Pagsangyaw ug Pagpanudlo sa Tibuok Yuta

Maine, U.S.A.: Gisunod sa atong mga igsoon ang panig-ingnan ni Jesus ingong “mangingisda ug mga tawo”

TIBUOK KALIBOTAN

• KAYUTAAN 239

• MAGMAMANTALA 7,782,346

• ORAS NGA NAGUGOL SA KANATARAN 1,748,697,447

• PAGTUON SA BIBLIYA 8,759,988

AFRICA

• KAYUTAAN 58

• POPULASYON 968,989,710

• MAGMAMANTALA 1,312,429

• PAGTUON SA BIBLIYA 2,999,639

Di Na Siya Magpataktak sa Iyang Gisabak

Si Saba nga tag-iyag tindahan nagpuyo sa Addis Ababa, ang kaulohan sa Ethiopia. Usa ka adlaw, siya gitanyagan sa duha ka sister ug magasing Pagmata! nga naghisgot bahin sa aborsiyon. Gipasulod ni Saba ang mga sister ug kahilakong mitug-an nila bahin sa plano niyang pagpataktak sa iyang gisabak. Samtang nag-estoryahay, natandog ang ilang pagbati ug sila nanghilak. Niadtong adlawa, si Saba nakadesisyon nga dili idayon ang aborsiyon ug gisultihan ang iyang bana sa hinungdan. Ngadtongadto, nanganak siyag matahom nga batang babaye. Misugod sab siya pag-Bible study ug nabawtismohan. Karon, usa na siya ka malipayong payunir. Ang iyang bana nag-study sab ug ato nang igsoon karon, ug niadtong Abril 2012, nabawtismohan sab ang duha sa ilang mga anak.

‘Puwede Bang Makigsulti Niya?’

Usa ka magtatan-aw sa sirkito sa Ethiopia namalaybalay uban sa usa ka brader. Sa usa ka balay, naestorya nila ang katabang nga babaye ug ilang gipangutana kon puwede bang makigsulti sa ulo sa panimalay. Dihang mitubag siya nga dili, nangutana sila kon puwede bang magbilin na lag basahon para sa iyang amo. Misulod ang katabang aron mananghid. Pagbalik niya, siya miingon nga tan-awon una sa iyang amo ang basahon.

Busa gihatagan siya sa mga brader ug usa ka magasin aron ipakita sa iyang amo. Human sa pipila ka gutlo, siya mibalik ug miingon nga gusto niyang basahon to. Unya ang usa sa mga brader miingon, “Kon dili siya makagawas, puwede ba ming mosulod aron makigsulti niya?” Misulod na sab ang katabang aron mangutana. Apan dugay siyang nakabalik, busa nahibulong sila kon mobalik pa ba ang katabang. Unya mibalik siya ug gipasulod sila. Nasayran nila nga ang tagbalay, si Yirgu, tigulang na ug napulo ka tuig nang naglubog sa banig, nga dili makabangon ni makalingkod. Nadugay ang katabang kay giilisan pa diay niya siya ug naghiposhipos sa kuwarto.

Gisangyawan siya sa mga brader sa maayong balita. Kay nakaangay sa iyang nadungog, si Yirgu nagpa-Bible study. Samtang nagpadayon ang iyang pag-study, miarang-arang ang iyang panglawas. Wa madugay, siya makabangon ug makalihoklihok na gamit ang wheelchair. Ngadtongadto misugod siyag tambong sa tigom ug nabawtismohan sa bag-o pang distritong kombensiyon.

Ang Relihiyong Nagpatik sa mga Libro sa Iyang Amahan

Si Calvin, nga taga-Zimbabwe, kuwatro anyos pa dihang namatay ang iyang amahan. Nabinlan lang siyag usa ka bag nga may sulod nga Bag-ong Kalibotang Hubad ug librong Tagna ni Isaias—Kahayag Alang sa Tibuok Katawhan, Tomo 1. “Padayong makig-uban sa relihiyong nagpatik niining mga libroha kay sila nagtudlo sa kamatuoran,” giingnan siya sa iyang amahan.

Pagkamatay sa iyang inahan, si Calvin gisagop sa iyang lola. Sulod sa siyam ka tuig, midumili si Calvin pagkuyog sa iyang lola sa simbahan, kay nagtuo nga may adlaw rang makaplagan ang relihiyon nga nagpatik sa mga libro nga gibilin kaniya sa iyang amahan.

Usa ka adlaw, nahibalag sa iyang lola ang usa nato ka sister. Kay wa mahibalo nga Saksi diay ang sister, siya miingon nga may apo siyang gahig ulo nga di mokuyog sa simbahan. Magpunay hinuon kinig basa ma-Dominggo sa libro nga gibilin sa iyang amahan. Ang sister nangutana kon unsay ngalan sa libro, ug ang lola mitubag nga morag usa to sa “way-hinungdang mga libro sa Watchtower.”

Ang sister miingon nga buot niyang mahimamat ang bata. Pagkita nila, labihang lipaya ni Calvin. Dihadiha, gisugdan siyag Bible study gamit ang librong Unsay Tinuod nga Gitudlo sa Bibliya? ug misugod dayog tambong sa tigom bisag grabeng gisupak sa iyang lola. Determinado siyang mounong sa kamatuoran ug mahinamong nagpaabot sa panahon nga makita pag-usab ang iyang inahan ug amahan sa pagkabanhaw. Si Calvin nabawtismohan sa Agosto 2012.

“Ang Diyos nga Imong Ginasimba Kusganon”

Si Caro taga-Uganda. Usa ka bulan pa siyang nag-Bible study dihang grabe siyang gisupak sa iyang bana nga si Martin nga usa ka barangan. “Tungod sa imong mga libro, ang espiritu sa katigulangan di na makasulod sa balay,” mipasangil siya. Iyang gidagmalan ang iyang asawa ug gihulgang patyon kon dili mohunong pag-study. Siya mihunong sab pagsuportar sa iyang pamilya. Bisan pa niana, si Caro nagpabiling kalmado. Naghardin siya aron mabuhi ang iyang pamilya, ug nagpadayon sa pag-study. Sa ulahi, dihang nakita niyang nameligro ang iyang kinabuhi, siya mihawa sa balay. Kakha-tuka ang iyang kahimtang. Apan dihang nadungog niyang nasakit ang iyang mga anak, gipalit niyag tambal ang gamay niyang tinigom nga kuwarta.

Ngadtongadto, si Caro giteleponohan sa iyang bana. “Balik na sa balay,” matod niya. “Akong nakita nga kusganon ang Diyos nga imong ginasimba ug siya nag-uban kanimo. Sultihi ang mga nagtudlo nimo nga magtuon sab ko. Gusto na kong magbag-o.” Seryoso si Martin. Ang pamilya nagkahiusa ug malipayon na karon. Si Martin ug Caro nabawtismohan sa kombensiyon sa Agosto 2012.

