Ang Relihiyon ba Usa ka Dakong Negosyo?
Namatikdan ba nimo nga daghang relihiyon ang morag mas nagpokus sa pagpanguwarta kay sa pagtaganag espirituwal nga giya? Ilang gi-promote ug gipabayran ang ilang mga serbisyo ug sila namaligya. Daghan sa ilang mga lider dagkog suweldo ug luho ang kinabuhi. Niay pipila ka pananglitan:
Sumala sa usa ka imbestigasyon, usa ka Katolikong obispo ang 13 ka tuig nang naggamit sa pondo sa simbahan. Kini ang iyang gibayad sa halos 150 ka biyahe sakay sa mga private jet ug sa mga 200 ka pagsakay sa limousine. Migasto sab siyag kapig upat ka milyong dolyares sa pag-renovate sa iyang balay nga gipanag-iya sa simbahan.
Usa ka magwawali sa nasod sa Africa ang regular nga naghimog relihiyosong mga serbisyo nga gitambongan ug linibo ka tawo. Sa dakong pasilidad sa iyang simbahan lainlain ang mga baligya—gikan sa “miracle oil” ngadto sa mga tualya ug T-shirt nga naa ang iyang hulagway. Kadaghanan sa mga nanambong pobre, pero siya dato kaayo.
Duha sa upat ka sagradong bukid sa mga Budhista sa China gilista ingong mga kompaniya. Ug ang iladong Shaolin Temple nalangkit sa daghang negosyo; ang lider sa mga monghe nailhan ingong “CEO monk.”
Sumala sa usa ka report, ang mga kompaniya sa America nagkuhag mga consultant kinsa nag-imbentog relihiyosong mga rituwal ug naghatag ug ubang espirituwal nga serbisyo sa ilang mga empleyado.
Unsay imong ikasulti sa mga relihiyon nga nalangkit sa negosyo? Nakahunahuna ba ka kon unsay panglantaw sa Diyos sa mga tawo nga nanguwarta gamit ang relihiyon?
Unsay panglantaw sa Diyos kon ang relihiyon sagolag negosyo?
Ang Diyos dili uyon nga ang relihiyon sagolag negosyo. Gipakita sa Bibliya nga kaniadto, nasuko siya sa mga saserdote nga nangangkong nagrepresentar niya apan “nagtudlo alang sa suhol.” (Miqueas 3:11) Gisaway sa Diyos ang hakog nga mga negosyo nga naghimo sa iyang dapit sa pagsimba ingong “langob sa mga tulisan.”—Jeremias 7:11.
Sama sa Diyos, gidumtan sab ni Jesus kadtong nanguwarta gamit ang relihiyon. Sa iyang panahon, ang mga lider sa relihiyon nakaganansiya gikan sa hakog nga mga negosyante nga ilang gitugotang magnegosyo sulod sa templo sa Jerusalem. Ilang gipahimuslan ang sinserong mga tawo nga nangadto didto aron mosimba. Maisogong giabog ni Jesus ang limbongang mga negosyante pagawas sa templo, nga nag-ingon: “Ayaw ninyo himoang negosyohanan ang balay sa akong Amahan!”—Juan 2:14-16.
Gipakita sab ni Jesus ang panghunahuna sa Diyos diha sa iyang pagministeryo. (Juan 8:28, 29) Wala siya mangayog bayad sa mga tawo dihang iyang gitudloan sila bahin sa Diyos. Wala siya magpabayad dihang mihimo siyag mga milagro, sama sa pagpakaon sa mga gigutom, pag-ayo sa mga masakiton, ug sa pagbanhaw. Wala gyod gamita ni Jesus ang iyang pagministeryo aron siya madato—wala gani siyay kaugalingong balay.—Lucas 9:58.
Unsay gihimo sa mga Kristohanon sa unang siglo aron dili masagolag negosyo ang ilang pagsimba?
