Mga Saksi ni Jehova sa New Zealand—Makigdaiton ug Matinumanon nga mga Kristohanon?

Niadtong Oktubre 21, 1940, gideklarar sa New Zealand ang mga Saksi ni Jehova ingong subersibo, o rebeldeng, organisasyon nga nagpameligro sa publiko. Bisan pa sa mga kalisdanan tungod niini nga deklarasyon, ang mga Saksi ni Jehova wala maluya. Pananglitan, nagpadayon sila sa pagtigom bisag posible silang dakpon sa mga awtoridad.

Si Andy Clarke, ang dili Saksing bana sa sister nga si Mary, nakamatikod sa determinasyon sa iyang asawa nga padayong motambong sa mga tigom bisan pa sa kapeligrohan. Nahadlok siya nga dakpon kini samtang naa sa tigom. Bisag dili siya tigtambongan, misugod siyag uban kang Mary ug giingnan kini, “Aw, kon dakpon ka nila, kinahanglang dakpon pod ko nila!” Sukad niadto, ubanan na ni Andy ang iyang asawa sa tigom. Ngadtongadto, nahimo sab siyang bawtismadong Saksi. Sama kang Mary, daghang Saksi sa New Zealand ang determinadong magmaunongon sa Diyos bisan pag gilutos niadtong Gubat sa Kalibotan II.

Nag-uswag Bisag Naa sa Prisohan

Usa ka adlaw niana, gidakop sa polis ang 78 anyos nga si John Murray samtang nagsangyaw sa balay ug balay. Gisentensiyahan siya sa korte tungod sa pagpakigbahin sa mga kalihokan sa usa ka subersibong organisasyon. Daghan pang Saksi ang gikasohan sa korte; ang pipila gipamulta, ug ang uban gisentensiyahan ug hangtod tulo ka bulan nga pagkapriso.

Ang mga Saksi midumili sa pagsundalo tungod sa ilang nabansay sa Bibliya nga konsensiya. (Isaias 2:4) Busa panahon sa gubat, nakasinati silag grabeng kalisdanan dihang daghan ang gitawag aron magsundalo. Kay dili magsundalo, mga 80 ka Saksi ang gipriso panahon sa gubat. Bisan pa sa grabeng kalisdanan sa prisohan tungod sa pagmaltratar ug grabeng katugnaw, kini nga mga brader malipayong nagpadayon sa pagsimba kang Jehova.

Ang mga Saksi sa prisohan nag-organisar dayon ug espirituwal nga mga kalihokan. Mora silag usa ka kongregasyon, nga dunay regular nga panagkatigom ug kahikayan sa pagsangyaw sa ubang piniriso. Ang mga Saksi diha sa pipila ka kampo gitugotan pa gani nga mag-asembliya, pero naay guwardiya. Ang pipila ka piniriso nakakat-on sa kamatuoran ug nabawtismohan diha sa prisohan.

Si Bruce, ang kamanghorang anak ni Mary ug Andy nga gihisgotan ganina, nag-isip sa iyang pagkapriso ingong kahigayonan sa pagpauswag sa iyang kahibalo sa Bibliya. Siya miingon, “Mora kog nag-eskuwela kay maestorya nako ang mas eksperyensiyadong mga brader sa prisohan ug makakat-on nilang tanan.”

Niadtong 1944, gikonsiderar sa gobyerno nga buhian ang pipila ka igsoon nga napriso. Pero ang mga opisyales sa militar wala mouyon kay kombinsido sila nga ang mga Saksi, kon buhian, magpadayon sa pagsulti sa uban bahin sa ilang pagtuo. Ang report nag-ingon: “Bisag ang pagkapriso makakontrolar ug diyutay sa pagkapanatiko niining mga tawhana, kini dili gyod makausab kanila.”

Wala Magpameligro sa Publiko

Tungod sa pagdili, nabaniog ang mga Saksi ni Jehova, ug ang pipila ka tawo nainteres bahin kanila. Ngadtongadto, daghan ang nakaamgo nga ang mga Saksi ni Jehova wala magpameligro sa publiko. Nakita nila nga ang mga Saksi dili peligroso ug makigdaiton nga mga Kristohanon. Tungod niana, ang 320 ka Saksi sa New Zealand niadtong 1939 nahimong 536 pagka-1945!

Usahay, ang way pagpihig nga mga opisyales makaamgo nga dili makataronganon ang pagdili sa mga Saksi ni Jehova. Pananglitan, human paminawi sa usa ka huwes ang ebidensiya batok sa usa ka brader nga nagsangyaw, iyang gi-dismiss ang kaso. Siya miingon: “Base sa akong gituohan ug sa akong pagsabot sa balaod, dili gyod makataronganon nga isipong kriminal ang usa ka tawo tungod lang kay nanghatag siyag Bibliya.”

Dihang gitangtang na ang pagdili human sa gubat, ang mga Saksi mas determinado nga tabangan ang uban nga makakat-on bahin sa Gingharian sa Diyos. Niadtong 1945, ang sulat sa sangang buhatan ngadto sa tanang kongregasyon sa New Zealand nag-ingon: “Hinaot nga ang matag usa mahimong matinahoron, mahigalaon, ug buotan sa tanan. Likayi ang panaglalis ug panag-away. Hinumdomi nga ang mga tawo nga atong maestorya sinsero sa ilang tinuohan ug nagsunod niana. . . . Daghan kanila ‘mga karnero’ sa Ginoo nga angay natong tultolan ngadto kang Jehova ug sa iyang gingharian.”

Karon, ang mga Saksi ni Jehova sa New Zealand padayong nagsangyaw sa mensahe sa Bibliya ngadto sa mga tagadidto ug sa mga turista. Usa ka adlaw niana, sulod lang sa pipila ka oras, upat ka Saksi sa Turangi ang nakaestoryag 67 ka tawo gikan sa 17 ka nasod!

Klaro nga nakita sa mga taga-New Zealand nga ang mga Saksi ni Jehova maoy makigdaiton ug matinumanon nga mga Kristohanon kinsa nagpabili pag-ayo sa Bibliya. Kada tuig, gatosan ang mabawtismohan ingong mga Saksi ni Jehova. Niadtong 2019, kapig 14,000 ka Saksi ang malipayong nag-alagad kang Jehova niining nasora.