Bugtong Magwawali sa Hilit nga Lungsod

Samtang nagpuyo nga layo sa iyang balangay sa Kenya, si David nagsugod pag-Bible study uban sa mga Saksi ni Jehova. Apan sa wala madugay, siya mibalik sa iyang balangay sa Lokichar, hilit nga dapit sa amihanan-kasadpang bahin sa Kenya. Mga 165 kilometros pa ang gilay-on sa kinadul-ang kongregasyon, sa lungsod sa Lodwar. Sulod sa upat ka tuig, si David wala kaayoy kontak sa mga Saksi pero tigsangyaw siya sa iyang mga silingan ug paryente, nga nagpaambit kanila sa gamay niyang nakat-onan sa Bibliya. May misanong, ug sa wala madugay siya may mga Bible study na. Sa 2007 gikontak niya ang mga igsoon sa Lodwar ug gipadayon ang iyang Bible study, nga kaduha sa usa ka bulan mobiyahe sakay sa motorsiklong taksi, ug minibus.

Samtang nag-uswag ang kahibalo ni David, misamot sab ang iyang kasibot sa ministeryo. Bisag dili pa bawtismado, nagtukod siyag temporaryong “Kingdom Hall” nga gama sa lapok ug giatpag kogon ug duol sa iyang balay, diin nagdumala siyag mga tigom uban sa mga interesado. Apan ang uban sa balangay wala malipay sa iyang pagsangyaw, ug sa duha ka tuig, siya gipasipalahan ug gidagmalan. Kas-a, siya gikulata hangtod nawad-ag panimuot, kay kono nagpasulod siyag “pagsimba sa Yawa” diha sa balangay. Apan, human siya makapangayog tabang sa usa ka opisyal sa gobyerno, ang pagpanagmal mihunong, ug siya padayong nagsangyaw. “Ang akong kinabuhi nasentro sa kamatuoran, ug bisag makaatubang pag daghang pagsupak, dili ko mohunong,” matod ni David.

Si David nabawtismohan niadtong 2009, ug siya karon usa na ka ministeryal nga alagad ug regular payunir. Siya ug ang iyang 15-anyos nga anak lalaki mao lamang ang mga magmamantala sa ilang dapit. Apan sa Abril 2012, mga 60 ka taga-balangay ang mitambong sa Memoryal sa kamatayon ni Kristo didto sa temporaryong “Kingdom Hall” duol sa balay ni David.

“Pamatud-i sa Bibliya nga Siya Sayop”

Si Janet nga usa ka regular payunir sa Ghana nagbasa sa librong Gitudlo sa Bibliya samtang nagsakay sa bus. May magwawali nga misakay, nagsermon, ug unya nangayog donasyon sa mga pasahero. Si Janet miingon kaniya: “Ingon ka nga si Jesus ug ang Diyos usa ra. Nan, kinsay nakigsulti kang Jesus dihang gibawtismohan siya?”

Ang magwawali miingon, “Usa na ka misteryo.”

Gibuksan ni Janet ang kapitulo 4 sa librong Gitudlo sa Bibliya, mipilig pipila ka teksto, ug gipabasa kana sa pipila ka pasahero. Iyang gipatin-aw ang kalainan tali ni Jesus ug sa Diyos nga Labing Gamhanan, si Jehova.

“Barangan kang dako!” miingon ang magwawali.

Unya gidepensahan siya sa mga pasahero, nga miingon, “Pamatud-i sa Bibliya nga siya sayop imbes nganlan nimo siyag barangan.” Suko nga mikawas sa bus ang magwawali. Usa ka batan-ong babaye tupad ni Janet miingon kaniya: “ Abi nakog ang Jehova ngalan sa simbahan sa mga Saksi. Kon dili pa tungod sa diskusyon ninyo sa magwawali, di ko mahibalo nga ngalan diay kana sa Diyos.”

Nagpadayon ang ilang panaghisgot, ug gikuha ni Janet ang numero sa telepono sa babaye ug misaad nga kontakon siya. Pag-abot niya sa balay, gisuginlan sa babaye ang iyang lola sa nahitabo. Ang iyang lola nahingangha usab sa pagkahibalo nga ang ngalan sa Diyos maoy Jehova. Gihikay ni Janet nga maduaw sila sa mga Saksi aron mapadayon ang panaghisgot. Karon ang babaye ug iyang lola tigtambongan na sa tigom.

KAYUTAAN SA AMERIKA

• KAYUTAAN 57

• POPULASYON 946,087,916

• MAGMAMANTALA 3,861,145

• PAGTUON SA BIBLIYA 4,196,922

Nakaplagan ang Kamatuoran sa Wala Damhang Dapit

Ang 20-anyos nga si Andrea nanglugnot, namalikas, ug nanghulga pa dihang gipugos siya sa mga guwardiya pagpasulod sa usa ka prisohan sa Bolivia. Kay kusgan ug bagis, siya gikahadlokan sa uban. Si Leidy, usa ka Saksi nga napriso tungod sa sayop nga akusasyon, wala mahadlok kang Andrea, hinunoa naluoy niya. Kada buntag, mobasag kusog si Leidy ug usa ka awit sa songbok. Pagkabati niadto ni Andrea, siya nangutana, “Saksi ni Jehova ka?”

Dihang mitando si Leidy, si Andrea miingon: “Saksi ni Jehova si Mama, ug kaniadto tigkuyogan ko niya sa tigom. Siyay nag-Bible study nako.” Si Andrea mihilak. Sulod sa pipila ka adlaw, si Leidy seryosong nakig-estorya kaniya bahin sa Bibliya, ug sa adlaw sa paghusay kang Andrea, silang duha nag-ampo alang sa tabang ug giya ni Jehova. Si Andrea nakagawas ra ug nagpadayon sa pagkat-on bahin kang Jehova. Dali ra siyang nakuwalipikado ingong di-bawtismadong magmamantala, ug karon hapit nang magpabawtismo.

Gipahimuslan ni Leidy ang iyang pagkapriso. Sa wa pa makagawas, nakasugod siyag 21 ka Bible study. Magduawan siya karon sa prisohan katulo sa usa ka semana aron ipadayon ang pag-study kanila.

Tungod sa www.pr418.com nga Web Site

Dominggo kadto, sa tingpamulak sa 2011, dihang misulod sa Kingdom Hall sa Canada ang isputing nga magtiayon uban sa ilang duha ka bata. Nagtuo ang tanan nga mga Saksi ni Jehova sila gikan sa laing siyudad. Si Dominic nga usa ka ministeryal sa kongregasyon nakaila dayon sa bana. Na-Bible study diay niya siya mga 17 na ka tuig sa miagi. Sulod sa duha ka tuig, ang magtiayong si Marc-André ug Josée tig-download ug tigbasag magasing Bantayanang Torre ug Pagmata! diha sa www.pr418.com ug nakaamgo nga angayng motambong sa Kingdom Hall ang tibuok nilang pamilya. Gisugdan dayon silag Bible study, ug misugod pagtambong sa tanang tigom. Duha ka bulan pa lang silang nag-study, ang pamilya nagsugod na pagpahigayog Pamilyahanong Pagsimba kada semana. Sila padayong nag-uswag, ug si Josée mihatag sa iyang unang bahin sa Teokratikanhong Tunghaan sa Ministeryo niadtong Mayo 2012.

