1945-1990 “Nagpadangat sa Daghan Ngadto sa Pagkamatarong.”—Dan. 12:3. (Bahin 4)

Pagsulbad sa Pagkailiteret

Sayo sa 1963, sa ikaduhang pagduaw sa Sierra Leone, gihisgotan ni Milton Henschel ang problema nga dugaydugay nang gisagubang sa sangang buhatan. Iyang giawhag ang mga igsoon nga pangusgan pa ang pagpakigbugno sa pagkailiteret (dili makabasag makasulat).

Ang pipila ka kongregasyon nagdumala nag Iningles nga klase sa pagbasag pagsulat. Human sa duaw ni Brader Henschel, gisugdan sa mga igsoon ang klase sa ilang pinulongan. May mga kongregasyon nga nagtudlog duha o tulo ka pinulongan. Popular kaayo ang maong mga klase nga daghang magmamantala sa nasod nangapil niana.

Sa 1966, ang mga igsoon sa Liberia nakagamag may-hulagway nga kartilya o basahon sa pinulongang Kisi para sa pagtudlog basa ug pagsulat. Dihang gipakita kana ngadto sa opisyales sa gobyerno sa Liberia, sila nakadayeg ug midesidir nga kana ipatik ug ipanagtag nga libre. Kana gipanagtag sa Guinea, Liberia, ug Sierra Leone, ug gatosang Kisi ang nakakat-on sa pagbasag pagsulat. Sa ulahi, gigama usab ang mga kartilya para sa ubang pinulongan, busa mas daghan pa ang nakakat-on sa pagbasag pagsulat.

Tungod sa klase, ang mga tawo natudloan dili lang sa pagbasag pagsulat kondili miuswag sab sila sa espirituwal. Tagda si Sia Ngallah, 50 anyos nga di-bawtismadong magmamantala nga iliteret. Migamit siyag itom ug pula nga pisi aron irekord ang oras sa pagsangyaw. Human makasangyawg usa ka oras, mohimo siyag usa ka baligtos sa itom nga pisi. Human sa usa ka balikduaw, mohimo siyag usa ka baligtos sa pulang pisi. Si Sia miapil sa klase, busa sayon na niyang narekord ang oras. Siya miuswag, nagpabawtismo, ug epektibo nang mosangyaw ug motudlo.

Daghan pang kongregasyon karon sa Sierra Leone ug Guinea ang dunay klase sa pagbasag pagsulat. Usa ka taas ug ranggo nga opisyal sa gobyerno sa Sierra Leone miingon sa mga brader sa sangang buhatan, “Gawas sa inyong pagtudlog Bibliya, dalayegon ang pagtabang ninyo sa mga tawo aron makakat-on sa pagbasag pagsulat.”

“Mga Bato” Maninggit

Dihang makamao nang mobasa ang daghan sa lainlaing tribo, midako ang panginahanglan sa paghubad. Ang kadaghanan sa tribo may pipila ra o walay basahon diha sa ilang pinulongan. Ang mga edukado sa Sierra Leone nagbasag Iningles ug ang taga-Guinea nagbasag French. Unsay mahimo aron dunay mga basahon sa Bibliya sa ilang pinulongan?

Sa 1959, ang duha ka graduwado sa Gilead naghubad ug usa ka tract ug pulyeto sa Mende, pero diyutay ra ang napanagtag. Napulo ka tuig sa ulahi, ang mga pulyetong “Kining Maayong Balita sa Gingharian” ug Living in Hope of a Righteous New World gihubad sa Kisi. Mga 30,000 niini ang napanagtag ug gigamit sa pag-Bible study.

Sa 1975, ang sangang buhatan misugod pagpatik sa tun-anang mga artikulo sa Bantayanang Torre sa Kisi. Di masukod ang kalipay sa mga magmamantalang Kisi! Usa ka brader misulat: “Katingalahan ang gihimo ni Jehova kanamo. Wala kami makaeskuyla. Kaniadto, kami samag mga bato​—dili makasulti. Pero karon, kay duna nay Bantayanang Torre sa Kisi, kami makasulti na bahin sa dagkong buhat ni Jehova.” (Luc. 19:40) Ang ubang publikasyon gihubad usab sa Kisi.

Kadaghanan karon sa Sierra Leone ug Guinea nagbasa gihapon sa atong Iningles o French nga publikasyon, kay kana ang gigamit sa tigom sa kongregasyon. Apan di pa dugay, nagkadaghan ang basahon sa lokal nga mga pinulongan sama sa Guerze, Kisi, Krio, Maninkakan, Mende, Pular, ug Susu. Ang mga brosyur nga Pamati sa Diyos ug Mabuhi Ka sa Walay Kataposan ug Listen to God mabatonan nianang tanang pinulongan. Kini sayon nga gamiton sa pagtudlo sa dili kaayo antigong mobasa aron ilang masabtan ang talagsaong mensahe sa Bibliya.

Pagtukod sa Sangang Buhatan

Sayo sa katuigang 1960, ang mga igsoon sa Freetown nangita nag lote nga katukorag bag-ong sangang buhatan. Pagka-1965, sila nakapalit ug lote sa Wilkinson Road. Kini nag-umbaw sa dagat sa nindot nga residensiyal nga dapit sa siyudad.

