Lig-on ba Ko?

Unsa ka ka lig-on? Nakasulay na ba ka nga . . .

• namatyan ug minahal sa kinabuhi?

• nasakit ug dugay?

• naapektohan sa kalamidad?

Ang mga researcher nag-ingon nga dili lang dagkong problema ang nagkinahanglag kalig-on. Bisan ang gagmayng problema maka-stress ug makaapektar sa imong panglawas. Busa importante gyod nga lig-on ka, gagmay man o dagko ang imong problema.

• Unsa ang kalig-on?

• Nganong kinahanglang lig-on ka?

• Sa unsang paagi ka mahimong lig-on?

• Ang giingon sa ubang batan-on

Unsa ang kalig-on?

Ang kalig-on mao ang katakos sa pag-atubang sa mga kausaban ug problema sa kinabuhi. Ang mga tawong lig-on naa poy mga problema sama sa uban. Pero imbes mosurender, kayahon nila ang mga problema ug mas molig-on pa gani bisan pa sa negatibong mga resulta niini.

Nganong kinahanglang lig-on ka?

• Kay dili malikayan ang mga problema. Ang Bibliya nag-ingon: “Ang kusog modagan dili kanunayng modaog sa lumba, . . . o ang dunay kahibalo dili kanunayng molampos, kay ang panahon ug ang wala damhang panghitabo modangat kanilang tanan.” (Ecclesiastes 9:11) Unsay leksiyon? Ang maayong mga tawo nag-antos pod​—kasagaran dili tungod sa ilang sayop nga nahimo.

• Kay ang kalig-on manalipod nimo. Usa ka high-school counselor miingon: “Mas nagkadaghan na ang mga estudyante nga moanhi sa opisina kay naguol kaayo sila sa ilang ubos nga grado sa eksam o sa negatibong komento sa uban diha sa social media.” Miingon siya nga morag simple ra ni nga mga problema. Pero kon ang estudyante dili kabalo kon unsaon ni pag-atubang, posibleng moresulta nig mental ug emosyonal nga mga problema.”a

• Kay ang kalig-on makatabang nimo karon ug sa umaabot. Kon bahin sa mga kapakyasan sa kinabuhi, si Dr. Richard Lerner misulat: “Ang malamposon ug responsableng adulto mobangon gikan sa mga kapakyasan, mohimog bag-ong mga tumong, o mangitag laing paagi aron makab-ot ang maong mga tumong.”b

Sa unsang paagi ka mahimong lig-on?

• Analisaha kon ang imong problema dako ba o gamay. Ang Bibliya nag-ingon: “Ipakita dayon sa buangbuang nga nasuko siya, apan balewalaon ra sa maalamon ang insulto.” (Proverbio 12:16) Ayawg paapektar pag-ayo sa tanang problema.

  “Sa eskuwelahan, grabe kaayog reaksiyon ang akong mga klasmet bisan sa gagmayng mga butang. Dayon sulsolan sila sa ilang mga higala sa social media, maong mosamot silag kasuko. Tungod ana, ang gamayng problema morag dako na para nila.”​—Joanne.

• Pagkat-on gikan sa uban. Ang Bibliya nag-ingon: “Ang tawo makakat-on gikan sa laing tawo, sama nga ang puthaw mahait pinaagi sa puthaw.” (Panultihon [Proverbio] 27:17, Ang Bag-ong Maayong Balita Biblia) Makakat-on tag importanteng mga leksiyon gikan sa mga tawo nga nakaagi nag dagkong problema.

  “Dihang makig-estorya ka sa uban, mahibaloan nimo nga nakasinati diay silag daghang bug-at nga problema, pero okey na sila karon. Pangutan-a sila kon unsay ilang gihimo o wala himoa aron makaya ang ilang problema.”​—Julia.

• Magmapailobon. Ang Bibliya nag-ingon: “Kay ang tawong matarong mahimong matumba sa makapito, ug siya mobangon pag-usab.” (Proverbio 24:16) Nagkinahanglag panahon aron makabangon sa mga kalisdanan sa kinabuhi. Busa ayawg katingala kon usahay maguol ka. Ang importante nga ‘mobangon ka pag-usab.’

  “Dihang makabangon na ka gikan sa mga problema, nagkinahanglan kag panahon aron maulian sa gibating kasakit. Akong nakita nga paglabay sa panahon, anam-anam kong naulian ug mas maayo na ang akong gibati.”​—Andrea.

• Magmapasalamaton. Ang Bibliya nag-ingon: “Ipakita nga mapasalamaton mo.” (Colosas 3:15) Bisag unsa ka bug-at ang imong problema, naa gyoy mga butang nga angay nimong pasalamatan. Paghunahuna ug tulo ka butang nga nakapalipay nimo.

  “Dihang makaatubang ug mga problema, usahay makaingon ka, ‘Nganong ako man?’ Makapakita kag kalig-on kon dili ka magpokus sa imong mga problema. Hinuon, magmapositibo ug magmapasalamaton sa kon unsay naa nimo o sa imo pang mahimo.”​—Samantha.

• Magmakontento. Si apostol Pablo miingon: “Nakakat-on ko nga magmakontento bisan unsay akong kahimtang.” (Filipos 4:11) Dili kontrolado ni Pablo ang mga kalisdanan nga nahitabo kaniya. Pero puwede niyang kontrolahon ang iyang reaksiyon. Determinado si Pablo nga magmakontento.

  “Akong nakat-onan nga ang una nakong reaksiyon sa mga problema sagad dili mao ang pinakamaayo. Tumong nako nga magmapositibo sa bisan unsang situwasyon. Dili lang ako ang makabenepisyo niini apil pod ang uban.”​—Matthew.

• Pag-ampo. Ang Bibliya nag-ingon: “Itugyan ang imong palas-anon kang Jehova, ug siya motabang kanimo. Dili gyod niya itugot nga mapukan ang matarong.” (Salmo 55:22) Ang pag-ampo dili lang basta makapagaan sa imong gibati. Tinuod ni nga pagpakig-estorya sa imong Maglalalang, ang Diyos nga ‘nagmahal nimo.’​—1 Pedro 5:7.

  “Wala ko mag-inusara sa pag-atubang sa akong problema. Dihang iampo nako sa Diyos ang tanan nakong problema ug pasalamatan siya sa tanang panalangin nga iyang gihatag nako, mawala ang akong negatibong pagbati kay nagpokus ko sa mga panalangin nga gihatag ni Jehova. Importante gyod ang pag-ampo!”​—Carlos.