‘Gibahinan Ko Niya sa Paniudto ug Gihatagan sa Iyang Kalo’

Samtang nagtambong sa 2010 distritong kombensiyon sa Chile, ang diyes anyos nga si Marcelo nakamatikod nga ang edarang lalaki nga mitapad niya walay dalang basahon.

“Wa siyay Bibliya,” siya mihunghong sa iyang inahan.

“Paambita siya sa imoha,” mihunghong sab ang iyang inahan. Busa miirog si Marcelo duol sa lalaki nga si Victor ug gibasa nila ang matag teksto nga gisitar. Panahon sa intermisyon, si Marcelo miingon sa iyang inahan, “Wa siyay pagkaon.” Giawhag siya sa iyang inahan nga bahinan si Victor sa iyang balon. Busa gihatagan siya ni Marcelo ug sandwich ug usa ka tasang tsa. Samtang naniudto si Victor, gipakita ni Marcelo kaniya ang tanang teksto nga iyang nahinumdoman.

Pagkahapon, bantang kaayo ang adlaw. Milingi na sab si Marcelo sa iyang inahan ug miingon, “Wa siyay kalo.”

Ang iyang inahan mitubag, “Ihatag ang imo.” Gihimo niya kadto. Human sa programa, nanamilit na si Marcelo ug Victor sa usag usa.

Sa distritong kombensiyon pagkasunod tuig, si Marcelo nagtan-aw-tan-aw sa palibot aron susihon kon mitambong ba si Victor. Nalipay si Marcelo kay nakita niya siya, ug nagkorbata pa! Pagkakita ni Victor kang Marcelo, siya miingon: “Nia ko ron tungod niining bataa. Sa miaging tuig, nakadawat kog imbitasyon sa kombensiyon, ug mitambong ko. Gipaambit niya ang iyang Bibliya kanako, gibahinan sa iyang paniudto, ug gihatagan sa iyang kalo. Karon, ako nag-Bible study na!” Si Victor usa na ka di-bawtismadong magmamantala karon.

Gidayeg sa Usa ka Kolumnista

Sa iyang lindog sa mantalaan, usa ka inilang babayeng kolumnista sa Venezuela mihubit sa iyang eksperyensiya dihang nangayo siyag teknikal nga tabang sa customer service sa kompaniya sa telepono sa nasod. Dili matinahoron ang operator kaniya ug wala siya tabangi. Pagtawag niyag balik, matinahoron siyang gitubag sa usa ka batan-ong lalaki nga nagpailang si Misael. Siya misulat: “Talagsaon ang kalulot, pagtahod, kaandam motabang, ug kooperasyon niini nga batan-on. Sa tabang niya, nasulbad ang problema ug nakakat-on sab ko kon unsaon pagsulbad ang mga problema sa umaabot.”

Dihang ang kolumnista nagpasalamat kaniya, si Misael miingon nga siya usa ka Saksi ni Jehova ug naningkamot pagtratar sa iyang isigkatawo sumala sa gitudlo ni Jesus. Ang kolumnista nakigsulti sa superbisor ni Misael ug gidayeg niya ang maayong serbisyo sa ilang empleyado. Diha sa iyang lindog, siya misulat nga si Misael maoy usa ka sulondang lungsoranon sa Venezuela ug usa ka Saksi ni Jehova. Siya mihinapos: “Gikinahanglan nato sa serbisyo publiko ang mga tawo nga sama niya.”

“Ayaw na Mo Pagpagahig Ulo”

Nalipay kaayo ang 15-anyos nga si Gabriela, usa ka amang, dihang nabawtismohan siya niadtong Oktubre 2011 sa senyas nga pinulongan nga kombensiyon sa Ecuador. Eksayted kaayo siya nga pagka-Lunes sa eskuylahan, siya mihangyo sa iyang magtutudlo nga mohatag siyag mubong pahibalo sa klase. Misugot ang magtutudlo, ug mibarog si Gabriela ug misenyas: “Gusto kong ipahibalo nga sa miaging Biyernes, Sabado, ug Dominggo, mitambong kog kombensiyon diin ako nabawtismohan ingong Saksi ni Jehova. Gusto sab nakong ipahibalo nga haduol na ang kataposan niining sistema sa mga butang. Gamay na kaayo ang nabiling panahon! Kinahanglang magbag-o na mo. Ayaw na mo pagpagahig ulo. Kahadloki ninyo ang Diyos!” Nakadayeg niini ang iyang mga klasmet.

Pagka-paniudto, si Katty nga usa ka di-aktibong Saksi nga amang miduol kang Gabriela ug nangutana bahin sa kombensiyon. Si Gabriela way lipodlipod nga miingon: “Nindot kaayo! Karon nga bawtismadong Saksi na ko, gusto kong magmaunongon kang Jehova. Busa di na ko makig-amiga nimo kay hugaw ang imong pagkinabuhi. Kon makigsuod ko nimo, madaot ang akong relasyon sa Diyos. Kinahanglang magbag-o na ka. Importanteng mag-ampo kang Jehova ug makig-estorya sa mga ansiyano. Nasayod kong mahimo nimo kana.” Tungod sa prangka apan mahigugmaong tambag ni Gabriela, si Katty nakigsulti sa mga ansiyano, midawat sa ilang tabang, ug naaktibo na usab sa ministeryo.

Gigamit Niya ang Laptop sa Iyang Magtutudlo

Usa ka 16-anyos nga sister sa United States ang gipangutana sa tibuok klase bahin sa iyang relihiyon, apan wala siyay dalang basahon, ni Bibliya. Kay gusto niyang matubag gikan sa Bibliya ang ilang mga pangutana, siya nanghulam ug laptop sa iyang magtutudlo ug gibuksan ang www.pr418.com nga Web site. Gawas nga natubag ang tanan nilang pangutana, natudloan sab sila kon unsaon paggamit sa Web site. Iyang giingnan sila nga kon may mga pangutana sila sa Bibliya ug wala silay mapangutan-ang Saksi, puwede silang moderetso sa Web site aron makita ang tubag. Paglabay sa pipila ka adlaw, namatikdan niya nga diyutay na lag pangutana ang iyang mga klasmet. Dihang gipangutana niya sila kon ngano, ang uban miingon nga kanunay silang mo-access sa Web site diha sa ilang cell phone, lakip ang magtutudlo nila!

