1, 2. Unsay namatikdan sa mga circuit overseer diha sa daghang kongregasyon?

TALITAPOS na ang miting sa circuit overseer uban sa mga ansiyano. Siya mitan-aw kanila ug mibatig gugma alang niining kugihang mga magbalantay, nga ang pipila morag amahan na niya. Bisan pa niana, duna siyay gikabalak-an, busa nangutana siya, “Mga igsoon, may nahimo na ba mo aron bansayon ang uban nga moabaga ug dugang responsabilidad sa kongregasyon?” Sila nahinumdom nga sa miaging duaw sila giawhag nga hatagag dakong pagtagad ang pagbansay sa uban. Sa ulahi, usa sa mga ansiyano miingon, “Sa tinuoray lang, wala kaayo miy nahimo anang bahina.” Ang ubang ansiyano miuyon.

² Kon ikaw usa ka ansiyano, tingali ingon usab niana ang nahitabo sa usa sa inyong mga miting. Namatikdan sa mga circuit overseer sa tibuok kalibotan nga sa daghang kongregasyon, dako pa ang panginahanglan sa pagbansay sa mga brader—batan-on ug edaran—sa pag-atiman sa panon. Apan dili kini sayon. Ngano?

3. (a) Sa unsang paagi gipakita sa Kasulatan ang kahinungdanon sa pagbansay, ug nganong kita angayng mainteres niini? (Tan-awa ang footnote.) (b) Nganong ang pipila ka ansiyano nalisdan tingali sa pagbansay sa uban?

³ Ingong magbalantay, mouyon gyod ka nga hinungdanon ang pagbansay sa uban.a Nahibalo ka nga mas daghang brader ang gikinahanglan sa pagpalig-on sa mga kongregasyon ug pagpormag bag-ong mga kongregasyon. (Basaha ang Isaias 60:22.) Nahibalo sab ka nga ang Pulong sa Diyos nag-awhag kanimo sa ‘pagtudlo sa uban.’ (Basaha ang 2 Timoteo 2:2.) Bisan pa niana, sama sa mga ansiyano nga gihisgotan sa sinugdan, tingali nalisdan ka sa paghimo niana. Tungod kay ikaw dunay trabaho ug nag-atiman sa panginahanglan sa pamilya, sa kongregasyon, ug sa ubang importanteng butang, lagmit wala ka nay panahon sa pagbansay sa uban diha sa kongregasyon. Kay ingon niana ang kahimtang, atong hisgotan ang kahinungdanon sa pagbansay sa uban.

HINUNGDANON ANG PAGBANSAY

4. Unsa tingaliy usa ka rason kon nganong wala dayon mahimo sa mga ansiyano ang pagbansay sa uban?

⁴ Unsa tingaliy usa ka rason kon nganong ang pipila ka ansiyano nalisdan sa paggahig panahon sa pagbansay sa uban? Lagmit ang pipila naghunahuna: ‘Ang pagbansay hinungdanon, apan dili kini sama ka dinalian sa ubang atimanonon sa kongregasyon nga kinahanglang hatagan dayog pagtagad. Kon dili una nako himoon ang pagbansay, dili ra maapektohan ang kongregasyon.’ Tinuod, daghang butang ang kinahanglang atimanon dayon apan kon unyaunyaon ang pagbansay mahimong madaot ang espirituwalidad sa kongregasyon.

5, 6. Unsay atong makat-onan sa usa ka drayber ug sa iyang panglantaw sa pagmentinar sa makina, ug sa unsang paagi mapadapat kini sa pagbansay diha sa kongregasyon?

⁵ Tagda kini nga pananglitan: Aron mamentinar ang sakyanan ug ang kondisyon sa makina niini, ang usa ka drayber nahibalo nga kinahanglan niyang regular nga ilisan ang aseite niini. Bisan pa niana, bation tingali niya nga dili kini ingon ka dinalian kay sa pagpagasolina. Kay kon dili niya kini pagasolinahan, kini dili na modagan. Tingali siya mangatarongan, ‘Bisag dili ko makalugar sa pag-ilis ug aseite karon, ang makina moandar gihapon.’ Apan unsay kapeligrohan niana? Kon pirmeng unyaunyaon sa drayber ang pag-ilis ug aseite, moabot ra gyod ang panahon nga maguba ang sakyanan. Kon mahitabo kana, kinahanglan na hinuon siyang mogahin ug dakong panahon ug salapi sa pagpaayo sa sakyanan. Unsay leksiyon niini?