Giingnan ni Jesus ang iyang mga sumusunod nga dili gamiton ang ilang relihiyosong mga kalihokan aron makakuwarta. Siya miingon: “Kamo nakadawat nga walay bayad, panghatag nga walay bayad.” (Mateo 10:8) Ang maong mga sumusunod, nga nailhang mga Kristohanon, nagsunod sa mga instruksiyon ni Jesus. Niay pipila ka pananglitan:
Si apostol Pedro, nga miuban kang Jesus sa iyang ministeryo, gitanyagag kuwarta sa tawong ginganlag Simon, nga gustong makabaton ug gahom ug awtoridad. Gibalibaran dayon ni Pedro ang tanyag ni Simon ug gibadlong siya, nga nag-ingon: “Malaglag pa unta ang imong plata uban kanimo, kay naghunahuna ka nga mabatonan nimo ang walay bayad nga gasa sa Diyos pinaagig salapi.”—Buhat 8:18-20.
Si apostol Pablo ilado nga nagapanawng ministro. Sulod sa daghang katuigan, naghago siya para sa daghang Kristohanong kongregasyon. Pero wala to niya himoang rason aron makapanguwarta. Siya ug ang iyang kaubang mga Kristohanon dili “mga tigbaligya sa pulong sa Diyos sama sa daghang tawo.” (2 Corinto 2:17) Gani, si Pablo misulat: “Nagtrabaho mi adlaw ug gabii aron dili mi makapabug-at ninyo sa pinansiyal, dihang among gisangyaw kaninyo ang maayong balita sa Diyos.”—1 Tesalonica 2:9.
Siyempre, ang maong mga Kristohanon nanginahanglag kuwarta sa ilang pagsangyaw sa lainlaing lugar ug sa paghatag ug mga hinabang. Pero wala sila magpabayad sa ilang gihimong mga serbisyo. Ang mga tawo makahatag kon gusto nila, base sa mosunod nga mga prinsipyo:
2 Corinto 8:12: “Kay kon naa na daan ang pagkaandam, ang paghatag mas dalawaton, sa ato pa, paghatag nga sumala sa kon unsay nabatonan sa usa, dili sa kon unsay wala niya.”
Kahulogan: Ang motibo sa usa ka tawo sa paghatag mas importante kay sa kantidad nga iyang gihatag.
2 Corinto 9:7: “Ipabuhat sa matag usa kon unsay gihukom sa iyang kasingkasing, dili kontragusto o pinugos, kay gihigugma sa Diyos ang nagahatag nga malipayon.”
Kahulogan: Dili gusto sa Diyos nga mapugos ang mga tawo sa paghatag. Malipay siya kon ang tawo mohatag nga kinasingkasing.
Unsay hapit nang mahitabo sa hakog nga relihiyon?
Klarong gipakita sa Bibliya nga dili tanang relihiyon o pagsimba ang dawaton sa Diyos. (Mateo 7:21-23) Sa usa ka kulbahinam nga tagna, gipakasama sa Bibliya ang tanang bakak nga relihiyosong organisasyon ngadto sa usa ka pampam kay nakig-alyansa sila sa mga gobyerno alang sa kuwarta o ubang benepisyo ug ilang gipahimuslan ang mga tawo sa tanang kanasoran. (Pinadayag 17:1-3; 18:3) Gipakita sa maong tagna nga hapit nang ipahamtang sa Diyos ang paghukom sa bakak nga relihiyon.—Pinadayag 17:15-17; 18:7.
Sa kasamtangan, dili gusto sa Diyos nga ang daotang binuhatan sa bakak nga relihiyon maglimbong sa mga tawo o magpahilayo nila kaniya. (Mateo 24:11, 12) Iyang giawhag ang sinserong mga tawo sa pagkat-on kon unsaon siya pag-alagad sa hustong paagi ug sa pagbiya sa bakak nga relihiyon.—2 Corinto 6:16, 17.