Matuod nga mga Kristohanon ug ang Gubat

GISULTIHAN ni Jesus ang iyang mga tinun-an: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.” (Juan 13:34) Makapakita ba ang matuod nga mga Kristohanon sa maong gugma sa usag usa ug sa samang panahon makigbahin sa gubat ug magpinatyanay sa usag usa?

Palandonga usab ang pangutana nga gisukna ni apostol Pablo: “Nabahin ba si Kristo?” (1 Corinto 1:​13, Revised Standard Version, Catholic Edition) Pangutan-a ang imong kaugalingon: ‘Aduna bay molabaw pa niana nga pagkabahinbahin kay sa niadtong mga membro sa samang relihiyon nga nagpinatyanay sa usag usa?’

Sa pagkatinuod, dili kita mahibulong nga mahibalo nga ang unang mga Kristohanon wala makiggubat. Ang iladong Encyclopædia of Religion and Ethics ni Hastings nag-ingon: “Kaylap ang panghunahuna sa taliwala sa unang mga Iglesya nga ang gubat maoy usa ka organisadong pagkawalay-hustisya nga kinahanglang bug-os likayan sa unang mga Iglesya ug sa mga sumusunod ni Kristo.”

Ang unang mga Kristohanon nagkinabuhi sumala sa sugo ni Jesus sa paghigugma sa usag usa. Ang Aleman nga teologo nga si Peter Meinhold nagsaysay: “Bisan pag ang Bag-ong Testamento wala maghisgot bahin sa problema kon mahimo ba o dili nga magsundalo ang mga Kristohanon ug kon sila ba kinahanglang moretiro sa pagkasundalo sa dihang sila mahimong mga Kristohanon, ang karaang iglesya mibarog sa maong isyu. Ang pagkahimong Kristohanon ug sundalo giisip nga magkasumpaki.” Aduna bay usa karong adlawa ang nagabarog sama sa “karaang iglesya”?

Aduna bay Matuod nga mga Kristohanon Karong Adlawa?

Ang Encyclopedia Canadiana nag-ingon: “Ang buluhaton sa mga Saksi ni Jehova mao ang pagpasig-uli ug pagtukod pag-usab sa karaang Kristiyanidad nga gibatasan ni Jesus ug sa iyang mga tinun-an niadtong una ug ikaduhang siglo sa atong panahon. . . . Ang tanan managsoon.”

Sa unsang paagi kini aktuwal nga gipadapat? “Ang mga Saksi ni Jehova bug-os nga nagpabiling neyutral sa panahon sa gubat,” nag-ingon ang Australian Encyclopædia. Samtang ingong mga indibiduwal makahimo sila sa pagpili niining maong baroganan, sila dili mag-apil-apil sa mga kalihokan sa kagamhanan nga ilang gipuy-an. Busa sila wala mosuportar sa gubat ni Hitler, ug busa walay usa kanila ang gihusay panahon sa mga husay sa Nuremberg ingong mga kriminal sa gubat.

Usa ka Aleman nga gihukman nga sad-an ug gipatay mao si Alfred Rosenberg, pangulo sa Buhatan sa Langyawng mga Kalihokan sa Partidong Nazi. Sa pagdepensa sa polisa sa Nazi sa pagbalhog sa mga Saksi ni Jehova sa mga kampo konsentrasyon, si Rosenberg mitestigo panahon sa iyang husay: “Malulutong gihatagan ako sa usa ka Amerikanong kapilyan sa akong selda ug usa ka peryodiko sa simbahan gikan sa Columbus [Ohio]. Akong nahibaloan gikan niana nga giaresto usab sa Tinipong Bansa ang mga Saksi ni Jehova panahon sa gubat ug nga hangtod sa Disyembre 1945, 11,000 kanila ang nabilanggo gihapon sa mga kampo.” Tinuod nga ang mga Saksi ni Jehova bug-os nga neyutral, walay ginadapigan sa mga panagbangi sa politika. Sila wala makaula ug dugo, sa Gubat sa Kalibotan II o sa bisan unsang ubang gubat.

Sa Hungaria, usa ka magsusulat sa magasing Ring sa Nobyembre 4, 1992, miingon labot sa mga Saksi ni Jehova: “Mopili pa sila nga mamatay kay sa mopatay. Tungod niini, nakaseguro ako nga kon mga Saksi ni Jehova lamang ang nagpuyo sa yuta nan dili gayod unta moulbo ang mga gubat bisan asa.” Si Reo M. Christenson, usa ka propesor sa political science, naghisgot diha sa The Christian Century kon makigbahin ba ang matuod nga Kristohanon sa gubat, ug siya mihinapos:

“Mahanduraw ba ni bisan kinsa si Jesus nga naglabay ug mga granada sa iyang mga kaaway, naggamit ug masinggan, naggunit ug flamethrower, naghulog ug mga bombang nukleyar o naglansad ug ICBM nga makapatay o makaangol ug libolibong inahan ug kabataan? Ang pangutana tinuod nga baligho kaayo nga dili kinahanglang tubagon. Kon dili makahimo niini si Jesus ug sa samang panahon matinumanon sa mga gidahom kaniya, nan sa unsang paagi mahimo nato kini ug magpabiling matinumanon kaniya?” Usa kini ka pangutanang makapukaw sa hunahuna.

Bisan pa, ang mga relihiyon sa kalibotan nagpadayon sa pagdapig sa gubat. Ang mga Katoliko nagpadayon sa pagpatay sa mga Katoliko, ug kadtong sakop sa ubang mga relihiyon nagapatay sa ila mismong kauban sa relihiyon o mga membro sa ubang relihiyon. Aron masunod ang mga pagtulon-an ni Jesu-Kristo, malig-ong pagtuo ug kaisog ang gikinahanglan, ingon sa ibutyag sa mosunod tinuod nga estorya.

[Hulagway sa panid 7]

Mahanduraw ba ni bisan kinsa si Jesus nga naggamit ug masinggan diha sa gubat?

[Credit Line]

Letrato sa U.S. National Archives