⁶ Ang mga ansiyano nag-atiman ug daghang hinungdanong butang nga angay dayong lihokon; kon dili nila kana buhaton, maapektohan ang kongregasyon. Busa, maingon nga ang drayber kinahanglang regular nga magpagasolina, kinahanglang tinoon usab sa mga ansiyano ang “mas hinungdanong mga butang.” (Filip. 1:10) Apan, ang pipila ka ansiyano puliki kaayo sa pag-atiman sa hinungdanong mga butang nga tungod niana mapasagdan tingali nila ang pagbansay sa uban—ang pagmentinar sa makina, ingnon ta. Apan kon unyaunyaon gihapon sa mga ansiyano ang gikinahanglang pagbansay, sa kadugayan ang kongregasyon mahutdag kuwalipikadong mga brader nga mag-akatar sa tanang atimanonon.

7. Unsay angay natong panglantaw sa mga ansiyano nga naggahig panahon sa pagbansay sa uban?

⁷ Nan, dayag nga angay natong likayan ang paghunahuna nga dili kaayo hinungdanon ang pagbansay. Ang mga ansiyano nga naglantaw sa kaugmaon sa kongregasyon ug naggahig panahon sa pagbansay sa dili kaayo eksperyensiyadong mga brader maoy maalamong mga piniyalan ug tinuod nga panalangin sa tibuok kongregasyon. (Basaha ang 1 Pedro 4:10.) Sa unsang paagi makabenepisyo ang kongregasyon?

MAALAMONG PAGGAMIT SA PANAHON

8. (a) Nganong angayng bansayon sa mga ansiyano ang uban? (b) Unsa ang hinungdanong responsabilidad sa mga ansiyano nga nag-alagad ingong mga “need greater”? (Tan-awa ang kahon nga “Usa ka Dinaliang Misyon.”)

⁸ Bisan ang eksperyensiyado kaayong mga ansiyano kinahanglang magmakasaranganon sa pag-ila nga tungod sa katigulangon, anam-anam nga malimitahan ang ilang mahimo alang sa kongregasyon. (Miq. 6:8) Dugang pa, angay silang magmarealistiko sa paghunahuna nga tungod sa ‘panahon ug sa wala damhang panghitabo’ mahimong kalit nga malimitahan ang ilang katakos sa pag-atiman sa mga responsabilidad sa kongregasyon. (Eccl. 9:11, 12; Sant. 4:13, 14) Busa tungod sa gugma ug kahingawa alang sa mga karnero ni Jehova, ang mga ansiyano naningkamot sa paggahig panahon nga ipaambit sa mas batang mga brader ang ilang mga kasinatian sulod sa daghang katuigan nga matinumanong pag-alagad.—Basaha ang Salmo 71:17, 18.

9. Hinungdanon ang pagbansay tungod sa unsang panghitabo sa umaabot?

⁹ Unsa pay laing rason kon nganong ang mga ansiyano nga nagbansay sa uban usa ka panalangin sa panon? Sila nagpalig-on sa kongregasyon. Nganong makaingon ta niana? Tungod sa paningkamot sa mga ansiyano sa pagbansay sa uban, mas daghang brader ang nahimong andam sa pagtabang sa kongregasyon nga magpabiling lig-on ug nahiusa, dili lang karon apan ilabina pag-abot sa magubot nga mga yugto sa dakong kasakitan. (Ezeq. 38:10-12; Miq. 5:5, 6) Busa, minahal nga mga ansiyano, kami naghangyo kaninyo nga ilakip kanunay sa inyong ministeryo karon ang pagbansay sa uban.

10. Unsay angayng himoon sa usa ka ansiyano aron makagahig panahon sa pagbansay sa uban?

¹⁰ Siyempre, kami nakasabot nga gigugol na nimo ang halos tanan nimong panahon sa pag-atiman sa hinungdanong mga kalihokan sa kongregasyon. Busa, kinahanglan tingali nimong kuhaan ang pipila niana nga panahon ug gamiton kana sa pagbansay. (Eccl. 3:1) Ang paghimo niana maoy maalamong paggamit sa panahon.

ANDAMA ANG KASINGKASING

11. (a) Unsay makapainteres sa mga sugyot labot sa pagbansay nga gihatag sa mga ansiyano gikan sa lainlaing nasod? (b) Sumala sa Proverbio 15:22, nganong mapuslanon nga atong tagdon ang mga sugyot sa ubang ansiyano?

¹¹ Di pa dugay, usa ka grupo sa mga ansiyano nga nagmalamposon sa pagtabang sa mga brader nga mohamtong sa espirituwal ang gipangutana kon giunsa nila pagbansay ang uban.b Bisag lainlain ang kahimtang niini nga mga brader, ang ilang tambag managsama. Unsay gipakita niini? Ang pagbansay nga binase sa Bibliya mapadapat sa mga tinun-an “sa tanang dapit . . . diha sa tanang kongregasyon”—sama nianang sa panahon ni apostol Pablo. (1 Cor. 4:17) Busa, niini ug sa sunod nga artikulo, atong hisgotan ang pipila ka sugyot sa maong mga ansiyano. (Prov. 15:22) Ang maong mga artikulo magtumong niadtong nagbansay ingong “magtutudlo” ug kadtong gibansay ingong “tinun-an.”

