Pagtudlo sa mga Tawo sa Tibuok Kalibotan sa Pagbasa ug Pagsulat

“Nagdako ko sa uma,” matod ni Agostinho, nga taga-Brazil. “Pobre kaayo mi. Kinahanglan kong moundang ug eskuwela aron manarbaho ug makatabang sa pamilya.” Nakakat-on si Agostinho sa pagbasa ug pagsulat dihang 33 anyos na siya. Siya miingon: “Ang pagkakat-on sa pagbasa ug pagsulat nakapauswag sa akong dignidad.”

Si Agostinho usa sa kapig 250,000 ka tawo nga natudloan sa mga Saksi ni Jehova sa pagbasa ug pagsulat sulod na sa 70 ka tuig. Nganong gihimo sa mga Saksi ni Jehova ang maong mga klase? Sa unsang paagi nakabenepisyo ang mga tawo sa maong edukasyon?

Mas Lisod Makakat-on kon Dili Makabasa ug Makasulat

Pagka-1935, ang mga Saksi ni Jehova nagsangyaw sa 115 ka kayutaan. Aron masangyawan ang mga tawo nga nagsultig lainlaing pinulongan, ang mga misyonaryo nagpatokar ug mga rekording sa gihubad nga mga pakigpulong sa Bibliya, ug sa pipila ka kahimtang nakatanyag silag mga literatura diha sa lokal nga mga pinulongan. Bisag daghan ang interesado kaayo sa Bibliya, ubay-ubay kanila ang naglisod sa pagkat-on kay dili sila makabasa ug makasulat.

Kay dili makabasag Bibliya, ang mga tawo naglisod sa pagkat-on kon unsaon pagpadapat ang mga prinsipyo niini. (Josue 1:8; Salmo 1:2, 3) Naglisod sab sila pagtuman sa ilang Kristohanong mga responsibilidad. Pananglitan, kon ang mga ginikanan dili makabasa, mas dakong paningkamot ang gikinahanglan sa pagtudlo sa ilang mga anak. (Deuteronomio 6:6, 7) Ug ang bag-ong mga Saksi nga dili makabasa limitadog katakos sa paggamit sa Bibliya sa pagtudlo sa uban.

Gisugdan ang Kampanya sa Pagtudlo

Sa katuigan sa 1940 ug 1950, si Nathan H. Knorr ug Milton G. Henschel, nga apil niadtong nagapanguna sa mga Saksi ni Jehova, mibiyahe ngadto sa lainlaing nasod aron motabang sa pag-organisar sa buluhatong pagsangyaw. Sa mga lugar nga daghan ang dili makabasa ug makasulat, ilang gidasig ang lokal nga mga sangang buhatan sa pagpahigayon diha sa mga kongregasyon ug klase sa pagbasa ug pagsulat.

Ang mga sangang buhatan nagpadalag instruksiyon ngadto sa mga kongregasyon kon unsaon paghimo ang mga klase. Sa pipila ka kayutaan, ang lokal nga gobyerno duna nay mga programa nga puwedeng magamit. Pananglitan sa Brazil, ang sangang buhatan nakadawat ug mga suplay ug mga libro gikan sa gobyerno ug ila ning gipadala ngadto sa mga kongregasyon. Sa ubang kayutaan, ang mga Saksi kinahanglang maghimog kaugalingon nilang programa sa pagtudlo.

Bisan kinsa puwedeng moapil sa klase—lalaki man o babaye, bata o tigulang. Katuyoan niini nga tudloan sila sa pagbasa diha sa ilang kaugalingong pinulongan—bisag nagpasabot ni nga pipila ka pinulongan ang itudlo diha sa usa ka kongregasyon.

Programa nga Makatabang sa mga Tawo

Unsang kaayohan ang nahatag niini nga programa ngadto sa mga tawo? Usa ka Saksi nga taga-Mexico miingon: “Karon makasabot na ko sa Bibliya, maong matandog na ang akong kasingkasing. Kay makabasa na ko, dili na ko maglisod pagpakig-estorya sa akong mga silingan, ug mas daghan na kog nasangyawan sa mensahe sa Bibliya.”

Tungod sa maong programa, ang mga tawo nakakat-on dili lang bahin sa Bibliya. Si Isaac nga taga-Burundi miingon: “Ang pagkakat-on sa pagbasa ug pagsulat nakatabang nako nga makakat-on sa pagpanukod. Karon, pagpanukod na ang akong ginahimo, ug nagdumala kog dagkong proyekto sa konstruksiyon.”

Si Jesusa, nga taga-Peru, 49 anyos dihang miapil siya sa maong mga klase. Siya miingon: “Ingong asawa, kinahanglan nakong mabasa ang mga presyo ug ngalan sa mga produkto diha sa merkado. Kaniadto, maglisod ko niana. Pero tungod sa klase, naa na koy kompiyansa nga mamalit para sa akong pamilya.”

Sulod sa katuigan, ang mga opisyales sa lainlaing nasod nagdayeg sa mga Saksi ni Jehova tungod sa ilang pagpaningkamot nga matudloan ang mga tawo sa pagbasa ug pagsulat. Karon ang mga Saksi ni Jehova nagpahigayon gihapon niana nga mga klase, nga naggamit ug mas maayong mga programa ug materyales. Sila naghimo ug nag-imprentag mga 224 ka milyong brosyur diha sa 720 ka pinulongan aron tabangan ang mga tawo sa pagkat-on sa pagbasa o aron tabangan kadtong ubos ug edukasyon.a