Unsa kahay mahitabo sa mga igsoon karon nga wala na ang mga misyonaryo? Mahisama ba sila sa giingon ni Inspektor Colón nga morag “giputlag ulo”? Pero si Jesus “mao ang ulo sa lawas, ang kongregasyon.” (Col. 1:18) Busa wala mawad-ig ulo ang katawhan ni Jehova sa Dominican Republic. Hinunoa, sila padayong giatiman ni Jehova ug sa iyang organisasyon.

Si Donald Nowills ang giasayn nga magdumala sa buluhaton sa branch human gipapahawa ang mga misyonaryo. Nianang panahona, siya 20 anyos pa lang ug upat ka tuig pang bawtismado. Bisag pipila ka bulan na siyang nag-alagad ingong circuit overseer, bag-o para niya ang buluhaton sa branch. Si Brader Nowills may gamayng opisina sa iyang balay, nga inaptag sin, gibungbongan ug kahoy, ug yuta ray salog. Kini nahimutang sa Gualey, usa ka peligroso kaayong lugar sa Ciudad Trujillo. Sa tabang ni Félix Marte, siya nag-imprentag mga kopya sa The Watchtower para sa tibuok nasod.

Panahon sa pagkapriso ni Enrique, ang iyang asawa nga si Mary Glass maoy mitabang kang Brader Nowills. “Mohawa ko sa akong trabahoan sa alas singko sa hapon,” siya miingon, “ug moadto sa opisina ni Brader Nowills aron i-type ang Watchtower. Dayon si Brader Nowills mag-imprentag mga kopya niini pinaagig mimeograph. Human niana, usa ka sister sa Santiago, nga gialyasag ‘anghel,’ ang magbutang sa gi-mimeograph nga mga magasin ilalom sa basiyong taro sa mantika. Sunod, iyang tabonag panapton ang literatura ug sapawan kinig balanghoy, patatas, o lagutmon, ug iya kanang tabonan ug sako. Dayon mobiyahe siya sa amihanang bahin sa nasod ug magbilig tagsa ka kopya sa matag kongregasyon. Ang mga pamilya magpulihanayg hulam sa maong kopya aron ila kining matun-an.”

“Kinahanglang pirme ming alerto,” miingon si Mary, “kay daghan kaayong mga ahente sa gobyerno ang nangita kon diin giimprenta ang Watchtower. Pero wala gyod sila molampos. Kanunay ming gipanalipdan ni Jehova.”

‘Mabinantayon Ingon sa mga Halas Apan Inosente Ingon sa mga Salampati’

Importante gyod nga kanunayng makadawat ug espirituwal nga pagkaon ang mga alagad ni Jehova panahon sa pagdili. Pero peligroso kadto para sa matuod nga mga magsisimba kay niadtong mga tuiga, daghang igsoon ang gipangdakop ug gipangpriso.

“Dihang nakakat-on ko sa kamatuoran niadtong 1953,” matod ni Juanita Borges, “nahibalo na kong daan nga ingong Saksi ni Jehova, dakpon gyod ko. Ug mao gyod nay nahitabo. Sa Nobyembre 1958, samtang akong giduaw si Sister Eneida Suárez, miabot ang mga polis ug gipasanginlan ming nagtigom. Gisentensiyahan mig tulo ka bulan nga pagkapriso, ug gipamulta mig tag-100 pesos, nga kaniadto katumbas sa 100 dolyares.”

Gihimo sa gobyerno ang tanan aron masumpo ang panagkatigom sa mga Saksi, pero wala gyod mahadlok ang mga igsoon. Pero kinahanglan silang ‘magmabinantayon ingon sa mga halas apan inosente ingon sa mga salampati.’ (Mat. 10:16) Si Andrea Almánzar nahinumdom: “Dihang motambong ug tigom, kinahanglang dili mi magdungan ug abot. Inigpamauli, kinahanglang dili sab mi magdungan aron dili mi mamatikdan, maong sagad gabii na kaayo ming makauli.”

Si Jeremías Glass, nga natawo samtang ang iyang amahan nga si León napriso, nahimong magmamantala niadtong 1957 dihang siya siyete anyos. Iyang nahinumdoman ang sekretong mga panagkatigom sa ilang balay ug ang mga kahikayan aron dili sila mamatikdan. “Ang tanang nanambong hatagag gagmayng kard nga may numerong magpaila sa ilang turno sa pagbiya,” miingon si Jeremías. “Inigkahuman sa tigom, iasayn ko ni Papa sa pultahan aron seguroon nga pasunod ang pagbiya sa mga igsoon base sa numero sa ilang kard. Tinagurhang mobiya ang mga igsoon ug kon ang nag-unang paris moagi sa tuo, ang nagsunod moagi sa wala.”

Ang laing kahikayan mao ang pag-eskedyul sa tigom sa mga oras nga dili sila mameligrong masakpan. Pananglitan, si Mercedes García nakakat-on sa kamatuoran pinaagi sa iyang uyoang si Pablo González. Dihang siya siyete anyos pa lang, namatay ang iyang mama samtang napriso ang iyang papa, mao nga siya ug ang iyang siyam ka igsoon na lang ang nabilin. Sa 1959, si Mercedes nabawtismohan sa edad nga nuybe. Aron dili masakpan, gipahigayon ang pakigpulong sa bawtismo sa alas 3:30 sa kadlawon diha sa balay sa igsoon. Dayon gibawtismohan sila sa Ozama River, nga nag-agos paingon sa kaulohan. Si Mercedes miingon, “Pauli na mi mga alas 5:30 sa kadlawon samtang mao pay pagpamangon sa mga silingan.”