12. Unsay angayng andamon sa usa ka magtutudlo, ug ngano?

¹² Kinahanglang andamon sa usa ka magtutudlo ang kasingkasing sa iyang bansayon. Maingon nga ang usa ka hardinero kinahanglang mag-andam, o magbugwal, sa yuta sa dili pa ipugas ang binhi, ang usa ka magtutudlo kinahanglan sab nga mag-andam sa kasingkasing sa tinun-an sa dili pa kini tudloag bag-ong mga kahanas. Busa sa unsang paagi ang mga magtutudlo mag-andam sa kasingkasing sa iyang bansayon? Pinaagi sa pagsundog sa gibuhat sa usa ka manalagna sa kakaraanan.

13-15. (a) Unsang asaynment ang nadawat ni Samuel? (b) Sa unsang paagi giandam ni Samuel si Saul alang sa bag-ong asaynment niini? (Tan-awa ang hulagway sa sinugdan sa artikulo.) (c) Nganong ang asoy sa Bibliya bahin kang Samuel ilabinang makapainteres sa mga ansiyano karon?

¹³ Usa ka adlaw niana, kapig 3,000 ka tuig kanhi, giingnan ni Jehova ang tigulang nga manalagnang si Samuel: “Ugma sa mga ingon niining taknaa akong ipadala kanimo ang usa ka tawo gikan sa yuta sa Benjamin, ug pagadihogan mo siya ingong pangulo sa akong katawhan nga Israel.” (1 Sam. 9:15, 16) Si Samuel nakaamgo nga matapos na ang iyang papel ingong pangulo ug nga si Jehova nagsugo kaniya sa pagdihog ug usa ka manununod. Lagmit nakahunahuna si Samuel, ‘Unsaon nako pag-andam kanang tawhana alang sa iyang bag-ong asaynment?’ May nahunahunaan siyang paagi.

¹⁴ Pagkaugma, dihang nakita ni Samuel si Saul, giingnan ni Jehova ang manalagna: “Ania ang tawo.” Dayon gihimo ni Samuel ang iyang nahunahunaang paagi. Iyang gidala si Saul sa lawak kan-anan. Didto, gipalingkod niya si Saul ug ang tig-alagad niini sa kinamaayohang puwesto ug gihatagan sila sa labing maayong parte sa karne, ug si Samuel miingon: “Kaon, tungod kay sa tinudlong panahon kini ilang gilain alang kanimo aron mokaon ka uban sa mga dinapit.” Pagkahuman, si Samuel ug Saul mipaingon sa balay sa manalagna nga nag-estoryahay. Gustong gamiton ni Samuel ang maong kahimtang aron maandam ang kasingkasing ni Saul. Busa nangadto sila sa atop. Sa bugnaw nga huyohoy sa kagabhion, si Samuel ‘nagpadayon sa pagpakigsulti kang Saul didto sa atop sa balay’ hangtod sila nangatulog. Pagkaugma, gidihogan ni Samuel si Saul, gihalokan kini, ug gihatagag dugang instruksiyon. Human niana, iyang gipalakaw si Saul—nga andam na alang sa mga panghitabo nga moabot.—1 Sam. 9:17-27; 10:1.

¹⁵ Siyempre, ang pagdihog ug usa ka tawo ingong pangulo sa nasod dili sama sa pagbansay sa usa ka brader nga mahimong ansiyano o ministeryal nga alagad. Bisan pa niana, ang mga ansiyano karon daghag makat-onan sa pamaagi ni Samuel. Atong hisgotan ang duha niini.

MAGMAANDAM SA PAGTUDLO UG MAHIMONG TINUOD NGA HIGALA

16. (a) Unsay gibati ni Samuel dihang ang Israel nangayog hari? (b) Unsa ang tinamdan ni Samuel sa pagtuman sa iyang asaynment sa pagdihog kang Saul?

¹⁶ Magmaandam, ayaw pagpanuko. Sa unang higayon nga nadungog ni Samuel nga ang mga Israelinhon gustog tawhanong hari, siya nahigawad ug mibating sinalikway. (1 Sam. 8:4-8) Gani, siya nagpanuko sa pagbuhat sa gipangayo sa katawhan mao nga tulo ka beses siyang giawhag ni Jehova sa pagpamati kanila. (1 Sam. 8:7, 9, 22) Bisan pa niana, si Samuel wala masina o masuko sa tawong mopuli niya. Dihang giingnan siya ni Jehova nga dihogan si Saul, ang manalagna kinabubut-ong misugot, dili tungod sa obligasyon kondili tungod sa gugma.

