Usa ka Linaing Sulat Ngadto sa Ilang mga Ginikanan
Duha ka tin-edyer nga mga dalaga sa Espanya di pa dugay nagsulat ug sulat sa apresasyon ngadto sa ilang mga ginikanan. Ania ang pipila ka kinutlo:
Ngadto sa among minahal nga mga ginikanan, si Pepe ug Vicenta:
Asa man kami magsugod? Daghan kaayong butang ang gusto namong isulti, ug lisod kaayo ang pagbutang niini diha sa pipila lamang ka pulong. Buot namong pasalamatan kamo sa among 17 ug 15 ka tuig sa kinabuhi, mga tuig nga puno sa pag-amoma ug pagmahal.
Nahibalo gayod kami sa inyong mga hunahuna ug sa inyong mga balaod. Usahay nahibulong kami kon nganong kinahanglang mouli kami sa tinakdang oras, apan karon, human makakita kon unsay gidangatan sa ubang mga batan-on nga walay kurpiyo, among naamgohan nga kami napanalipdan niadtong mga balaora.
Ang inyong panig-ingnan nga dili gayod mopalta sa usa ka Kristohanong tigom diha sa Kingdom Hall, gawas sa maayo gayod nga mga katarongan, nakatabang kanamog dako, maingon man ang pagsangyaw matag Dominggo uban kaninyo. Sa mga Dominggo sa buntag dili na kinahanglang mangutana kami kon mogula ba kami sa pagsangyaw sa kanataran. Kami nahibalo gayod nga kami kinahanglang mosangyaw!
Ang pagmatuto kanamo naglakip usab sa pagkakat-on sa pagkamaabiabihon. Daghan kaayo ang nakaduaw sa atong panimalay, ug kanunay gayod ninyo silang gihatagan sa labing maayo nga inyong nabatonan. Nakita namo mismo kini sa among batan-ong mga mata, ug kami miapresyar nga kami adunay mga ginikanan nga linain gayod.
Walay usa ang mas nakaila o mas nakasabot kanamo kay kaninyo. Kamo mao ang among labing suod nga mga higala, mga higala nga kami may bug-os nga pagsalig.
Sa paghinapos, buot namong ipadayag nga gihigugma namo kamo. Kamo mao ang among mga ginikanan, ug dili gayod namo kamo ibaylo kang bisan kinsa pa. Kon papilion man ugaling kami pag-usab sa among mga ginikanan ug sa paagi sa among kinabuhi, kami, sa walay duhaduha, mopili kaninyo, ug kami magkinabuhi pag-usab sa mao gihapong kinabuhi.
Uban sa mapinanggaong mga halok, ang inyong mga anak,
ESMERALDA UG YOLANDA