmod usab kanato sa pagdumot sa daotan, sa pagsugot sa mga sugo sa Diyos, ug sa pagsimba kaniya uban sa bug-os nga kasingkasing. (Deut. 5:29; 1 Cron. 28:9; Prov. 8:13) Kini manalipod kanato batok sa pagtinguha nga moalagad sa Diyos samtang nahigugma sa mga butang sa kalibotan.​—1 Juan 2:15-17.

Ngalan sa Diyos​—“Usa ka Malig-ong Torre.” Ang mga tawong tinuod nga nakaila kang Jehova nakasinatig dakong panalipod. Kini dili tungod kay ilang gigamit ang iyang personal nga ngalan o manganlan ang pipila niya ka hiyas. Kini maoy tungod kay sila nagbutang sa ilang pagsalig diha kang Jehova mismo. Mahitungod kanila, ang Proverbio 18:10 nag-ingon: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.”

Pahimusli pag-ayo ang mga kahigayonan sa pag-awhag sa uban nga mosalig kang Jehova. (Sal. 37:3; Prov. 3:​5, 6) Ang maong pagsalig magpadayag ug pagtuo diha kang Jehova ug sa iyang mga saad. (Heb. 11:6) Sa dihang ang mga tawo “magatawag sa ngalan ni Jehova” tungod kay sila nahibalo nga siya mao ang Soberano sa Uniberso, nahigugma sa iyang mga dalan, ug bug-os nagtuo nga ang matuod nga kaluwasan magagikan lamang kaniya, nan​—gipasaligan kita sa Pulong sa Diyos—​sila mamaluwas. (Roma 10:​13, 14) Samtang nagtudlo ka sa uban, tabangi sila nga maugmad kanang matanga sa pagtuo may kalabotan sa tanang bahin sa kinabuhi.

Daghang tawo nag-atubang ug bug-at kaayong personal nga mga suliran. Basin dili sila makakitag kasulbaran. Awhaga sila sa pagkat-on sa mga dalan ni Jehova, pagsalig kaniya, ug pagpadapat sa ilang makat-onan. (Sal. 25:5) Dasiga sila sa pag-ampo nga tim-os alang sa tabang sa Diyos ug sa pagpasalamat kaniya tungod sa iyang mga panalangin. (Filip. 4:​6, 7) Sa dihang sila makaila na kang Jehova, dili pinaagi lamang sa pagbasag tinong mga pamulong diha sa Bibliya kondili pinaagi sa pagkasinati sa katumanan sa iyang mga saad diha sa ilang mga kinabuhi, mosugod sila sa pagkasinati sa kasegurohan nga nagagikan sa pagkasabot gayod kon unsay gihawasan sa ngalang Jehova.​—Sal. 34:8; Jer. 17:​7, 8.

Gamitang epektibo ang matag higayon aron tabangan ang mga tawo sa pagpabili sa kaalam sa pagkahadlok sa matuod nga Diyos, si Jehova, ug pagsunod sa iyang mga sugo.

“PAGPAMATUOD BAHIN KANG JESUS”

HUMAN sa iyang pagkabanhaw ug sa wala pa siya mobalik ngadto sa langit, si Jesu-Kristo mihatag ug mga instruksiyon ngadto sa iyang mga tinun-an, nga nag-ingon: “Kamo mahimong akong mga saksi . . . hangtod sa kinalay-ang dapit sa yuta.” (Buh. 1:8) Ang maunongong mga alagad sa Diyos sa atong adlaw gibatbat ingon nga mga tawong “may buluhaton sa pagpamatuod bahin kang Jesus.” (Pin. 12:17) Kugihan ka ba gayod sa maong pagpamatuod?

Daghang tawo nga sinserong nag-ingon nga sila nagtuo kang Jesus wala mahibalo bahin sa iyang una-tawhanong paglungtad. Sila wala makaamgo nga siya tinuod nga tawo sa dinhi sa yuta. Sila wala makasabot kon unsay kahulogan sa iyang pagka-Anak sa Diyos. Diyutay ra kaayo silag nahibaloan bahin sa iyang papel diha sa katumanan sa katuyoan sa Diyos. Sila wala mahibalo kon unsay iyang ginabuhat karon, ug sila wala makaamgo kon sa unsang paagi apektado ang ilang mga kinabuhi sa iyang pagabuhaton sa umaabot. Sa pagkasayop sila maghunahuna gani nga ang mga Saksi ni Jehova dili motuo kang Jesus. Maoy atong pribilehiyo ang pagpaningkamot nga ipahibalo ang kamatuoran bahin niining mga butanga.