17. Sa unsang paagi ang mga ansiyano karon nagsundog sa tinamdan ni Samuel, ug unsay ilang gibati sa paghimo niana?

¹⁷ Sama kang Samuel, ang eksperyensiyadong mga ansiyano karon mahigugmaong nagbansay sa uban. (1 Ped. 5:2) Ang maong mga ansiyano wala magpanuko sa pagbansay sa uban ug wala mahadlok nga basig mabalhin sa mga tinun-an ang pipila nila ka pribilehiyo sa kongregasyon. Sila nag-isip sa ilang mga tinun-an, dili ingong kakompetensiya, kondili ingong “mga isigkamagbubuhat”—ingong bililhong mga gasa sa kongregasyon. (2 Cor. 1:24; Heb. 13:16) Mibati gayod ug katagbawan ang maong dili hakog nga mga magtutudlo samtang ilang nakita nga gigamit sa mga tinun-an ang ilang mga katakos sa pagtabang sa kongregasyon.—Buh. 20:35.

18, 19. Sa unsang paagi maandam sa ansiyano ang kasingkasing sa tinun-an, ug nganong importante kana?

¹⁸ Mahimong higala, dili lang ingong magtutudlo. Dihang nahimamat ni Samuel si Saul, puwede untang kuhaon dayon sa manalagna ang lana, ibubo kini sa ulo ni Saul, ug palakwon dayon ang bag-ong hari—nga dinihogan na apan dili andam. Hinunoa, si Samuel migahig panahon aron anam-anam nga maandam ang kasingkasing ni Saul. Human lang sa ilang pagpangaon, pagpanglakaw, dugay nga panag-estoryahay, ug pagpahulay nga gibati sa manalagna nga panahon na sa pagdihog kang Saul.

¹⁹ Sa susama, angayng sugdan sa magtutudlo ang pagbansay pinaagi sa paggahig panahon nga masuod ang tinun-an ug mobati kini nga relaks. Ang espesipikong mga lakang nga himoon sa mga ansiyano aron maugmad ang maong panaghigalaay mahimong managlahi, depende sa lokal nga kahimtang ug kostumbre. Apan, bisan asa ka man nagpuyo, kon mogahin kag panahon alang sa tinun-an bisag puliki ka, sama rag giingnan nimo siya, “Importante ka nako.” (Basaha ang Roma 12:10.) Kana nga mensahe bisag dili nimo isulti masabtan ug pabilhan gayod sa mga tinun-an nga andam magpabansay.

20, 21. (a) Unsaon nimo paghubit ang usa ka malamposong magtutudlo? (b) Unsay atong hisgotan sa sunod nga artikulo?

²⁰ Mga ansiyano, hinumdomi kini: Ang malamposong magtutudlo gustong mobansay sa uban ug siya usab nahigugma sa tawo nga iyang gibansay. (Itandi ang Juan 5:20.) Kana nga tinamdan mamatikdan dayon sa tinun-an ug dakog epekto sa paagi sa iyang pagsanong sa pagbansay nga iyang nadawat. Busa, minahal nga mga ansiyano, dihang magbansay kamo, paningkamoti ninyo nga dili lang kamo mahimong mga magtutudlo, kondili mahimong mga higala usab.—Prov. 17:17; Juan 15:15.

²¹ Human maandam ang kasingkasing sa tinun-an, sugdan na sa ansiyano ang pagbansay kaniya sa gikinahanglang mga kahanas. Unsaon kini paghimo sa ansiyano? Hisgotan kana sa sunod nga artikulo.

1. (a) Unsay dugay nang nasabtan sa mga alagad sa Diyos bahin sa pagbansay, ug sa unsang paagi kini mapadapat karon? (b) Unsay atong hisgotan niini nga artikulo?

DUGAY nang nasabtan sa mga alagad sa Diyos nga ang pagbansay makaamot sa kalamposan. Ang patriarkang si Abram “nagtigom sa iyang binansay nga mga tawo” sa pagluwas kang Lot—ug sila milampos. (Gen. 14:14-16) Sa adlaw ni Haring David, ang mga mag-aawit sa balay sa Diyos maoy mga “binansay sa awit alang kang Jehova” ug nagdayeg sa Diyos. (1 Cron. 25:7) Karon, kita may espirituwal nga pakiggubat kang Satanas ug sa iyang mga sumusunod. (Efe. 6:11-13) Kita usab naningkamot sa pagdayeg kang Jehova. (Heb. 13:15, 16) Busa, sama sa karaang mga alagad sa Diyos, kinahanglan kitang mabansay aron magmalamposon. Sa kongregasyon, gipiyal ni Jehova sa mga ansiyano ang responsabilidad sa pagbansay sa uban. (2 Tim. 2:2) Unsang mga paagi ang gigamit sa eksperyensiyadong mga ansiyano sa pagbansay sa uban nga mahimong kuwalipikado sa pag-atiman sa panon?