ASIA UG TUNGANG SIDLAKAN

• KAYUTAAN 48

• POPULASYON 4,222,869,785

• MAGMAMANTALA 674,608

• PAGTUON SA BIBLIYA 662,736

Nalikayan ang Dugoong Away

Usa ka grupo sa mga Saksi miagi sa gamayng balangay sa Indonesia aron motambong sa serbisyo sa paglubong. Namatikdan sa usa ka payunir ang mga batan-ong lalaki sa daplin sa dalan. Nakigsulti siya kanila ug gibinlan silag brosyur nga Pamati sa Diyos ug Mabuhi Ka sa Walay Kataposan. Sa laing higayon, usa ka sister ang miagi sa maong dapit sa iyang pagpauli. Siya giduol sa usa ka lalaki nga nagbitbit sa brosyur nga Pamati ug Mabuhi ug nagpasalamat kaniya sa paghatag niini sa iyang mga anak. “Nakaluwas ni sa kinabuhi sa akong mga anak!” matod niya. Kay wala man mahibalo bahin sa unang pag-estoryahay, ang sister nangutana kon unsay nahitabo. Gisaysay sa amahan nga nagplano ang iyang mga anak sa pag-atake sa usa ka baryo. Kostumbre nila nga ipanimalos ang usa nila ka higala. Apan pagkabasa nila sa brosyur, ilang nahibaloan nga ang mga tawong makig-away sa uban dili makasulod sa umaabot nga Paraiso. Busa mikalma sila ug wala idayon ang ilang plano. Nalikayan ang dugoong away tungod sa mensahe sa Bibliya diha sa brosyur.

Usa ka Homoseksuwal Nagbag-o

Si Rek nagdako sa tipikal nga pamilya sa Cambodia, apan sukad sa pagkabata, gibati niya ug sa iyang kaluha nga sila babaye. Monyeka ang ilang dulaan ug gusto nilang magsininag binabaye. Ang ilang inahan naulaw ug naglibog kon unsay buhaton sa pagpakgang kanila. Magsul-ob silag panglalaki paingon sa eskuylahan apan mag-ilis ug binabaye inig-abot didto. Sa edad nga 16, miapil silag beauty contest para sa mga homoseksuwal ug nadiskobre sila sa industriya sa showbiz. Busa misugod na silag gawas sa mga programa sa TV ug comedy show. Wala madugay, si Rek nagkinabuhi na gyong homoseksuwal ug nakigbarkada sa mga sama niya.

Ang inahan ni Rek misugod ug simba sa simbahan ug pugson niya si Rek sa pagkuyog. Bisag misugot si Rek nga magbestig panglalaki, wala niya paputli ang iyang taas nga buhok. Kanunay siyang pakaulawan sa pastor ug tamayon ang iyang paagi sa kinabuhi. Bisan pa niana, nakahunahuna si Rek sa pagtuon sa Bibliya diha sa simbahan. Sa unang semana, misayo siyag mata ug mibisikletag pipila ka kilometro paingon sa simbahan, apan gibalibaran siya kay wa ganahi ang pastor sa pagtudlo kaniya. Pagkasunod semana, naglagot si Rek dihang wa siya gawsa sa pastor.

Pag-uli ni Rek, giingnan siya sa iyang kaluha nga dihay babayeng miduaw ug nagtanyag ug Bible study. Gibinlan siyag librong Unsay Tinuod nga Gitudlo sa Bibliya? Ang kaluha nagsugod pagtuon uban sa sister ug sa bana niini. Human sa unom ka bulan, ang kaluha ni Rek miingon nga di pa siya andam magbag-o, busa miundang siya pag-study. Apan si Rek natandog pag-ayo sa 1 Corinto 6:9, 10, ug nasabtan pag-ayo niya kon unsay angay niyang himoon. Pinaagi sa makugihong pagtuon ug pagbasa sa Bibliya, pag-ampo, ug pagtambong sa tigom, nahinloan niya ang iyang kinabuhi. Ang iyang inahan nag-Bible study na sab ug maayo ang iyang pag-uswag. Dihang nabawtismohan si Rek, nakahilak ang iyang inahan ug miingon, “Nalipay kaayo kong nakakita sa akong anak nga nabawtismohan ingong lalaki.” Si Rek karon regular payunir na.

Gitalikdan sa Espiritista ang Kanhing Pagkinabuhi

Si Or-Ya usa ka espiritista, tambalan, magtatambag, ug mananag-an. Nahimamat siya sa magtiayong espesyal payunir sa Haifa, Israel, samtang nagsangyaw sila sa balaybalay. Giingnan niya sila: “Kon bahin na sa Diyos, dayon mo!” Puno ang iyang balay sa mga gamit sa espiritismo. Siya miingon nga makadawat kono siyag mensahe gikan sa Diyos, usahay pinaagi sa “espiritu” sa namatayng rabbi.

Misugot siya nga mag-Bible study sa librong Gitudlo sa Bibliya. Duha ka adlaw una miduaw ang magtiayon, siya nag-ampo sa Diyos nga unta may makatudlo niya bahin sa Bibliya nga way sagol nga interpretasyon sa rabbi. Paglabayg usa ka bulan, siya nangutana, “Naa ba pod moy mga kauban sa inyong relihiyon?” Mitambong siyag tigom sa kongregasyon ug nakadayeg sa mainitong pag-abiabi kaniya. Sukad niadto tigtambongan na siya sa tigom.

Human sa duha ka bulan nga pag-study, si Or-Ya nangutana bahin sa umaabot nga asembliya: “Di ba sa mga asembliya man magpabawtismo? Duha na lang diay ka bulan nga maandam ko ninyo sa bawtismo!” Una, iyang gilabay ang tanan niyang mahalong gamit sa espiritismo. Dayon gihunong niya ang espiritismo ug misugod pagsangyaw, nga nagtanyag sa librong Gitudlo sa Bibliya ug mga magasin sa kanhi niyang mga pasyente ug kliyente. Dihang nasakit siya, wala niya gamita ang iyang kanhing mga paagi sa pagtambal. Kay gibiyaan ang kanhing trabaho, wala siyay kita sulod sa upat ka bulan. Bisan pa niana, nagtakda siyag mga kondisyon kon unsay pangitaon niyang trabaho—upat ka adlaw sa usa ka semana, unom ka oras sa usa ka adlaw—aron duna siyay panahon para sa teokratikanhong kalihokan. Sa ulahi nakakita siyag haom nga trabaho. Dayon gibaligya niya ang iyang dakong balay ug nangabang ug gamayng apartment.

Kuwalipikado na si Or-Ya alang sa bawtismo. Apan usa ka semana una pa ang asembliya, nabalian siyag bitiis. Pero nagpabawtismo gihapon siya bisag gisemento ang iyang bitiis. Karon si Or-Ya usa ka aktibong magmamantala, nga nagsangyaw sa iyang kanhing mga kliyente ug nagdumalag mga Bible study.

Membro sa Kulto Nakakaplag sa Kamatuoran

Gisugdan pag-Bible study ang mga amang nga kaluhang lalaki nga nagpuyo sa usa ka halayong bukid sa Pilipinas. Membro sila sa kulto nga nagtuong dili sila madutlag bala basta isul-ob lang nila ang ilang anting-anting ug purong. Gibansay sila sa paggamit ug mga hanting, sundang, ug pusil. Sila nakig-away sa mga rebelde sa kabukiran. Gitugtan sila sa kulto nga magpa-Bible study sa mga Saksi basta dili sila pugson sa pagbiya sa kulto.