Aduna pay ubang mga tawo nga dili motuo nga ang usang sama kang Jesus nga gibatbat diha sa Bibliya tinuod nga nagkinabuhi. Ang pipila nag-isip kang Jesus ingong usa lamang ka bantogang tawo. Daghan nagsalikway sa ideya nga siya maoy Anak sa Diyos. Ang “pagpamatuod bahin kang Jesus” taliwala nianang mga tawhana nagkinahanglag dakong paningkamot, pailob, ug pagkamataktikanhon.

Walay sapayan sa punto de bista sa imong mga tigpatalinghog, angay nga mokuha silag kahibalo bahin kang Jesu-Kristo aron makapahimulos sila sa tagana sa Diyos alang sa kinabuhing dayon. (Juan 17:3) Ang tin-awng pagkapahayag nga kabubut-on sa Diyos mao nga ang tanan nga buhi kinahanglang “magaila sa dayag nga si Jesu-Kristo maoy Ginoo” ug kinahanglang magpasakop sa iyang awtoridad. (Filip. 2:9-11) Busa, kita dili yanong makalikay sa isyu sa dihang mahibalag nato ang mga tawo nga adunay lig-on apan sayop nga mga opinyon o dayag nga pagkamapihigon. Bisan pag sa pipila ka kahimtang kita sa walay pagpanuko makahisgot bahin kang Jesus​—bisan diha sa atong unang pagduaw—​sa ubang mga kahimtang, basin kinahanglang himoon nato ang maalamong mga komento nga makatabang sa atong mga tigpatalinghog sa pagsugod paghunahuna sa hustong paagi bahin kaniya. Basin kinahanglan usab nato ang paghunahunag mga paagi aron ipasulod ang dugang nga mga bahin sa ulohan sa umaabot nga mga pagduaw. Bisan pa niana, basin dili posible ang paghisgot sa tanang nalangkit hangtod nga kita magadumalag pagtuon sa Bibliya sa balay uban sa usa ka tawo.​—1 Tim. 2:3-7.

Ang Hinungdanong Papel ni Jesus Diha sa Katuyoan sa Diyos. Kinahanglang atong tabangan ang mga tawo sa pagsabot nga sanglit si Jesus mao “ang dalan” ug ‘walay makaadto sa Amahan kon dili pinaagi kaniya,’ imposible nga mabatonan ang inuyonang relasyon uban sa Diyos nga dili motuo kang Jesu-Kristo. (Juan 14:6) Gawas nga ang usa ka tawo makaamgo sa hinungdanong papel nga gitudlo ni Jehova sa iyang panganay nga Anak, imposible ang pagsabot sa Bibliya. Ngano man? Tungod kay si Jehova naghimo sa maong Anak nga hinungdanong persona aron sa pagpatuman sa tanan Niyang mga katuyoan. (Col. 1:17-20) Ang mga tagna sa Bibliya nasentro niining kamatuorana. (Pin. 19:10) Si Jesu-Kristo mao ang persona nga pinaagi kaniya gitagana ang kasulbaran sa tanang suliran nga gipatungha sa pagrebelde ni Satanas ug sa sala ni Adan.​—Heb. 2:5-9, 14, 15.

Aron masabtan ang papel ni Kristo, kinahanglang ilhon sa usa ka tawo nga ang mga tawo anaa sa makaluluoy nga kahimtang nga gikan niana sila dili makapagawas sa ilang kaugalingon. Kitang tanan natawo sa sala. Kini makaapektar kanato sa nagkalainlaing mga paagi panahon sa atong pagkinabuhi. Sa madugay o sa madali, hinunoa, kini mosangpot sa kamatayon. (Roma 3:23; 5:12) Mangatarongan pinasukad sa maong kamatuoran niadtong imong gisangyawan. Unya ipunting nga pinaagi sa halad lukat ni Jesu-Kristo, si Jehova mahigugmaong nagpaposible sa kaluwasan gikan sa sala ug kamatayon alang niadtong nagpasundayag ug pagtuo sa maong tagana. (Mar. 10:45; Heb. 2:9) Kini magbukas sa dalan aron sila makatagamtam ug walay-kataposang kinabuhi diha sa kahingpitan. (Juan 3:​16, 36) Dili kini posible sa ubang paagi. (Buh. 4:12) Ingong magtutudlo, pribado man o diha sa kongregasyon, ayaw lamang isulti kining mga kamatuorana. Sa maluloton ug mapailobong paagi ugmara diha sa imong mga tigpatalinghog ang pagbati sa pagkamapasalamaton sa papel ni Kristo ingong atong Manunubos. Ang pagpabili sa maong gasa mahimong dakog epekto sa tinamdan, panggawi, ug mga tumong sa kinabuhi sa usa ka tawo.​—2 Cor. 5:​14, 15.