PALIG-ONA ANG ESPIRITUWALIDAD SA TINUN-AN

2. Sa dili pa tudloag mga kahanas ang tinun-an, unsay lagmit himoon sa usa ka ansiyano, ug ngano?

² Ingong ansiyano, ikaw ikatandi sa usa ka hardinero. Sa dili pa magpugas ug binhi, ang hardinero mag-abono sa yuta aron kini mahimong tabunok. Sa susama, sa dili pa magtudlog mga kahanas sa dili kaayo eksperyensiyadong brader, lagmit kinahanglan unang magpaambit ka kaniyag makapalig-on nga Kasulatanhong mga prinsipyo aron maandam ang iyang kasingkasing sa pagbansay.—1 Tim. 4:6.

3. (a) Sa unsang paagi ang gipamulong ni Jesus sa Marcos 12:29, 30 mahimong magamit sa panaghisgot kauban sa tinun-an? (b) Unsa tingaliy epekto diha sa tinun-an kon ang ansiyano moampo alang kaniya?

³ Aron matino kon unsa ka dako ang impluwensiya sa kamatuoran diha sa hunahuna ug panggawi sa tinun-an, mahimo nimo siyang pangutan-on, ‘Sa unsang paagi ang imong dedikasyon kang Jehova nakapabag-o sa imong paagi sa pagkinabuhi?’ Kana nga pangutana mahimong motultol sa makahuloganong panaghisgot bahin sa kon unsaon pag-alagad kang Jehova nga bug-os kalag. (Basaha ang Marcos 12:29, 30.) Tingali sa kataposan sa maong panaghisgot, mahimo kang mag-ampo kauban ang tinun-an, nga maghangyo kang Jehova nga hatagan siyag balaang espiritu nga gikinahanglan niya sa iyang pagbansay. Makapalig-on gayod sa brader nga madungog ang imong kinasingkasing nga pag-ampo alang kaniya!

4. (a) Paghatag ug mga asoy sa Bibliya nga makatabang sa espirituwal nga pag-uswag sa tinun-an. (b) Unsay tumong sa mga ansiyano dihang bansayon nila ang uban?

⁴ Sa sinugdan sa pagbansay, hisgoti ang mga asoy sa Bibliya nga makatabang sa tinun-an nga masabtan nga siya kinahanglang kasaligan, mapainubsanon, ug andam modawat ug responsabilidad. (1 Hari 19:19-21; Neh. 7:2; 13:13; Buh. 18:24-26) Ang maong mga hiyas hinungdanon alang sa tinun-an maingon nga ang abono hinungdanon alang sa yuta. Kini makapadali sa iyang espirituwal nga pag-uswag. Si Jean-Claude, usa ka ansiyano sa France, miingon: “Ang akong pangunang tumong sa pagbansay mao ang pagtabang sa tinun-an nga magmahunahunaon sa espirituwal. Mangita kog kahigayonan nga makabasa mig teksto aron ‘mabuka ang mata’ sa tinun-an sa ‘katingalahang mga butang’ diha sa Pulong sa Diyos.” (Sal. 119:18) Unsa pay laing mga paagi sa pagpalig-on sa tinun-an?

PAGSUGYOT UG MGA TUMONG​—PAGHATAG UG MGA RASON

5. (a) Nganong hinungdanon ang paghisgot ug espirituwal nga mga tumong uban sa tinun-an? (b) Nganong ang mga ansiyano angayng magbansay sa uban samtang sila batan-on pa? (Tan-awa ang footnote.)

