Natubag ang mga Pangutana sa Klerigo

Usa ka adlaw dihang si Eliso, usa ka Saksi ni Jehova, nagdumalag pagtuon sa Bibliya sa balay sa interesadong babaye, naay miabot nga mga bisita. Nagtindog sa may pultahan ang usa ka klerigo uban sa iyang asawa. Nahibaloan ni Eliso nga bag-o lang namatay ang bugtong anak nga lalaki sa magtiayon.

Dihang sinserong miingon si Eliso nga naguol siya sa nahitabo, ang klerigo ug iyang asawa mihilak. Dayon ang klerigo suko nga miingon: “Wa ko kasabot kon nganong gitugotan sa Diyos nga mahitabo ni namo! Nganong gikuha sa Diyos ang akong bugtong anak? Nagserbisyo ko Niyag 28 ka tuig, daghan kog gihimong maayo, ug mao niy iyang gibalos nako! Nganong gipatay sa Diyos ang akong anak?”

Gipatin-aw ni Eliso nga wala kuhaa sa Diyos ang ilang anak. Gihisgotan sab niya ang bahin sa lukat, pagkabanhaw, ug ang mga rason kon nganong gitugotan sa Diyos ang pag-antos. Giingnan sa magtiayon si Eliso nga natubag niya ang mga pangutana nga ilang ginaampo.

Pagkasunod semana, ang klerigo ug iyang asawa mibalik ug miapil sa babaye sa pagtuon sa Bibliya. Gihisgotan ni Eliso ang kapitulo nga “Matuod nga Paglaom Alang sa Imong mga Minahal nga Namatay,” sa librong Unsay Tinuod nga Gitudlo sa Bibliya? Ang magtiayon dasig nga nakigbahin sa panaghisgot.

Sa ulahi, ang magtiayon mitambong sa espesyal nga kombensiyon sa mga Saksi ni Jehova sa Tbilisi, Georgia. Natandog kaayo sila sa tinuod nga gugma ug panaghiusa nga ilang nakita—mga hiyas nga dugay na nilang gitudlo sa ilang mga membro sa simbahan, pero wala gyoy resulta.