Siyempre, gidasig sa mga igsoon ang kaluha sa paghimog kaugalingong desisyon base sa ilang nakat-onan sa Bibliya. Ang usa sa kaluha mibati nga dili siya makahimog kausaban aron makaalagad sa Diyos. Apan, ang usa nagpadayon sa pag-study. Aron dasigon siya, gibuksan sa nag-Bible study niya ang Bibliya ug misenyas: “Ang imong ngalan nga Samuel naa sa Bibliya. Si Samuel diha sa Bibliya nag-alagad sa matuod nga Diyos, si Jehova, hangtod sa iyang pagkatigulang. Makahimo sab ka sa pag-alagad kang Jehova nga matinumanon.” Natandog niini si Samuel. “Kon ang akong ngalan naa sa Bibliya,” siya miingon, “kinahanglang modapig sab ko kang Jehova.” Iyang gipahibalo ang kulto nga mobiya na siya sa bukid. Gisunog niya ang tanan niyang anting-anting ug mga gamit sa espiritismo, ug kusog ang iyang pag-uswag. Karon, bawtismado na siya ug masibotong nagtabang sa ubang amang nga makakat-on sa kamatuoran sa Bibliya.

Gilutos ang Usa ka Bata

Si Rajiv nagpuyo sa hilit nga balangay sa amihanang India. Sa nag-grade four siya sa edad nga nuybe, ang iyang maestro nga Saksi ni Jehova nagtudlo sa mga bata ug maayong pamatasan gamit ang librong Pagkakat-on Gikan sa Dakong Magtutudlo. Nagustohan ni Rajiv ang iyang nakat-onan ug gipadapat kini. Giingnan niya ang iyang maestro nga dili na siya mamakak ug dili na makig-away sa iyang mga eskolmet ug bahinan na niyag paniudto ang walay balon.

Sa nagkadaghan ang iyang nahibaloan bahin sa Paraisong yuta, iya kining gisulti ngadto sa uban diha sa ilang balangay ug sa mga tawong mahibalag niya dihang magbiyahe sakay sa tren. Tungod niini, nasuko ug naulaw ang iyang ginikanan. Gidid-an nila siya sa pagsulti bahin kang Jehova ug Jesus. Kay dili mopatuo, bun-ogon nila siya. Pag-abot gikan sa eskuylahan, tagoan sa iyang inahan ang tanan niyang sinina aron dili siya makalakaw sa pagpaambit sa iyang bag-ong pagtuo. Dili nila siya patulgon sa iyang higdaanan, ug hatagan lang siyag gamayng pagkaon. Dihang wala mosaler kining tanan, nagpatawag silag pari aron bag-ohon ang iyang hunahuna.

Ang pari miestar ug pipila ka adlaw sa ilang balay ug gipugos niya si Rajiv sa pagyukbo sa imahen. Dihang miingon si Rajiv nga ang imahen maoy bato lamang ug dili buhing diyos, ang pari miingon nga kinahanglan niyang ‘abrihan ang mata sa iyang kasingkasing.’ Niining paagiha lang “makita” ni Rajiv ang diyos diha sa imahen. Mikuha si Rajiv ug papel ug gisulatan kinig “100 rupee.” Gihatag niya kini sa pari ug mihangyo nga palitan siyag chocolate ug iuli ang sukli. Ang pari miingon nga dili siya uto-uto; papel lang kini ug walay bili. “Kon imo lang abrihan ang mata sa imong kasingkasing,” si Rajiv mitubag, “makita nimo ang tinuod nga kuwarta niining papela.” Sa kasuko, gigunitan sa pari ang ulo ni Rajiv ug gipayukbo kini sa imahen. “Imong napayukbo ang akong ulo sa imahen,” miingon si Rajiv, “pero dili ang akong kasingkasing.” Ang pari mibiya, nga nag-ingon nga imposible nang mabag-o ang bata ug kon magdugay pa siya basin apil pod siyang mawad-ag pagtuo. Gibalhin si Rajiv sa iyang ginikanan sa laing eskuylahan. Pero wa gyod siya moundang sa pagsulti kang bisan kinsa nga gustong mamati bahin kang Jehova ug sa gisaad nga Paraiso. Karon siya diyes anyos na ug padayong nagsalig sa tabang ni Jehova aron mahuptang lig-on ang iyang pagtuo.

Nakaplagan Niya ang Bibliya nga Iyang Gipangita

Dihang si Larisa nagsangyaw sa usa ka tindera sa bookstore sa Armenia, dihay babaye nga misulod ug nangutana sa tindera bahin sa “Bag-ong Kalibotan” nga Bibliya. Ang tindera mitubag nga wala, pero duna silay Bibliya sa pinulongang Armenian. “Sayon ba kanang sabton?” nangutana ang kustomer. Mibasa ang tindera ug pipila ka bersikulo ug miingon, “Masabtan ra man.” Kay dili kombinsido, ang kustomer miinsistir nga gusto niyag “Bag-ong Kalibotan” nga Bibliya. Si Larisa nahinumdom nga duna siyay Armenian nga Bibliya sa iyang bag. Gipakita niya kini sa babaye ug iyang gihangyo siya sa pagbasa sa ulohan. Gibasa kini sa babaye, “Bag-ong Kalibotang Hubad.” Mao gayod kini ang Bibliya nga iyang gipangita!

Ang kustomer miingon nga ang iyang anak nga babaye ug umagad nga tua sa Greece nag-Bible study uban sa mga Saksi ni Jehova. Kay dili pa makasabot ug Greek, gihangyo nila siya nga magdalag Armenian nga Bag-ong Kalibotang Hubad inigduaw niya kanila. Gihatag sa sister ang Bibliya ug miingon, “Palihog ihatag ni nila ug ingna nga gasa ni gikan kang Jehova.” Nalipay kaayo ang babaye dihang si Larisa mitanyag usab nga tabangan siyang makakat-on sa Bibliya. Nagbayloay silag numero sa telepono aron ang babaye makasugod pag-Bible study inigbalik niya gikan sa Greece.

EUROPE

• KAYUTAAN 47

• POPULASYON 738,679,198

• MAGMAMANTALA 1,595,888

• PAGTUON SA BIBLIYA 841,260

Giuli Niya ang Pitaka

Si Nina regular payunir nga taga-Bosnia. Siya may Bible study nga usa ka pamilya nga Rom ug kaliwat. Usa ka adlaw, samtang naglakaw sa dalan ang 10-anyos nga anak babaye sa maong pamilya, siya nakakitag pitaka nga may kuwarta, mga credit card, ug dokumento. Kon wa pa siya magtuon sa Bibliya, mahimong isipon sa bata nga ang napunitang pitaka maoy bililhong gasa, apan human konsultaha ang iyang inahan, siya midesisyon nga ihatod kana sa polis. Dalayegon kadto nga desisyon kay ang pamilya pobre ug wala ganiy ikapalit ug pan. Mga duha ka oras human mahatag ang pitaka sa natingalang polis, gitawgan sila nga pabalikon sa presinto. Naghulat na didto ang tag-iya sa pitaka aron pasalamatan sila ug pahalipayan. Gihatagan sila sa tag-iya ug mga $30 (U.S.), nga katumbas sa duha ka adlawng suhol.