⁵ Pangutan-a ang tinun-an, ‘Unsay imong espirituwal nga mga tumong?’ Kon siya wala pay klarong mga tumong, tabangi siya sa pagtakdag mga tumong nga makataronganon ug daling makab-ot. Sultihi siya bahin sa usa nimo ka espesipikong tumong sa una, ug madasigong iasoy kaniya kon unsa ka kamalipayon dihang nakab-ot kini. Kini tingali simple apan epektibo. Si Victor, usa ka ansiyano ug payunir sa Africa, nahinumdom: “Sa batan-on pa ko, usa ka ansiyano ang misukna nakog pipila ka pangutana bahin sa akong mga tumong. Kadtong mga pangutanaha nakatabang nako sa pagpamalandong bahin sa akong ministeryo.” Ang eksperyensiyadong mga ansiyano nagpasiugda usab sa kahinungdanon sa pagbansay sa mga brader samtang sila tin-edyer pa pinaagi sa paghatag kanilag mga asaynment sa kongregasyon nga haom sa ilang pangedaron. Kon ang pagbansay himoon samtang sila batan-on pa, sila matabangan sa pagpokus sa espirituwal nga mga tumong dihang sila mag-20 anyos na ug makaatubag daghang butang nga makapalinga kanila.—Basaha ang Salmo 71:5, 17.a

6. Unsang hinungdanong paagi ang gigamit ni Jesus sa pagbansay sa uban?

⁶ Mapukaw nimo ang tinguha sa tinun-an nga moalagad pinaagi sa pagpatin-aw kaniya dili lang kon unsay himoon kondili kon nganong himoon usab kana. Pinaagi sa paghatag ug mga rason, gisundog nimo ang Dakong Magtutudlo, si Jesus. Pananglitan, sa wala pa sugoa ang iyang mga apostoles sa paghimog mga tinun-an, si Jesus naghatag kanilag rason kon nganong angay silang motuman. Siya miingon: “Ang tanang awtoridad gihatag na kanako sa langit ug sa yuta.” Dayon siya midugang: “Busa panglakaw kamo ug paghimog mga tinun-an sa katawhan sa tanang kanasoran.” (Mat. 28:18, 19) Unsaon nimo pagsundog ang paagi sa pagbansay ni Jesus?

7, 8. (a) Unsaon pagsundog sa mga ansiyano ang paagi ni Jesus sa pagbansay? (b) Nganong hinungdanon nga komendahan ang tinun-an? (c) Unsang mga sugyot ang makatabang sa mga ansiyano sa pagbansay sa uban? (Tan-awa ang kahon nga “Kon Unsaon Pagbansay ang Uban.”)

⁷ Ipatin-aw ngadto sa tinun-an ang Kasulatanhong rason kon nganong hinungdanon ang gipabuhat kaniya. Nianang paagiha, imo siyang gitudloan sa paghunahuna pinasukad sa mga prinsipyo sa Bibliya. Pananglitan, gihangyo nimo ang usa ka brader sa pagmentinar sa entrada sa Kingdom Hall aron kini hinlo ug dili makadisgrasya. Mahimo ninyong hisgotan ang Tito 2:10 ug ipatin-aw kaniya kon sa unsang paagi ang iyang pagpanghinlo sa Kingdom Hall “makadayandayan sa pagtulon-an sa atong Manluluwas, ang Diyos.” Awhaga usab ang tinun-an sa paghunahuna sa mga tigulang diha sa kongregasyon ug kon sa unsang paagi ang pagtuman sa iyang asaynment makabenepisyo kanila. Ang maong mga panaghisgot maoy bahin sa iyang pagbansay ug makatabang kaniya nga magmahunahunaon sa mga tawo imbes sa mga lagda. Siya magmalipayon kon iyang makita nga ang mga igsoon sa kongregasyon nakabenepisyo sa iyang gihimo.

⁸ Dugang pa, komendahi ang tinun-an sa iyang paningkamot nga ipadapat ang imong mga sugyot. Nganong hinungdanon kana? Maingon nga ang tubig makapalambo sa tanom, ang sinserong komendasyon makatabang sa tinun-an nga mouswag sa iyang pag-alagad.—Itandi ang Mateo 3:17.

LAING HAGIT

9. (a) Maylabot sa pagbansay, unsa nga hagit ang giatubang sa pipila ka ansiyano sa adunahang mga nasod? (b) Nganong ang kamatuoran dili maoy panguna sa kinabuhi sa pipila ka batan-ong brader?

⁹ Ang mga ansiyano sa adunahang mga nasod dunay laing hagit: kon unsaon pagdasig ang bawtismadong mga brader nga mga 20 o 30 anyos sa pagdawat ug responsabilidad sa kongregasyon. Among gipangutana ang eksperyensiyadong mga ansiyano sa mga 20 ka nasod sa Kasadpan kon nganong ang pipila ka batan-ong brader magpanuko sa pagdawat ug mga pribilehiyo sa kongregasyon. Kadaghanan miingon: Sa bata pa sila, ang pipila kanila wala dasiga sa pagkab-ot ug espirituwal nga mga tumong. Gani, sa pipila ka kahimtang, kadtong mga batan-on nga gustong mohimo niana gidasig hinuon sa ilang ginikanan sa pagpangab-ot ug sekular nga mga tumong! Ang kamatuoran dili gayod maoy panguna sa ilang kinabuhi.—Mat. 10:24.

