Mga Tigom sa Kongregasyon Pinaagig Videoconference

Daghang gobyerno sa tibuok kalibotan ang nagpatuman ug social distancing, ug gikanselar nila ang publikong mga panagkatigom. Gisunod sa mga Saksi ni Jehova ang maong mga sugo samtang padayong nagtigom sa luwas nga paagi. Busa ang mga kongregasyon migamit ug mga videoconferencing app, sama sa Zoom, aron himoon ang mga tigom.

Aron regular natong mahimo ang atong mga tigom, giaprobahan sa Nagamandong lawas nga gamiton ang mga donasyon sa pagpalit ug mga Zoom account para sa mga kongregasyon. Dako kaayo nig tabang sa mga kongregasyon nga dili makapalit ug videoconference account nga mokantidad ug ₱750-₱1,000 o kapin pa. Kini nga mga kongregasyon sagad mogamit ug libreng mga app nga limitado lang ang maka-connect o walay igong seguridad. Pero karon, ang tanang kongregasyon nga naggamit niini nga mga Zoom account sa organisasyon nakabenepisyo kay maayo ang security settings niini ug mas daghan ang maka-connect sa matag tigom. Karon, kapig 65,000 ka kongregasyon sa mga 170 ka nasod ang naggamit niini nga mga account.

Ang Kairagi Congregation, sa Manado, North Sulawesi, Indonesia, nga kaniadto naggamit ug libreng videoconferencing app, migamit nag Zoom account sa organisasyon. Si Brader Hadi Santoso miingon: “Bisan ang mga igsoon nga dili pamilyar sa paggamit ug mga gadyet mas nakabenepisyo na sa mga tigom, kay dili na sila magbalikbalik ug log in panahon sa tigom.”

Si Lester Jijón, Jr., ansiyano sa Guayacanes Oeste Congregation sa Guayaquil, Ecuador, miingon: “Kay daghang igsoon ang naglisod sa pinansiyal, ang ubang kongregasyon dili makapalit ug Zoom license aron ang tibuok kongregasyon makatambong sa mga tigom. Karon, kay mas daghan na ang maka-connect gamit ang mga Zoom account sa organisasyon, mas daghan na mig maimbitar sa mga tigom nga dili ra mabalaka sa connection limit.”

Si Johnson Mwanza, ansiyano sa Ngwerere North Congregation sa Lusaka, Zambia, misulat: “Daghang igsoon ang balikbalik nga miingon, ‘ang kahikayan sa organisasyon bahin sa Zoom mas nakapasuod namo sa mga igsoon ug gibati gyod namo nga gimahal ug giatiman mi ni Jehova.’”

Kini nga mga account sa organisasyon gipalit gamit ang pondo para sa disaster relief. Ang maong pondo naggikan sa boluntaryong mga donasyon para sa worldwide work. Kadaghanan sa donasyon gihatag online pinaagi sa donate.jw.org. Salamat sa inyong pagkamahinatagon. Ang inyong mga donasyon nakatabang sab sa ubang kahikayan sa pagpanghatag ug hinabang sa tibuok kalibotan.—2 Corinto 8:14.