Siyempre, si Jesus kas-a lamang mihalad sa iyang kinabuhi. (Heb. 9:28) Bisan pa niana, siya aktibong nagaalagad karon ingong Hataas nga Saserdote. Tabangi ang uban sa pagsabot kon unsay kahulogan niana. Naagoman ba nila ang kalisdanan, kahiubos, pag-antos, o mga suliran tungod sa pagkadili-maluloton sa mga tawo alirong nila? Sa dihang si Jesus usa ka tawo, iyang naagoman kining tanan. Nahibalo siya kon unsay atong pagbati. Tungod sa pagkadili-hingpit, gibati ba nato nga gikinahanglan ang kaluoy sa Diyos? Kon moampo kita sa Diyos alang sa kapasayloan pinasukad sa halad ni Jesus, si Jesus magsilbing “usa ka magtatabang ngadto sa Amahan.” Sa pagkamahangawaon, siya ‘mangamuyo alang kanato.’ (1 Juan 2:​1, 2; Roma 8:34) Pinasukad sa halad ni Jesus ug pinaagi sa iyang mga pag-alagad ingong Hataas nga Saserdote, kita makaduol sa “trono sa dili-takos nga kalulot” ni Jehova aron makadawat ug tabang sa hustong panahon. (Heb. 4:​15, 16) Bisan pag kita dili hingpit, ang tabang nga gihatag ni Jesus ingong Hataas nga Saserdote makapaarang nato sa pag-alagad sa Diyos uban sa hinlong tanlag.​—Heb. 9:​13, 14.

Dugang pa, si Jesus nagagamit ug dakong awtoridad ingong usa nga tinudlo sa Diyos nga mahimong Ulo sa Kristohanong kongregasyon. (Mat. 28:18; Efe. 1:​22, 23) Sa ingon, siya nagtaganag gikinahanglang pagdumala nga nahiuyon sa kabubut-on sa Diyos. Sa dihang magatudlo ka sa uban, tabangi sila sa pagsabot nga si Jesu-Kristo, ug dili tawo, mao ang Ulo sa kongregasyon. (Mat. 23:10) Gikan sa imong unang pakigkita sa mga interesado, dapita sila sa mga tigom sa lokal nga kongregasyon, diin kita nagtuon sa Bibliya sa tabang sa materyal nga gitagana sa “matinumanon ug maalamong ulipon.” Isaysay kanila dili lamang kon kinsa ang “ulipon” kondili kon kinsa usab ang Agalon aron sila mahibalo sa pagkaulo ni Jesus. (Mat. 24:45-47) Ipailaila sila ngadto sa mga ansiyano, ug ipatin-aw ang Kasulatanhong mga kuwalipikasyon nga kinahanglang makab-ot nila. (1 Tim. 3:1-7; Tito 1:5-9) Isaysay nga ang kongregasyon dili iya sa mga ansiyano kondili sila nagtabang kanato aron mosubay sa mga tunob ni Jesu-Kristo. (Buh. 20:28; Efe. 4:16; 1 Ped. 5:​2, 3) Tabangi kining maong mga interesado sa pagsabot nga adunay usa ka organisado, tibuok-kalibotang kapunongan nga gipalihok ubos sa pagpangulo ni Kristo.

Gikan sa mga Ebanghelyo, atong masayran nga sa misulod si Jesus sa Jerusalem sa hapit na siyang mamatay, ang iyang mga tinun-an nag-abiba kaniya ingong “ang Usa nga nagaanhi ingon nga Hari sa ngalan ni Jehova!” (Luc. 19:38) Samtang ang mga tawo magtuon nga mas ugdang sa Bibliya, ilang makat-onan nga si Jehova karon naghatag kang Jesus sa awtoridad sa pagmando nga magaapektar sa mga tawo sa tanang nasod. (Dan. 7:​13, 14) Sa dihang ikaw mohatag ug mga pakigpulong diha sa kongregasyon o magdumalag mga pagtuon, tabangi ang mga tawo nga makasabot ug magpabili sa kahulogan sa pagmando ni Jesus alang kanatong tanan.