10, 11. (a) Sa unsang paagi anam-anam nga matabangan sa ansiyano ang usa ka brader nga daw dili interesado sa pagdawat ug responsabilidad sa kongregasyon? (b) Unsang mga teksto ang mahimong hisgotan sa ansiyano uban sa maong brader, ug ngano? (Tan-awa ang footnote.)

¹⁰ Kon ang usa ka brader daw dili interesado sa pagdawat ug responsabilidad sa kongregasyon, nagkinahanglan gayod ug paningkamot ug pailob aron mausab ang iyang panghunahuna, apan posible kana. Mahimong mabag-o sa hardinero ang direksiyon sa pagtubo sa usa ka tanom kon anam-anam niyang tul-iron ang punoan niini. Sa susama, aron makaamgo ang pipila ka brader nga kinahanglang bag-ohon nila ang ilang tinamdan labot sa pagdawat ug pribilehiyo, kinahanglan nga anam-anam sab nimo silang tabangan. Apan sa unsang paagi?

¹¹ Paggahig panahon sa pagpakighigala sa maong brader. Sultihi siya nga gikinahanglan siya sa kongregasyon. Dayon, matag karon ug unya, pakig-estorya kaniya ug hisgoti ang espesipikong mga teksto nga makatabang niya sa paghunahuna bahin sa iyang dedikasyon kang Jehova. (Eccl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5) Tingali mangutana ka, ‘Unsay imong gisaad kang Jehova dihang imong gipahinungod ang imong kaugalingon kaniya?’ Tandoga ang iyang kasingkasing pinaagi sa pagsukna, ‘Unsa kahay gibati ni Jehova dihang nabawtismohan ka?’ (Prov. 27:11) ‘Unsay gibati ni Satanas?’ (1 Ped. 5:8) Ayawg pakamenosa ang epekto sa pagbasa ug maayong pagkapili nga mga teksto.—Basaha ang Hebreohanon 4:12.b

MGA TINUN-AN, MAGMATINUMANON

12, 13. (a) Unsang tinamdan ang gipakita ni Eliseo ingong tinun-an? (b) Sa unsang paagi gigantihan ni Jehova ang pagkamatinumanon ni Eliseo?

¹² Komosta kamong batan-ong mga brader nga may ikatabang sa kongregasyon? Unsa nga tinamdan ang makatabang ninyo aron kamo magmalamposon? Sa pagtubag niana, atong hisgotan ang pipila ka panghitabo sa kinabuhi sa usa ka tinun-an sa kakaraanan.

¹³ Mga 3,000 ka tuig kanhi, ang manalagnang si Elias nagdapit sa batan-ong si Eliseo nga mahimong iyang tig-alagad. Gidawat dayon kana ni Eliseo ug matinumanon siyang naghimo sa ubos nga mga buluhaton alang sa tigulang nga manalagna. (2 Hari 3:11) Dayon, human sa mga unom ka tuig nga pagbansay, nasayran ni Eliseo nga talitapos na ang buluhaton ni Elias sa Israel. Nianang higayona, giawhag ni Elias ang iyang nabansay pag-ayo nga kauban nga dili na mosunod kaniya, apan si Eliseo tulo ka beses nga miingon kang Elias: “Dili ako mobiya kanimo.” Determinado siyang mounong sa iyang magtutudlo. Sa baylo, gigantihan ni Jehova ang pagkamaunongon ug pagkamatinumanon ni Eliseo pinaagi sa pagtugot kaniya nga masaksihan ang makapahinganghang pagbiya ni Elias.—2 Hari 2:1-12.

14. (a) Unsaon pagsundog sa mga tinun-an karon si Eliseo? (b) Nganong importante gyod nga magmatinumanon ang usa ka tinun-an?

¹⁴ Unsaon nato pagsundog si Eliseo? Dawata dayon ang mga asaynment, lakip na ang ubos nga mga buluhaton. Isipa ang imong magtutudlo ingong higala, ug ipakita kaniya nga imong giapresyar ang iyang paningkamot. Kon buhaton nimo kana, sama ra nga imo siyang giingnan: “Dili ako mobiya kanimo.” Labaw sa tanan, magmatinumanon sa paghimo sa bisan unsang asaynment nga ihatag kanimo. Nganong importante kana? Kay kon mapamatud-an nimo nga ikaw matinumanon ug kasaligan, makaseguro gayod ang mga ansiyano nga gusto ni Jehova nga hatagan kag dugang responsabilidad sa kongregasyon.—Sal. 101:6; basaha ang 2 Timoteo 2:2.

