ang usa ka tigulang, “kay sila sa dili madugay magulang na. Unaha sila pag-atiman. Sila maoy inyong bililhong mga tinun-an.” “Dihang ang mga kapit-osan niining sistemaha moabot kaninyo o dihang si Satanas magasulay kaninyo,” misugyot ang laing igsoon, “ayaw gayod buhii ang kamatuoran. Ipadayon ang pagtuman niana, kay kana mosangpot sa kalipay alang kanimo.” Ang usa ka tigulang magtiayon nga nagaalagad nga matinumanon sa usa ka bahin sa New Zealand sulod sa mga 43 ka tuig naghatag niining praktikal nga tambag: “Kon makaarang ka, mas maayo ang pagpuyo sa usa ka dapit, inay kay magbalhinbalhin. Ang kamatuoran dunay dakong epekto diha sa komunidad, ug kini mopahinabo nga ikaw magkinabuhing uyon niana, sa ingon maghimo kanimong mas lig-on.”

Tinuod, daghan sa atong tigulang nga mga igsoong lalaki ug mga babaye dili na makahimo sa balay-balay nga buluhaton sama sa mahimo sa mga batan-on. Ang pipila dili na makabangon. Ang uban nagaantos sa masakit nga mga balatian. Matud sa usa ka tigulang igsoong babaye, “Walay bale kanako nga ako matigulang. Ang moduyog sa pagkatigulang ang dili ko gusto.” Bisan pa niana siya nagapasundayag gihapon ug Kristohanong kadasig!

Ikaw ba nakig-ilaila sa inyong tigulang nga mga igsoong lalaki ug babaye? Nagatinguha ka ba sa pagsundog sa mga hiyas nga ilang ginapadayag, mga hiyas nga nalunsay sama sa bulawan sa paglabay sa panahon ug tungod sa kasinatian? Tino, ang atong tigulang igsoong lalaki ug babaye maoy bililhong kahinguhaan kon mogahin kitag panahon sa pagpaniid ug pagpakigsulti kanila. Matud sa usa ka batan-ong Kristohanon: “Alang kanako ang matinumanong mga tigulang maoy mga panig-ingnan sa pagkakomitido sa kamatuoran, sa tinuod nga gugma, sa buhi nga pagtuo, kahangawa, ug kadasig sa pag-alagad sa Diyos. Alang kanako ang ilang katahom nahisama sa kakahoyang bug-os namulak, ug sila nahisamag mainit nga kalayo sa matugnaw nga gabii.” Sa pagkamatuod, kita may hinungdan sa pagpabili sa atong mga tigulang!

Ang Mata ni Jehova “Anaa sa mga Ansiano”

ANG mga ansiano karong adlawa kadaghanan kinahanglang mohimog mga desisyon nga daw nahigawas sa ilang kahibalo ug kasinatian. Bisan pa niana, tagda ang kahimtang nga giatubang sa pipila ka Hudiyong ansiano sa mga adlaw ni Esdras.

Tapos mahibalik ang Hudiyong nahibilin gikan sa Babilonya, misugod ang 16-ka-tuig nga yugto nga walay gibuhat. Ang mga propetang si Haggeo ug Zacarias nakapukaw sa mga Hudiyo gikan sa ilang pagkadili-matinagdanon, ug gipadayon ang pagtukod pag-usab sa templo ni Jehova. Apan, sa wala madugay ang maong buluhaton gilalis sa Persianhong opisyales. “Kinsay nagsugo kaninyo sa pagtukod niining balaya?” nangutana ang mga magsusupak.​—Esdras 5:1-3.

Ang tubag sa maong pangutana maoy kritikal. Kon ang mga ansiano mahadlok, ang pagtukod pag-usab sa templo kalit mapahunong. Kon pasuk-on nila ang maong opisyales, ikapahamtang dihadiha ang pagdili sa buluhaton. Busa ang mga ansiano (pihong gipangunhan ni Gobernador Zerubabel ug sa Hataas nga Saserdote si Josue) mipahayag sa mataktikanhon apan epektibong tubag. Ilang gipahinumdoman ang opisyales sa dugay-nang-nalimtang balaod ni Ciro nga nagtugot sa mga Hudiyo sa harianong pagtugot sa pagpadayon sa maong buluhaton. Ang maong opisyales, kay nasayod sa Persianong polisa nga dili gayod mausab ang napahayag nga balaod, maalamong milikay sa pagkontra sa harianong balaod. Sa ingon gitugotang magpadayon ang buluhaton hangtod sa ulahi si Haring Dario mihatag sa iyang opisyal nga pagtugot sa pagpadayon!​—Esdras 5:11-17; 6:6-12.

Kadto bang talagsaong sangpotanan maoy tungod sa kaalam sa tawo? Sa kaatbang, ang talaan ni Esdras nagaingong “ang mata sa ilang Diyos diha sa mga ansiano sa mga Hudiyo.” (Esdras 5:5) Tin-aw, gitultolan ni Jehova ang ilang tubag ug ang maayong sanong sa Persianhong hari. Ang Kristohanong mga ansiano karong adlawa samang makasalig kang Jehova alang sa giya ug pagtultol kon atubangon sa lisod nga mga desisyon o pagpakiglabot sa mga magsusupak. Si Jehova nagapasalig sa Salmo 32:8: “Akong ipasabot ug igatudlo kanimo ang dalan nga imong pagalaktan. Ihatag ko ang tambag nga ang akong mata anaa kanimo.”