Nainteres Siya sa Ulohan

Mao pay pagkahumag sangyaw ni Nihad, nga taga-Bosnia. Pagpaingon niya sa iyang awto, dihay tawo nga nagtindog tupad niini. Sa gitimbaya siya ni Nihad, ang tawo miingon: “Excuse me, nakita nako ang magasin diha sa imong awto nga may ulohang, ‘Kon sa Unsang Paagi Mahimong Maayong Amahan.’ Ganahan kong mobasa niana. Usa na ko ka oras nga nagpaabot dinhi. Puwede bang pangayoon nako na?” Malipayong gihatag ni Nihad ang magasin ug gisangyawan siya.

Nahupayan ang Tripulante sa Tanker

Dihang ang usa ka magtiayong nagsangyaw sa pantalan sa Rotterdam, Netherlands miduaw sa usa ka tanker, sila nakahibalag ug masulub-ong tripulante, usa ka chief engineer. Nanglugmaw ang iyang luha nga nag-estorya nila nga nakasinati silag sunodsunod nga kalamidad, apil ang diriyot nga pagbanggaay, ug pagkadaot sa ilang barko. Busa mihangyo siya, “Puwede ba ming iampo ninyo?” Ang magtiayon mitanyag nga mohatag silag makapalig-ong pakigpulong sa Bibliya. Pagkaugma, sa alas siyete sa gabii, 15 sa 16 ka tripulante ang miabiabi sa magtiayon uban sa duha pa ka laing magtiayon didto sa puwente sa barko. Human sa pangbukas nga pag-ampo, usa ka brader ang mipakigpulong sa ulohang “Mga Kalamidad—Pagbuot ba sa Diyos?” Nabasa sa mga tripulante ang mga teksto sa Bibliya kay nagdala ang mga Saksi ug mga Bibliya ug gitabangan ang tanan sa pagpangita sa mga teksto. Human sa paniklop nga pag-ampo, ang tanang tripulante pabiling naglingkod ug nakig-estorya sa mga igsoon. Nahupayan sila ug nagpasalamat. Usa kanila miingon, “Tubag ni sa among mga pag-ampo.” Sila mikuhag 20 ka libro, mga Bibliya, ug ubang publikasyon, dayon ang mga igsoon gitunolan sa kapitan ug sobre nga may $200 (U.S.) isip donasyon sa literatura.

Siya Nag-ampo nga Unta Makatabang

Si Irene, nga taga-Sweden, misulat: “Ako 80 anyos na, ug tungod kay daghan nag gipamati sa lawas dili na ko makagawas sa kanataran. Nag-ampo ko kang Jehova nga matabangan unta nako ang akong nasangyawan kaniadto ug andam na karong maminaw o magpaduaw.

“Usa ka adlaw mi-ring ang telepono, ug gitubag kana sa akong bana. Usa ka babaye ang mitawag ug miingon: ‘Mitawag ko kay kamo ra gyoy akong mahinumdoman. Puwede bang magpaduaw sa imong misis aron tun-an ko sa Bibliya? Nagtuon kog Bibliya mga 15 o 20 ka tuig kanhi, apan sa buhi pa ang akong bana supak siya sa akong pagtuon maong miundang ko.’

“Nahinumdom kong nakabisita ko sa babaye uban sa usa ka sister nga maoy nag-study niya. Natingala ko kay akoy iyang nahinumdoman. Busa nakigkita ko niya. Sukad niadto, kada semana ming mag-study. Mitambong siya sa Memoryal ug sa espesyal nga pakigpulong. Tigtambongan na pod siya sa mga tigom. Matag adlaw kong nagpasalamat kang Jehova sa pagtubag sa akong pag-ampo.”

Dili Puwede ang Chocolate sa Donation Box

Sa Italy, gusto sa otso anyos nga si Sergio nga pamatud-an ngadto sa mga ansiyano nga andam na siyang mahimong di-bawtismadong magmamantala. Usa ka adlaw, miuban siya sa iyang amahan dihang miadto kini sa magtiayong kapin nag 70 ang edad aron ayohon ang trangka sa ilang balay. Si Sergio nagdalag mga magasin. “Samtang nagtrabaho si Papa,” matod ni Sergio, “akong gitanyagag mga magasin ang bana. Natingala siya ug iyang gitawag ang iyang asawa ug gipakita kadto. Dayon akong gisulat ang ilang ngalan, adres, ug numero sa telepono aron mabalikduaw nako sila. Unya gihatagan ko sa iyang asawa ug dakong chocolate.” Paglabayg pila ka adlaw, si Sergio giubanan sa usa ka ansiyano aron balikduawon ang magtiayon. Si Sergio ang mitulpok sa doorbell, ug paggawas sa asawa, siya miingon nga buot niyang hatagan sila sa librong Unsay Tinuod nga Gitudlo sa Bibliya? Nalipay ang asawa nga midawat niana ug gihatagan na sab siyag chocolate. Si Sergio miingon: “Di man nako ikasulod sa donation box ang chocolate, maong gikaon na lang nako ni.” Siya midugang: “Nakita sa mga ansiyano nga gusto na gyod kong mahimong di-bawtismadong magmamantala.”

Gustong Makakat-og Dugang ang Pastor

Pastor si Simeon sa usa ka relihiyon sa Gurkovo, Bulgaria, diin didto walay mga Saksi. Sa iyang personal nga pagtuon sa Bibliya, iyang nasabtan nga lahi ang gitudlo niini ug ang gitudlo sa simbahan. Usa ka adlaw, nakadawat siya sa atong mga magasin samtang nagbiyahe sa tren. Nalipay kaayo si Simeon sa iyang nakat-onan nga si Jehova mao ang matuod nga Diyos ug walay Trinidad. Kay gustong makakat-og dugang, misulat siya sa sangang buhatan ug sa tanang relihiyon nga iyang nahibaloan. Usa lang ka relihiyon ang mitubag ug giingnan siya nga dili tagdon ang mga butang nga “walay pulos.” Apan ang sangang buhatan nagpadalag duha ka Saksi nga mibiyaheg mga 35 kilometros gikan sa Kazanlŭk. Gisugdan nilag Bible study si Simeon uban sa iyang pamilya. Nagustohan ni Simeon ang iyang nakat-onan, ug gidapit niya ang iyang mga silingan ug mga higala sa pag-apil sa ilang study. Wala madugay 25 na ka tawo ang miapil sa ilang Bible study kada semana. Human makaapil ug Bible study sa unang higayon, nanglugmaw ang luha sa 75-anyos nga silingang babaye kinsa miingon, “Mas daghan pa kog nasabtan sulod sa usa ka oras kay sa 30 ka tuig nga pagsigeg simba.” Moabot ug 60 ka tawo ang motambong sa mga tigom sa Gurkovo nga gidumala matag bulan sa mga brader nga taga-Kazanlŭk, ug 79 ang mitambong sa Memoryal.