PAGPAKITAG NAHIANGAYNG PAGTAHOD

15, 16. (a) Sa unsang mga paagi si Eliseo nagpakitag pagtahod sa iyang magtutudlo? (Tan-awa ang hulagway sa sinugdan sa artikulo.) (b) Nganong misalig kang Eliseo ang iyang mga isigkamanalagna?

¹⁵ Ang asoy bahin sa manununod ni Elias, si Eliseo, nagpaila usab kon unsaon sa mga brader karon sa pagpakitag nahiangayng pagtahod sa eksperyensiyadong mga ansiyano. Human moduaw si Elias ug Eliseo sa usa ka grupo sa mga manalagna sa Jerico, silang duha miadto sa Suba sa Jordan. Didto, “gikuha ni Elias ang iyang opisyal nga besti ug gilimin kini ug gihampak ang katubigan, ug sa inanay kini nabahin.” Human makatabok sa namalang yuta, sila “nagsultihanay samtang naglakaw.” Dayag nga si Eliseo wala maghunahuna nga nahibalo na siya sa tanan. Hangtod sa pagbiya ni Elias, si Eliseo namati gayod sa tanang gisulti kaniya sa iyang magtutudlo. Dayon si Elias mikayab diha sa alimpulos. Sa ulahi, balik sa Jordan, gihampak ni Eliseo ang katubigan gamit ang besti ni Elias, nga miingon: “Hain si Jehova nga Diyos ni Elias?” Ang tubig nabahin pag-usab.—2 Hari 2:8-14.

¹⁶ Namatikdan ba nimo nga ang unang milagro ni Eliseo parehas gayod sa kataposang milagro ni Elias? Nganong makapainteres kana? Segurado nga wala maghunahuna si Eliseo nga tungod kay siya anaa na sa katungdanan, dili na niya kinahanglang sundon ang paagi sa iyang magtutudlo. Hinunoa, pinaagi sa pagsunod sa paagi ni Elias sa pagtuman sa iyang ministeryo, si Eliseo nagpakitag nahiangayng pagtahod sa iyang magtutudlo, nga tungod niana, misalig kaniya ang iyang mga isigkamanalagna. (2 Hari 2:15) Apan sa ulahi, sa 60 ka tuig nga pag-alagad ni Eliseo ingong manalagna, gipalihok siya ni Jehova sa paghimog mas daghang milagro kay kang Elias. Ingong tinun-an, unsay imong makat-onan niini?

17. (a) Unsaon pagsundog sa mga tinun-an karon ang tinamdan ni Eliseo? (b) Sa ngadtongadto, sa unsang paagi mahimong gamiton ni Jehova ang matinumanong mga tinun-an?

¹⁷ Kon makadawat kag dugang responsabilidad sa kongregasyon, ayawg hunahunaa nga gamiton nimo kana aron bag-ohon ang naandang pamaagi. Ang pagbag-o nagdepende, dili sa imong tinguha, kondili sa panginahanglan sa kongregasyon ug sa direksiyon gikan sa organisasyon ni Jehova. Pinaagi sa pagsundog sa pamaagi ni Elias, si Eliseo nakatabang sa ubang manalagna sa pagbatog pagsalig kaniya ug siya nagpakitag pagtahod sa iyang magtutudlo. Sa susama, kon padayon nimong gamiton ang binase sa Bibliya nga pamaagi sa imong mga magtutudlo, ang mga igsoon mosalig kanimo ug ikapakita nimo nga ikaw nagtahod sa eksperyensiyadong mga ansiyano. (Basaha ang 1 Corinto 4:17.) Apan, sa magkadaghan ang imong kasinatian, seguradong makatabang ka sa kongregasyon sa pagpadapat sa mga kausaban ug sa pagpasignunot sa nagauswag nga organisasyon ni Jehova. Sa ngadtongadto, sama sa kahimtang ni Eliseo, gamiton ni Jehova kamong matinumanong mga tinun-an sa paghimog mga buluhaton nga labaw pa kay nianang sa inyong mga magtutudlo.—Juan 14:12.

18. Nganong dinalian karon ang pagbansay sa mga brader?

¹⁸ Hinaot nga ang mga sugyot niini ug sa nag-unang artikulo magpalihok sa mga ansiyano sa paggahin ug panahon sa pagbansay sa uban. Ug hinaot nga kinabubut-ong dawaton sa kuwalipikadong mga brader ang maong pagbansay ug dayon maalamong gamiton kana sa pag-atiman sa mga karnero ni Jehova. Pinaagi sa paghimo niana, molig-on ang mga kongregasyon ug matabangan ang matag usa kanato nga magmatinumanon panahon sa kulbahinam nga panghitabo sa umaabot.