Pakigdait Una sa Imong Igsoon​—Sa Unsang Paagi?

Ibutang ta nga nagpuyo ka sa Galilea sa panahon ni Jesus. Mibiyahe ka paingon sa Jerusalem aron sa pagsaulog sa Pista sa mga Balongbalong. Napuno ang siyudad sa mga magsisimba nga gikan pa sa lagyong mga lugar. Gusto nimong magtanyag ug halad kang Jehova. Bisag lisod ang pag-adto sa templo tungod sa kadaghan sa mga tawo, naningkamot kang makaabot didto dala ang kanding nga imong ihalad. Pag-abot nimo, nagdasok sa templo ang mga tawo nga gusto pong magtanyag ug halad. Sa kataposan, imo nang turno sa paghatag sa imong kanding ngadto sa mga saserdote. Nianang higayona, imong nahinumdoman ang usa ka igsoon nga nahiubos nimo, nga posibleng naa ra pod sa templo o sa siyudad. Gipatin-aw ni Jesus kon unsay angay nimong himoon. (Basaha ang Mateo 5:24.) Unsay imong buhaton ug sa nahiubos nimo aron masunod ninyo ang sugo ni Jesus nga makigdait? Sa matag listahan sa ubos, markahig tsek ang hustong tubag.

ANGAY KANG . . .

• makig-estorya sa imong igsoon kon paminaw nimo naa gyod siyay balidong rason nga mahiubos nimo

• makig-estorya sa imong igsoon aron tul-iron ang iyang panglantaw kon paminaw nimo sensitibo ra kaayo siya o siyay hinungdan sa problema

• mapailobong maminaw samtang isulti sa imong igsoon ang iyang gibati, ug bisag wala kaayo nimo siya masabti, magmasinsero sa pagpangayog pasaylo tungod kay nasakitan siya o tungod sa epekto sa imong nahimo diha kaniya nga wala nimo tuyoa

ANG IMONG IGSOON ANGAYNG . . .

• magpalaban sa uban diha sa kongregasyon pinaagi sa pagsulti nila bahin sa imong nahimo nga nakapahiubos niya

• mangasaba nimo, usa usahon ang matag detalye sa imong nahimo nga nakapahiubos niya, ug mamugos nga angkonon nimo ang sayop

• maghunahuna sa imong paningkamot nga magpaubos ug sa imong kaisog nga makig-estorya niya, ug kinasingkasing nga magpasaylo nimo

Dili na bahin sa atong pagsimba karon ang pagtanyag ug mga hayop ingong halad. Pero unsay gitudlo ni Jesus bahin sa koneksiyon sa pagpakigdait sa atong mga igsoon ug sa dalawatong pagsimba sa Diyos?