TABANG ALANG SA PAMILYA | PAGMATUTO UG MGA ANAK
Ang Imong mga Anak ug ang Social Media—Bahin 2: Tudloi ang Imong Tin-edyer nga Anak sa Hustong Paggamit sa Social Media
Tungod sa mga kapeligrohan, daghang ginikanan ang midesisyon nga dili nila pagamiton ang ilang mga anak ug social media. Pero kon tugotan nimo ang imong tin-edyer nga anak nga mogamit ug social media, unsaon nimo siya pagtabang nga malikayan ang negatibong epekto niini ug mahimong responsable sa paggamit niini?
Niining artikuloha
Paggamit sa oras sa imong anak
Ang angay nimong mahibaloan: Kay makaadik ang social media, basin kinahanglan nimong tabangan ang imong anak nga limitahan ang iyang oras sa paggamit niini.
Prinsipyo sa Bibliya: ‘Seguroa ang mas importanteng mga butang.’—Filipos 1:10.
Hunahunaa: Ang paggamit ba sa imong anak ug social media nakaapektar sa iyang tulog, paghimog asaynment sa eskuwelahan, o panahon sa pamilya? Sumala sa mga researcher, ang mga tin-edyer kinahanglang matulog ug mga siyam ka oras kada gabii, pero posibleng wala ray pito ka oras ang tulog niadtong naadik na sa paggamit ug social media.
Ang imong mahimo: Estoryahi uban sa imong anak kon unsay angay niyang prayoridad, ug hisgoti kon nganong maayong limitahan ang oras sa paggamit ug social media. Paghimog rasonableng mga patakaran. Pananglitan, kinahanglang wala nay gadyet sa kuwarto kon tingkatulog na. Tumong nimo nga makakat-on ang imong anak sa pagkontrol sa iyang kaugalingon—kinaiya nga makatabang sa imong anak inigkahamtong niya.—1 Corinto 9:25.
Epekto diha sa emosyon sa imong anak
Ang angay nimong mahibaloan: Kon ang usa ka tin-edyer magsigeg tan-aw sa gi-edit nga mga selfie ug sa mga lingaw nga picture o video sa iyang mga higala, posibleng maibog siya, maguol, o ma-depress.
Prinsipyo sa Bibliya: “Isalikway ninyo ang . . . kasina.”—1 Pedro 2:1.
Hunahunaa: Na-conscious na ba hinuon ang imong anak sa iyang hitsura ug lawas kay gikompara niya ang iyang kaugalingon diha sa iyang makita sa social media? Gibati ba sa imong anak nga laay kaayo ang iyang kinabuhi, samtang ang uban enjoy kaayo sa ilang kinabuhi?
Ang imong mahimo: Estoryahi uban sa imong anak kon nganong makadaot nga ikompara ang kaugalingon ngadto sa uban. Hinumdomi nga mas apektado tingali ang mga tin-edyer nga babaye kay sa mga lalaki, kay sagad mas importante sa mga babaye ang ilang hitsura ug ang ilang relasyon sa uban. Puwede pod kang mosugyot sa imong anak nga basig puwede niyang i-deactivate panagsa ang iyang account sa social media. Ang batan-on nga si Jacob miingon: “Naay panahon nga gi-delete nako ang social media app sa akong gadyet. Nakatabang to nako nga unahon ang mas importanteng mga butang ug magbaton ug hustong panglantaw sa akong kaugalingon ug sa uban.”
Batasan sa imong anak dihang mag-online
Ang angay nimong mahibaloan: Kon mogamit kag social media, daghan ang makakita sa imong ginasulti ug ginabuhat. Natural lang nga masaypan kag sabot sa uban ug posible nga moresulta nag away.
Prinsipyo sa Bibliya: “Wad-a ang tanang klase sa pagdumot, kasuko, kapungot, siningkahay, ug sakit nga sinultihan . . . Magpakita mog kaayo sa usag usa.”—Efeso 4:31, 32.
Hunahunaa: Tungod ba sa social media nga nakakat-on ang imong anak nga manabi, makig-away, o mosultig dili maayo?
Ang imong mahimo: Tudloi ang imong anak nga magpakita ug maayong batasan kon mogamit ug Internet. Ang librong Digital Kids miingon: “Ingong mga ginikanan, obligasyon nato nga klarong tudloan ang atong mga anak nga dili maayong pasakitan ang uban—online man o sa personal.”
Hinumdomi nga dili kinahanglan nga naa tay social media. Ug dili tanang ginikanan ang nagtugot sa ilang tin-edyer nga mga anak nga mogamit niini. Kon tugotan nimo ang imong tin-edyer nga anak nga mogamit ug social media, seguroa nga kaya na niyang limitahan ang oras sa paggamit niini, kamao na siyang mopili ug maayong mga higala, ug molikay sa dili maayong mga butang diha sa Internet.