“Ayaw Gyod ug Biya sa Imong Relihiyon”

Namatikdan ni Valya, 15-anyos nga sister nga taga-Ukraine, nga nag-itom ang iyang maestra pagsulod sa eskuylahan ug nanghubag ang mga mata niini. Pagkahibalo nga namatay ang inahan sa maestra, si Valya nakahunahuna sa pagpabasa kaniyag mga teksto sa Bibliya bahin sa pagkabanhaw aron sa paghupay kaniya. Nagdala si Valya ug Bibliya ug duha ka brosyur, Unsay Mahitabo Kanato sa Dihang Mamatay Kita? ug Sa Dihang ang Imong Minahal Mamatay. Naplano siya nga duolon ang maestra inigkahuman sa klase. Matod niya: “Gikulbaan kaayo ko samtang nagpaabot sa gawas sa opisina sa maestra, busa nag-ampo ko kang Jehova nga iya kong tabangan.”

Pagsulod ni Valya sa opisina, nangutana ang maestra, “Unsay imong tuyo?”

“Ma’am, condolence. Nakasabot ko sa imong gibati. Namatyan sab kog Lolo pipila na ka tuig ang milabay.”

Natandog ang maestra sa gihimo ni Valya. Kahilakon siya nga miingong wa gyoy bisan usa sa iyang mga paryente o kauban sa trabaho nga naghupay kaniya sama sa gihimo ni Valya. Dayon, gibasa ug gipatin-aw ni Valya ang Pinadayag 21:3, 4. Human niana gidawat sa maestra ang mga brosyur ug miingon, “Lahi gyod ka sa ubang estudyante.”

Si Valya miingon, “Ginabasa nako ang Bibliya ug gipaningkamotan nakong mapadapat kana, ug gisunod pod nako ang akong ginikanan.”

Sa hangyo sa maestra, gidad-an siya ni Valya ug Bibliya ug librong Gitudlo sa Bibliya. Nagpasalamat pag-usab ang maestra ug giingnan si Valya: “Ang inyong relihiyon mao ang tinuod nga relihiyon, ug maayo kaayo ang imong ginikanan nga nagtudlo nimo kon unsay husto. Ayaw gyod ug biya sa imong relihiyon.”

Sayop ang Iyang Natawgan

Sa unang adlaw sa 2011 nga distritong kombensiyon sa Malakasa, Greece, gitawgan ni Natalie ang iyang amahan sa cell phone aron mangutana sa bus nga sakyan paingon sa asembliyahanan. Apan sayop ang iyang natawgan, ug way nitubag. Taudtaod, gitawgan siya sa lalaki nga iyang natawgan aron magpakisayod kon kinsay mitawag. Apan nagsugod na ang programa. Gusto untang patyon ni Natalie ang iyang cell phone, apan lahi ang iyang natulpok maong nakonektar na hinuon ang tawag. Wa siya masayod nga nakapaminaw ang lalaki sa pakigpulong sa tsirman ug nainteres kini.

Nag-text ang lalaki ug nangutana: “Kinsa man ka? Pari ka?” Pagkahuman sa sesyon sa buntag, nabasa ni Natalie ang text ug siya mibalos: “Di ko pari. Saksi ni Jehova ko, ug nagtambong kog kombensiyon.”

Mitawag pag-usab ang lalaki pagka-Sabado ug nangutana kon duna pa bay kombensiyon. Gisangyawan sa amahan ni Natalie ang lalaki ug kini miingon, “Sa pipila lang ka minuto, natubag sa pakigpulong nga akong nadunggan sa cell phone ang daghang pangutana nga nakapalibog nako.” Gihasol diay sa mga demonyo ang pamilya sa lalaki ug wala siya masayod kon kinsa ang maong mga espiritu ug kon nganong nahitabo kini. Siya miingon: “Abi ninyo, di gyod ko ganahang makig-estoryag mga Saksi ni Jehova, apan kon posible, gusto unta kong makig-estorya sa tawo nga nagpakigpulong.”

Siyempre, maestorya niya ang nagpakigpulong. Mitambong ang lalaki pagka-Dominggo ug nahingangha siyang nakakita sa malipayon ug desenteg sinina nga mga tawo. Way nagpasad nga basura, way namalikas, way nanigarilyo. “Wa ko magtuo nga may mga tawo pang sama ninyo nga naglungtad niining kalibotana!” matod niya. “Morag naa ko sa laing kalibotan.” Giubanan siya sa amahan ni Natalie ngadto sa opisina sa tsirman diin iyang naestorya ang tsirman. Ang lalaki nakadayeg sa kombensiyon ug sa mga tubag nga iyang nadunggan. Gidawat niya ang librong Gitudlo sa Bibliya, usa ka Bibliya, ug mga magasin, ug miuyon siya nga duawon.

OCEANIA

• KAYUTAAN 29

• POPULASYON 38,495,300

• MAGMAMANTALA 94,924

• PAGTUON SA BIBLIYA 59,431

“Ang Kinanindotang Awit nga Akong Nadunggan Sukad”

Sa Savaii, Samoa, sugdan ang adlaw sa eskuylahan pinaagi sa pagkantag relihiyosong awit sa tanang estudyante. Apan si Celina, singko anyos, ug si Levaai, sayis anyos, matinahorong miingon sa prinsipal nga dili sila moapil kay mga Saksi ni Jehova sila. Tungod niini, sila mahimong silotan. Apan ang prinsipal nagtuo nga kon iyang pakaulawan ang mga bata, mokanta ra sila. Busa siya miingon, “Aw, kon di mo mokanta sa among awit, ang inyo maoy kantaha.” Gikanta ni Celina ug Levaai ang awit 111, “Siya Motawag,” nga bag-o pa nilang nasag-ulo sa ilang Pamilyahanong Pagsimba. Pagkahuman nilag kanta, kahilakon ang prinsipal. Siya miingon: “Kana ang kinanindotang awit nga akong nadunggan sukad. Puwede otrohon ninyo nag kanta?” Sila mikanta pag-usab. Dayon ang prinsipal miingon, “Sukad karon, ang inyong mga awit nay akong ipakanta ninyo.”

Si Jesus ra Gyoy Iyang Giampoan

Dihay lalaki nga taga-Fiji, nga ministro sa usa ka relihiyon, ang miapil sa pagtuon sa Bibliya sa laing tawo. Sa maong pagtuon, iyang nadunggan nga si Jesus dili mao ang Diyos. Kay naglibog bahin niini, siya wala makatulog. Busa giingnan siya sa iyang asawa, “Ayaw nag balik didto!” Apan wala kadto mapapas sa iyang hunahuna. Pagkasunod semana, miapil na pod siya sa pagtuon. Pipila lang ka adlaw human sa ikaduha niyang pag-apil sa pagtuon ug bisag wala pay nag-Bible study niya, miadto siya sa ilang simbahan ug miundang sa iyang pagkaministro. Nakurat ug nasuko pag-ayo ang iyang mga paryente ug ubang membro sa ilang relihiyon. Gawas nga mibiya sa ilang relihiyon, iya pang gibiyaan ang dakog suweldo nga trabaho. Dali ra niyang nasabtan sa Bibliya ang kamatuoran bahin kang Jesus, apan naglisod siya pag-ampo kang Jehova kay si Jesus ra gyoy iyang giampoan. Paglabay sa daghang bulan, nakaampo ra siya kang Jehova. Karon nagsangyaw na siya sa maayong balita ngadto sa uban ug nagtabang kanila sa pag-ila ug paghigugma kang Jehova.