Ang usa ka matahom nga bilding gidisenyo nga may Kingdom Hall, puy-anag misyonaryo, ug mga opisina. Panahon sa konstruksiyon, trapik kaayo sa Wilkinson Road kay gustong motan-aw niini ang mga drayber ug pasahero. Ang bilding gipahinungod sa Agosto 19, 1967. Mga 300 ang mitambong, lakip ang kadagkoan sa gobyerno ug karaang mga Saksi nga gibawtismohan ni “Bible” Brown sa 1923.

Ang bag-ong bilding nakapausab sa panglantaw sa daghan bahin sa buluhaton sa mga Saksi ni Jehova. Kini tubag usab para sa pipila ka relihiyosong kritiko nga nag-ingong dili kuno magdugay ang mga Saksi sa Sierra Leone. Ang bag-ong bilding nagpamatuod nga magpadayon ang mga Saksi ni Jehova.

Mga Misyonaryo Nakatabang sa Pag-uswag

Sukad sa 1975, padayong nangabot ang mga misyonaryo sa Gilead ug nakatabang sa pag-uswag sa buluhaton sa Sierra Leone ug Guinea. Ang pipila nakaalagad na sa ubang nasod sa Africa ug daling nakapasibo sa lokal nga kahimtang. Ang uban bag-o pa sa Africa. Makaagwanta kaha sila niining gitawag ug “lubnganan sa mga tawong puti”? Tagda ang pipila ka komento.

“Ang mga tawo mapaubsanon ug gutom sa espirituwal. Makapalipayng makita nga ang kamatuoran nakabag-o sa ilang kinabuhi.”​—Hannelore Altmeyer.

“Lisod maagwanta ang klima ug mga sakit sa tropiko. Pero balewala ra kana sa kalipay nga makatabang ug mga matinud-anog kasingkasing sa pag-alagad kang Jehova.”​—Cheryl Ferguson.

“Nakakat-on ko pagpailob. Dihang nangutana ko kanus-a moabot ang mga bisita sa usa ka sister, siya mitubag: ‘Karon tingali. Basin ugma. O kaha sa sunod adlaw.’ Iyang nakita nga ako nakurat gyod busa siya miinsistir, ‘Pero moabot gyod to sila!’”​—Christine Jones.

“Nag-ubag puyo ang 14 ka misyonaryo gikan sa lainlaing tribo ug kultura diha sa puy-anan sa misyonaryo sa Freetown. Duha ra mig kasilyas, usa rag shower, washing machine, ug kosina. Gamay ra ang suplay sa pagkaon ug dili pa maayog klase. Kalit mawala ang koryente ug usahay dangtag pipila ka adlaw. Kadaghanan namo gimalarya ug nataptag ubang sakit sa tropiko. Bisag kini tingali hinungdan nga kami mohunong, nakakat-on mi sa paghiusa, pagpasaylo, ug pagkalipay bisag lisod ang kahimtang. Makapalipay ang pagsangyaw, ug nagkasuod ang mga misyonaryo.”​—Robert ug Pauline Landis.

“Ang pag-alagad namo sa Sierra Leone maoy malipayon kaayong yugto sa among kinabuhi. Wa miy reklamo ug pagbasol. Mingawon gyod mi didto.”​—Benjamin ug Monica Martin.

“Usa ka gabii niana, miestar mi sa balay sa usa ka interesadong babaye nga midalit namog pagkaon nga laig dagway. ‘Bitin ni,’ matod niya. ‘Gikuhaan na nako nig tango. Tilaw mo.’ Mibalibad mi, pero namugos siya. Bisan pa sa ingon ka ngilngig nga kasinatian, kami nakadayeg sa pagkamaabiabihon sa among mga tagbalay ug nakakat-on paghigugma kanila.”​—Frederick ug Barbara Morrisey.

“Sa 43 ka tuig nga pag-alagad ingong misyonaryo, kapig 100 ka misyonaryo ang nakauban nako sa pagpuyo. Dakong pribilehiyo nga makaila kanila, nga may lainlaing personalidad pero usa rag tumong! Pagkamakalilipay nga mahimong isigkamagbubuhat sa Diyos ug makatabang sa mga tawo sa pagdawat sa kamatuoran sa Bibliya!”​—Lynette Peters.

“Pagkamakalilipay nga mahimong isigkamagbubuhat sa Diyos ug makatabang sa mga tawo sa pagdawat sa kamatuoran sa Bibliya!”

Sukad 1947, may 154 ka misyonaryo nga nag-alagad sa Sierra Leone, ug 88 sa Guinea. Daghan pang Saksi ang nangabot sa pag-alagad sa mga dapit nga dako ang panginahanglan. Karon, dunay 44 ka misyonaryo sa Sierra Leone ug 31 sa Guinea. Ang ilang paningkamot ug sakripisyo nakapatandog sa daghang tawo. Si Alfred Gunn, usa ka dugay nang membro sa Branch Committee, miingon, “Gihandom namo sila kanunay.”