Ipasiugda nga ang atong paagi sa pagkinabuhi nagpakita kon kita tinuod nagtuo nga si Jesu-Kristo maoy Hari ug kon kita masinugtanong nagpasakop sa iyang pagmando. Ipatugbaw ang buluhaton nga gitudlo ni Jesus nga buhaton sa iyang mga sumusunod, human madihogi ingong Hari. (Mat. 24:14; 28:18-20) Hisgoti kon unsay giingon ni Jesus, ang Kahibulongang Magtatambag, bahin sa mas bililhong mga butang sa kinabuhi. (Isa. 9:​6, 7; Mat. 6:19-34) Ipunting ang atensiyon diha sa espiritu nga ipasundayag sa iyang mga sumusunod sumala sa giingon sa Prinsipe sa Pakigdait. (Mat. 20:25-27; Juan 13:35) Magbantay nga dili mangako sa paghukom kon ang uban nagabuhat ba sumala sa angay nilang buhaton, kondili dasiga sila sa paghunahuna kon unsay gipaila sa ilang mga lihok bahin sa ilang pagpasakop sa pagkahari ni Kristo. Samtang himoon mo kini, ilha nga kinahanglan nimong buhaton ang samang butang.

Pagpahiluna Kang Kristo Ingong Patukoranan. Gipanig-ingon sa Bibliya ang buluhaton sa paghimog Kristohanong tinun-an ngadto sa pagtukod sa usa ka estruktura ibabaw kang Jesu-Kristo ingong patukoranan. (1 Cor. 3:10-15) Aron mahimo kini, tabangi ang mga tawo sa pagkaila kang Jesus sumala sa pagkabatbat kaniya sa Bibliya. Mag-amping nga dili sila mosalig kanimo ingon nga maoy ilang ginasunod. (1 Cor. 3:4-7) Ipunting ang ilang atensiyon kang Jesu-Kristo.

Kon ang patukoranan maayong pagkapahiluna, ang mga estudyante makasabot nga si Kristo nagbilin kanatog sulondan aron kita “managsunod pag-ayo sa iyang mga tunob.” (1 Ped. 2:21) Aron makatukod ibabaw niana, dasiga ang mga estudyante sa pagbasa sa mga Ebanghelyo dili lamang ingong matuod nga kasaysayan kondili ingong usa ka sulondan nga pagasundon. Tabangi sila sa paghinumdom ug pagsunod sa mga tinamdan ug mga hiyas nga nagpaila kang Jesus. Dasiga sila sa pagmatikod kon unsay pagbati ni Jesus bahin sa iyang Amahan, kon giunsa niya pag-antos ang mga panental ug mga pagsulay, kon giunsa niya pagpakitag pagpasakop sa Diyos, ug kon giunsa niya pagtagad ang mga tawo ubos sa nagkalainlaing mga kahimtang. Ipasiugda ang kalihokan nga giokupar ni Jesus sa iyang kinabuhi. Unya, sa nag-atubang sa mga desisyon ug mga pagsulay sa kinabuhi, ang estudyante mangutana sa iyang kaugalingon: ‘Unsay buhaton ni Jesus sa maong kahimtang? Ang ako bang buhaton magpakitag angay nga pagpasalamat sa iyang nahimo alang kanako?’

Sa dihang magpakigpulong atubangan sa kongregasyon, ayaw ihinapos nga sanglit ang imong mga igsoon may pagtuo na kang Jesus, dili na kinahanglang ipunting ang espesyal nga atensiyon kaniya. Ang imong isulti makabaton ug labaw nga kahulogan kon himoon mong pasikaranan ang maong pagtuo. Sa dihang maghisgot ka bahin sa mga tigom, ilangkit kana sa papel ni Jesus ingong Ulo sa kongregasyon. Sa dihang hisgotan mo ang ministeryo sa kanataran, ipunting ang espiritu nga gipakita ni Jesus samtang gituman niya ang iyang ministeryo, ug ipadayag ang ministeryo uban sa pagsabot sa ginabuhat ni Kristo ingong Hari sa pagtigom sa mga tawo alang sa kaluwasan ngadto sa bag-ong kalibotan.

