Paggamit sa Bibliya sa Pagpanubag

SA DIHANG pangutan-on mahitungod sa atong mga tinuohan, atong pagkinabuhi, atong punto de bista bahin sa presenteng mga hitabo, atong paglaom alang sa umaabot, kita maningkamot nga gamiton ang Bibliya sa pagtubag. Ngano? Tungod kay kini mao ang Pulong sa Diyos. Ang Bibliya maoy gikuhaan nato sa atong mga tinuohan. Gibase nato ang atong paagi sa pagkinabuhi diha sa Bibliya. Kini magaumol sa atong opinyon bahin sa mga hitabo sa kalibotan. Ang atong paglaom sa umaabot lig-on nga gipasukad sa dinasig nga mga saad diha sa Bibliya.​—2 Tim. 3:​16, 17.

Nahibalo kita pag-ayo sa kaakohan nga nalangkit sa atong ngalan. Kita maoy mga Saksi ni Jehova. (Isa. 43:12) Busa motubag kita ug mga pangutana, dili pinasukad sa tawhanong pilosopiya, kondili pinasukad sa kon unsay giingon ni Jehova diha sa iyang dinasig nga Pulong. Tinuod, ingon nga mga indibiduwal kita adunay mga opinyon bahin sa mga butang, apan atong gitugotan ang Pulong sa Diyos sa pag-umol sa atong mga opinyon kay kombinsido gayod kita nga kini ang kamatuoran. Siyempre, gihatagan kita sa Bibliya ug kagawasan nga mopili sa personal nga kagustohan diha sa daghang butang. Inay ipugos diha sa uban ang atong mga kagustohan, tinguha nato nga itudlo ang mga prinsipyong gipadayag sa Kasulatan, sa ingon tugotan ang atong mga tigpatalinghog nga gamiton ang samang kagawasan sa pagpili nga atong gipahimuslan. Sama ni apostol Pablo, nagtinguha kita nga “ipalambo ang pagkamasinugtanon pinaagi sa pagtuo.”​—Roma 16:26.

Si Jesu-Kristo gibatbat sa Pinadayag 3:14 ingong “ang matinumanon ug matuod nga saksi.” Giunsa niya pagtubag ang mga pangutana ug pag-atubang ang mga kahimtang nga gihandos kaniya? Usahay pinaagi sa paggamit ug mga ilustrasyon nga makapahunahuna sa mga tawo. Sa ubang mga panahon pinaagi sa pagsukna sa nangutana bahin sa iyang pagsabot sa usa ka kasulatan. Subsob pinaagi sa pagkutlo ug mga teksto, nga nagpahayag niana sa laing paagi, o naghisgot nga dili-direkta niana. (Mat. 4:3-10; 12:1-8; Luc. 10:25-28; 17:32) Sa unang siglo, ang mga linukot nga basahon sa Kasulatan kasagarang gitipigan diha sa mga sinagoga. Walay ebidensiyang may personal nga koleksiyon si Jesus sa maong linukot nga mga basahon, apan nahibalo siya pag-ayo sa Kasulatan ug kanunayng nagpunting niana sa pagpanudlo sa uban. (Luc. 24:​27, 44-47) Sa pagkamatinud-anon siya nakaingon nga ang iyang gitudlo wala magagikan sa iyang kaugalingon. Nagsulti siya kon unsay iyang nadungog gikan sa iyang Amahan.​—Juan 8:26.

Ang pagsunod sa panig-ingnan ni Jesus maoy atong tinguha. Wala kita makadungog sa personal nga ang Diyos nagsulti, sama kang Jesus. Apan ang Bibliya maoy Pulong sa Diyos. Kon atong gamiton kini nga pasikaranan sa atong mga tubag, makalikay kita sa pagdani sa pagtagad alang sa atong kaugalingon. Atong ikapakita nga inay ipahayag ang opinyon sa dili-hingpit nga tawo, hugot ang atong determinasyon nga ang Diyos maoy pahukmon kon unsay kamatuoran.​​—Juan 7:18; Roma 3:4.

Siyempre, ang atong tinguha maoy dili lamang paggamit sa Bibliya kondili ang paggamit niana sa paaging labing mapuslanon alang sa atong tigpatalinghog. Buot natong siya mamati uban ang liberal nga pangisip. Depende sa tinamdan sa tawo, makapresentar ka sa mga hunahuna sa Bibliya pinaagi sa pag-ingon: “Dili ka ba mouyon nga ang hinungdanon gayod mao ang ginaingon sa Diyos?” O makaingon ka: “Nahibalo ka ba nga kanang pangutanaha mismo gihisgotan sa Bibliya?” Kon ikaw makigsulti sa usang walay pagtahod sa Bibliya, basin gikinahanglan nga imong gamiton ang laing introduksiyon. Makaingon ka: “Itugot nga ipaambit ko kanimo kining karaang tagna.” O makaingon ka: “Ang basahon nga labing dakog sirkulasyon sa tawhanong kasaysayan nag-ingon niini . . . ”

Sa pipila ka kaso, basin imong palabihon nga ipahayag sa laing paagi ang usa ka teksto. Apan, kon mahimo labing maayong buksan ang Bibliya mismo ug basahon ang ginaingon niini. Ipakita ang kasulatan sa maong tawo diha sa iyang kaugalingong kopya sa Bibliya kon praktikal kini. Kining direktang paggamit sa Bibliya kasagarang may dakong epekto nganha sa mga tawo.​—Heb. 4:12.

Ang Kristohanong mga ansiyano adunay linaing kaakohan nga gamiton ang Bibliya sa pagtubag ug mga pangutana. Usa sa mga kuwalipikasyon sa pag-alagad ingong ansiyano mao nga ang igsoong lalaki “hugot nga nangupot sa kasaligang pulong kon bahin sa iyang arte sa pagpanudlo.” (Tito 1:9) Ang usa ka membro sa kongregasyon tingali mohimog seryosong desisyon sa kinabuhi human siya katambagi sa usa ka ansiyano. Pagkahinungdanon nga kanang tambaga lig-ong ipasukad sa Kasulatan! Ang panig-ingnan sa usa ka ansiyano sa pagbuhat niini makaimpluwensiya sa daghang uban pa sa ilang paagi sa pagpanudlo.