EBED-MELEK

[Alagad sa Hari].

Usa ka Etiopianhong eunuko sa balay ni Haring Zedekias kinsa, pinaagi sa iyang gipakitang lihok, nagpasundayag nga siya bug-os miuyon sa buluhaton sa manalagna ni Jehova nga si Jeremias. Sa dihang ang mga prinsipe sa Juda bakak nga nag-akusar kang Jeremias sa pag-alsa batok sa pamunoan, gitugyan ni Zedekias ang manalagna ngadto sa ilang mga kamot. Gikuha dayon niini nga mga prinsipe si Jeremias ug gihulog siya ngadto sa lapokon nga atabay ni Malkias didto sa Sawang sa Guwardiya, aron siya mamatay didto nga walay pagkaon. (Jer 38:4-6) Sa pagkamaisogon, bisan pag nameligro siya tungod sa hilabihang pagdumot kang Jeremias ug sa iyang mensahe, atubangan sa katawhan giduol ni Ebed-melek ang hari nga naglingkod sa Ganghaan ni Benjamin ug didto nangamuyo siya alang kang Jeremias. Si Zedekias mauyonong misanong. Dayon si Ebed-melek, ubos sa sugo sa hari, nagdalag 30 ka tawo ngadto sa atabay ug nagtunton ug mga pisi uban ang dunot nga mga nuog ug mga panapton aron ibutang kini ni Jeremias sa iyang mga ilok aron siya mapagawas gikan sa atabay. (Jer 38:7-13) Lagmit gisugo ni Zedekias si Ebed-melek sa pag-uban ug 30 ka tawo, dili tungod kay gikinahanglan ang daghang tawo sa pagkuha kang Jeremias gikan sa atabay, kondili aron magmalamposon ang pagluwas kaniya bisan pa sa bisan unsang posibleng pagbabag nga himoon sa mga prinsipe o mga saserdote. Tungod niining matarong nga buhat alang sa manalagna sa Diyos, gipasaligan ni Jehova si Ebed-melek pinaagi kang Jeremias, nga siya dili mamatay panahon sa paglikos sa mga Babilonyanhon, hinunoa, tagan-an siya ug kaikyasan.​—Jer 39:15-18; tan-awa ang EUNUKO.