Dayag nga labaw ang gikinahanglan kay sa pagkat-on lamang sa paninugdang mga kamatuoran bahin kang Jesus. Aron mahimong matuod nga mga Kristohanon, ang mga tawo kinahanglang magpasundayag ug pagtuo diha kaniya ug tinuod nga mahigugma kaniya. Ang maong gugma modasig sa maunongong pagkamasinugtanon. (Juan 14:​15, 21) Kini makapaarang sa mga tawo nga mobarog nga malig-on diha sa pagtuo ubos sa kalisdanan, sa pagpadayon sa pagsubay sa mga tunob ni Kristo sa tanang adlaw sa ilang kinabuhi, sa pagpamatuod nga sila maoy hamtong nga mga Kristohanon nga malig-ong ‘nakagamot ug natukod ibabaw sa patukoranan.’ (Efe. 3:17) Ang maong dalan maghatag ug himaya kang Jehova, ang Diyos ug Amahan ni Jesu-Kristo.

“KINING MAAYONG BALITA SA GINGHARIAN”

SA DIHANG naghatag ug mga detalye bahin sa ilhanan sa iyang presensiya ug sa kataposan sa sistema sa mga butang, si Jesus mitagna: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”​—Mat. 24:14.

Unsa ba gayod kining mensahe nga kaylap nga imantala? Kini maoy bahin sa Gingharian nga gitudlo ni Jesus nga atong iampo ngadto sa Diyos, nga magaingon: “Paanhia ang imong gingharian.” (Mat. 6:10) Ang Pinadayag 11:15 nagbatbat niini ingong “ang gingharian sa atong Ginoo [Jehova] ug sa iyang Kristo” tungod kay ang awtoridad sa pagmando naggikan kang Jehova ug gihatag kang Kristo ingong Hari. Apan, matikding ang mensahe nga giingon ni Jesus nga imantala sa atong adlaw mas kaylap pa kay sa giwali sa iyang mga sumusunod sa unang siglo. Sila miingon sa mga tawo: “Ang gingharian sa Diyos haduol na kaninyo.” (Luc. 10:9) Si Jesus, ang usang gidihogan aron mahimong Hari, niadto maoy didto sa ilang taliwala. Apan sa Mateo 24:​14, si Jesus mitagna sa tibuok-kalibotang pagpahayag sa laing panghitabo sa katumanan sa katuyoan sa Diyos.

Ang manalagnang si Daniel gihatagan ug panan-awon bahin sa maong hitabo. Iyang nakita ang “usa nga sama sa anak sa tawo,” si Jesu-Kristo, nga nagdawat gikan sa “Karaan sa mga Adlaw,” si Jehova nga Diyos, ug “pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Dan. 7:​13, 14) Ang maong hitabo nga mahinungdanon sa tibuok kalibotan nahitabo sa langit sa tuig 1914. Human niadto, ang Yawa ug ang iyang mga demonyo gitambog sa yuta. (Pin. 12:7-10) Ang daang sistema sa mga butang misulod na sa kataposang mga adlaw niini. Apan sa dili pa kini bug-os wagtangon, ang tibuok-yutang pagmantala ginahimo nga ang Mesiyanikong Hari ni Jehova karon nagmando gikan sa iyang langitnong trono. Ang mga tawo sa bisan diin ginapahibalo. Ang ilang sanong mohatag ug ebidensiya sa ilang tinamdan bahin sa Labing Hataas ingong Magmamando sa “gingharian sa mga tawo.”​—Dan. 4:32.

Tinuod, daghan pa ang palaaboton​—labing daghan pa! Kita nag-ampo gihapon, “Paanhia ang imong gingharian,” apan dili uban sa ideya nga ang pagtukod sa Gingharian sa Diyos maoy umaabot pa. Hinunoa, kini maoy uban sa ideya nga ang langitnong Gingharian molihok sa desididong paagi aron tumanon ang mga tagna nga sama sa Daniel 2:44 ug Pinadayag 21:2-4. Kini maoy maghimo sa yuta nga usa ka paraiso nga punog mga tawo nga nahigugma sa Diyos ug sa ilang isigkatawo. Samtang kita magawali “niining maayong balita sa gingharian,” isaysay nato ang maong mga palaaboton. Apan kita masaligon usab nga nagpahibalo nga si Jehova naghatag na ug bug-os nga awtoridad sa pagmando sa iyang Anak. Ginapasiugda mo ba kining maayong balita sa dihang magasangyaw ka bahin sa Gingharian?