Gamayng Komunidad Midawat sa Kamatuoran

Ang isla sa Makatea sa South Pacific duna lay 62 ka molupyo. Teritoryo kini sa kongregasyon sa mga Saksi ni Jehova sa Tahiti. Siyam ka molupyo dinhi ang gidumalahag regular nga pagtuon sa Bibliya pinaagig telepono. Mga 15 ka tawo ang magtigom sa balay sa usa sa mga Bible study ug mamati sa mga tigom, nga gipahigayon didto sa Tahiti. Lakip sa mga nag-study mao ang batan-ong babaye nga sinaligan sa ilang simbahan ug gidahom nga mahimong diakonisa. Di pa dugay, mibalik siya sa ilang simbahan aron ipatin-aw kon nganong wala na siya mosimba didto. Iyang gipakita sa Bibliya nga ang usa ka babaye dili angayng manudlo diha sa kongregasyon. Gipatin-aw usab niya ang papel ni Jesu-Kristo ug ang kahulogan sa Panihapon sa Ginoo, nga saulogon kas-a lang sa usa ka tuig ug dili matag Dominggo. Dugang pa, iyang gisaysay nga 144,000 lang ang makauban ni Kristo sa langit ug sila lang ang angayng moambit sa mga emblema sa Memoryal. Kay nadasig sa iyang panig-ingnan, dihay laing babaye nga mibiya sa simbahan ug karon regular nang nagtuon sa Bibliya uban sa mga Saksi.

Usa ka Pamilya Midawat sa Imbitasyon

Aron makatambong sa Memoryal ang mga dili aktibo, giduaw sa duha ka ansiyano nga taga-Solomon Islands si Joshua, nga wala na makatambong ug tigom sukad sa 1998. Si Joshua uban sa 20 ka membro sa iyang pamilya mibaktas ug duha ka oras aron motambong sa Memoryal. Nakahilak si Joshua tungod kay mainiton silang giabiabi sa kongregasyon. Daghan sa iyang pamilya ang mitambong usab sa espesyal nga pakigpulong. Human sa pakigpulong giingnan nila ang mga ansiyano nga gusto silang magpa-Bible study, ug 15 kanila ang gidumalahan ug pagtuon.

Nahibalo Siya sa Tubag

Sa kapig 1,000 ka isla sa teritoryo sa Guam, kapig 100 niini ang gipuy-an. Apan 13 lang niini ang duol sa usa ka kongregasyon. Tungod kay daghan pang isla ang wala maadtoig mga Saksi, ang mga igsoon nangitag mga paagi aron maduaw sila. Sa Abril 2012, usa ka grupo sa mga magmamantala ang milawig gamit ang sakayang delayag paingon sa Polowat, usa sa kinalay-ang mga isla. Halos wala pay nakaabot nga langyaw sa Polowat. Ang mga lalaki nagbahag, naggamag mga baroto, ug nanguma.

Gipangutana sa usa ka magmamantala ang usa ka batan-ong lalaki didto, “Unsay mahitabo dihang mamatay ta?”

“Kabalo ko sa tubag ana!” miingon ang batan-on. Iya dayong gikuha ang librong Ikaw Mabuhing Walay Kataposan sa Paraiso sa Yuta sa Chuukese nga pinulongan, ug gitan-aw ang kaundan. Gitudlo niya ang kapitulo 8, nga nag-ulohang “Unsay Mahitabo sa Pagkamatay?” ug gisaysay ang iyang nakat-onan gikan sa libro.

Apan diin man siya adtong libroha? Sa 2009, ang mga magmamantala gikan sa dakong isla sa Chuuk nagsangyaw sa mga pantalan aron maabot ang mga tawong mobiyahe paingon sa lagyong mga isla ug nakapahimutang silag mga librong Mabuhing Walay Kataposan. Dihay tawo nga mopaingon sa Polowat ang misugot nga magdalag usa ka kartong libro nga iyang ipanghatag sa iyang mga silingan, ug usa sa mga nahatagan mao ang batan-ong lalaki.

Sa wala pa mobiya sa Polowat, kadaghan duawa sa mga igsoon ang batan-on aron dasigon siya ug tudloan kon sa unsang paagi makabenepisyo siya sa pagtuon sa Bibliya. Ilang gitudloan usab siya kon unsaon pagpangita sa mga teksto ug sa pagsulat sa importanteng mga punto diha sa panaplin sa iyang libro.

Makapalipay gayod nga bisan sa lagyong mga isla diin walay telebisyon, radyo, mantalaan, o Internet, ang atong mga basahon nakatabang sa mga tawo sa pagkakat-on sa kamatuoran diha sa ila mismong pinulongan!

Tulo ka Bala, Tulo ka Rason

Si Anna, nga bag-o pang nag-20 anyos, maoy di-bawtismadong magmamantala dihang migrabe ang gubat sibil sa Bougainville, Papua New Guinea. Sa 1991, siya usa sa unom ka hamtong nga Saksi ug pito ka bata gikan sa Arawa Congregation nga napugos pag-eskapo ngadto sa kabugangan nga halos way dala. Sulod sa duha ka tuig, sila nagpuyo sa biniyaang mga balay ug naningkamot sa pagpangitag pagkaon. Sila magtigom gamit ang duha lang ka libro, ang Bibliya ni Anna ug ang librong Nahiusa sa Pagsimba sa Bugtong Matuod nga Diyos. Sila nag-uban sa pag-ampo, pagkantag mga awit sa Gingharian, ug pagsangyaw sa ilang mahibalag.

Nakita sila sa mga rebeldeng sundalo ug ilang giagda ang duha ka brader sa pag-anib kanila, apan ilang gitahod ang neyutralidad sa mga Saksi. Dihay sundalo nga nagpakita kang Anna ug tulo ka bala ug miingon, “Kon di ko nimo minyoan, patyon tika.” Gihatagan siya ni Anna ug tulo ka rason—usa ka rason matag bala—kon nganong dili siya makigminyo niya, ug ang pangunang rason mao nga ang Bibliya nag-ingon nga magminyo “lamang diha sa Ginoo.” (1 Cor. 7:39) Busa milakaw ang lalaki.

Sa 2012, human mahibaloi nga nanginahanglag daghang magwawali didto sa Arawa, si Anna nga regular payunir na karon, mibalik didto uban sa iyang partner nga payunir usab aron motabang sa pagtukod ug grupo. Siya gipangutana kon wala ba siya mahadlok nga mobalik sa lugar nga iyang nakita nga grabe ang pinatyanay ug kalisod panahon sa gubat. Siya mitubag: “Nalipay hinuon kong mobalik dinhi. Walay makababag sa buluhaton ni Jehova, bisan ang gubat sibil.”