Pagpatin-aw Bahin sa Gingharian. Sa unsang paagi makatuman kita sa atong gitudlong buluhaton nga ipahayag ang Gingharian sa Diyos? Mapukaw tingali nato ang interes pinaagi sa pagsugod sa mga panagkabildo bahin sa nagkalainlaing mga ulohan, apan angay nga sa taudtaod mahimong tin-aw nga ang atong mensahe maoy bahin sa Gingharian sa Diyos.

Ang usa ka hinungdanong bahin niining buluhatona naglangkit sa pagbasa o pagkutlog mga kasulatan nga naghisgot sa Gingharian. Sa dihang hisgotan mo ang Gingharian, paneguroa nga kadtong gipakigsultihan nakasabot kon unsa kini. Tingali labaw pa ang gikinahanglan kay sa pagsulti lamang nga ang Gingharian sa Diyos maoy usa ka kagamhanan. Ang pipila ka tawo basin malisdan sa paghunahuna sa usa ka butang nga dili makita ingong usa ka kagamhanan. Mahimong mangatarongan ka kanila sa nagkalainlaing mga paagi. Pananglitan, ang grabidad dili makita, apan kini adunay gamhanang epekto diha sa atong mga kinabuhi. Dili kita makakita sa Usa nga naghimo sa balaod sa grabidad, apan dayag nga siya adunay dakong gahom. Ang Bibliya nagtumong kaniya ingong “Hari nga walay kataposan.” (1 Tim. 1:17) O ikaw mahimong mangatarongan nga sa usa ka dakong nasod, daghang tawo ang wala pa gayod makaadto sa kaulohang siyudad o makakita sa personal sa ilang magmamando. Sila mahibalo niini pinaagig mga balita. Sa susama, ang Bibliya, nga gipatik sa kapig 2,200 ka pinulongan, nagsugilon kanato bahin sa Gingharian sa Diyos; kini nagpahinabo nga kita mahibalo kon kinsay gihatagan ug awtoridad ug kon unsay ginabuhat sa Gingharian. Ang Bantayanang Torre, nga gipatik sa mas daghang pinulongan kay sa bisan unsang laing mantalaan, gideboto sa ‘Pagpahayag sa Gingharian ni Jehova,’ sumala sa giingon sa atubangan nga hapin.

Aron matabangan ang mga tawo sa pagsabot kon unsa ang Gingharian, makahisgot ka sa pipila sa mga butang nga buot nila nga maoy itagana sa mga kagamhanan: kasegurohan sa ekonomiya, pakigdait, kagawasan gikan sa krimen, dili-madapigong pagtagad sa tanang etnikong mga pundok, edukasyon, ug pag-atiman sa panglawas. Ipakita nga pinaagi lamang sa Gingharian sa Diyos nga kini ug ang tanang ubang angayng mga tinguha sa katawhan bug-os nga matagbaw.​—Sal. 145:16.

Paningkamoti nga mapukaw ang tinguha sa bahin sa mga tawo nga mahimong mga sakop sa Gingharian, diin si Jesu-Kristo nagamando ingong Hari. Ipunting ang mga milagro nga iyang gihimo ingong mga pasiuna kon unsay iyang himoon ingong langitnong Hari. Hisgoti kanunay ang madanihong mga hiyas nga iyang gipasundayag. (Mat. 8:​2, 3; 11:28-30) Ipatin-aw nga iyang gitugyan ang iyang kinabuhi alang kanato ug human niadto gibanhaw siya sa Diyos ngadto sa walay-kamatayon nga kinabuhi sa mga langit. Maoy gikan didto nga siya nagamando ingong Hari.​—Buh. 2:29-35.

Ipasiugda nga ang Gingharian sa Diyos karon nagamando na gikan sa mga langit. Apan, amgoha nga ang kadaghanang tawo wala maghunahuna nga ilang nasinati ang mga kahimtang nga maoy ebidensiya niini. Ilha kana, ug mangutana kon nahibalo ba sila kon unsay giingon ni Jesu-Kristo nga maoy ebidensiya niini. Ipatugbaw ang pipila sa mga bahin sa daghag-bahin nga ilhanan sa Mateo kapitulo 24, Marcos kapitulo 13, o Lucas kapitulo 21. Unya pangutana kon nganong ang pagkaentrono ni Kristo sa langit mosangpot sa maong mga kahimtang sa yuta. Ipunting ang atensiyon sa Pinadayag 12:7-10, 12.

Ingong aktuwal nga pananglitan kon unsay ginabuhat karon sa Gingharian sa Diyos, basaha ang Mateo 24:​14, ug batbata ang tibuok-kalibotang programa sa edukasyon sa Bibliya nga nagakahitabo karon. (Isa. 54:13) Sultihi ang mga tawo bahin sa nagkalainlaing mga tunghaan nga gipahimuslan sa mga Saksi ni Jehova​—tanan gipasukad sa Bibliya, tanan gipahigayon nga walay bayad. Ipatin-aw nga dugang pa sa atong balay-balay nga ministeryo, kita nagtanyag ug libreng pagtudlo sa Bibliya diha sa balay ngadto sa mga indibiduwal ug mga pamilya diha sa kapig 230 ka nasod. Unsang tawhanong kagamhanan ang makaarang sa pagtagana nianang dako kaayong edukasyonal nga programa dili lamang alang sa mga sakop niini kondili alang sa katawhan sa tibuok yuta? Dapita ang mga tawo sa pag-anha sa Kingdom Hall, sa pagtambong sa mga asembliya ug mga kombensiyon sa mga Saksi ni Jehova, aron makita ang ebidensiya kon sa unsang paagi ang maong edukasyon nagaapektar sa mga kinabuhi sa mga tawo.​—Isa. 2:2-4; 32:​1, 17; Juan 13:35.

Apan sa unsang paagi makaamgo ang tagbalay kon sa unsang paagi maapektahan ang iyang kaugalingong kinabuhi? Ikaw mataktikanhong makapunting nga ang katuyoan sa imong pagduaw mao ang paghisgot sa higayong nabuksan alang sa tanan aron sa pagpili sa kinabuhi ingong mga sakop sa Gingharian sa Diyos. Sa unsang paagi? Pinaagi sa pagkat-on kon unsay gikinahanglan sa Diyos ug pagkinabuhi nga nahiuyon niini karon.​—Deut. 30:​19, 20; Pin. 22:17.

Tabangi ang Uban nga Unahon ang Gingharian. Bisan human sa pagdawat sa usa ka tawo sa mensahe sa Gingharian, adunay mga desisyon nga kinahanglang himoon. Unsa ka dakong bili ang iyang ihatag sa Gingharian sa Diyos diha sa iyang kinabuhi? Giawhag ni Jesus ang iyang mga tinun-an nga “magpadayon . . . sa pagpangita pag-una sa gingharian.” (Mat. 6:33) Sa unsang paagi makatabang kita sa mga isigka-Kristohanon sa paghimo niana? Pinaagi sa paghatag ug maayong panig-ingnan sa atong kaugalingon ug pinaagi sa paghisgot sa mga kahigayonan nga anaa. Usahay, pinaagi sa pagsukna kon ang usa ka tawo nakahunahuna ba ug tinong mga posibilidad ug pinaagi sa pagpakig-ambit sa mga kasinatian aron ipakita kon unsay ginabuhat sa uban. Pinaagi sa paghisgot sa mga asoy sa Bibliya sa paagi nga makapalalom sa gugma sa usa alang kang Jehova. Pinaagi sa pagpasiugda sa pagkamatuod sa Gingharian. Pinaagi sa pagpasiugda kon unsa gayod ka hinungdanon ang buluhaton sa pagmantala sa Gingharian. Ang labing dakong kaayohan kasagarang mahimo, dili pinaagi sa pagsulti sa mga tawo sa angay nga buhaton, kondili pinaagi sa pagpukaw diha kanila sa tinguha nga buhaton kana.

Sa walay duhaduha, ang hinungdanong mensahe nga kinahanglang imantala natong tanan nagsentro sa pangunang atensiyon kang Jehova nga Diyos, Jesu-Kristo, ug sa Gingharian. Ang bililhong mga kamatuoran mahitungod niini angayng ipasiugda diha sa atong publikong pagsangyaw, diha sa atong mga kongregasyon, ug diha sa atong personal nga mga kinabuhi. Sa dihang atong buhaton kana, atong gipasundayag nga kita tinuod nga nagapahimulos sa edukasyon sa Teokratikanhong Tunghaan sa Ministeryo.