Mga Pamilyang Walay Amahan—Usa ka Ilhanan sa Kapanahonan
UNSAY ingnon nimo nga labing dakong suliran sa katilingban sa atong adlaw? Duolag 80 porsiyento niadtong gisurbi sa usa ka Gallup nga surbi sa T.B. nagtuo nga kini mao “ang lawasnon nga pagkawala sa amahan diha sa panimalay.” Sumala sa Gallup, kapig 27 ka milyong bata sa Tinipong Bansa ang nagpuyo nga bulag sa ilang tinuod nga mga amahan, ug kanang gidaghanona tuling nagatubo. Usa ka taho sa United Nations Children’s Fund nag-ingon nga duolag 50 porsiyento sa puti nga mga bata nga natawo sa Tinipong Bansa sukad sa 1980 “mogugol sa bahin sa ilang pagkabata diha sa pamilya nga usa rag ginikanan. Alang sa itom nga mga bata ang proporsiyon maoy mga 80%.” Ang USA Today sa ingon nagngalan sa Tinipong Bansa “ang pangulo sa kalibotan sa mga pamilyang walay mga amahan.”
Bisan pa niana, usa ka artikulo diha sa The Atlantic Monthly nag-ingon: “Ang pagtubo sa nabungkag nga pamilya wala lamang mahitabo sa Amerikanhong katilingban. Dayag kini diha sa halos tanang mauswagon kaayong mga nasod, lakip ang Hapon.” Ug bisan tuod lisod mahipos ang mga estadistika, daghang kabos nga mga nasod ang daw nag-atubang ug susamang suliran. Sumala sa magasing World Watch, “ang mga lalaki [diha sa kabos nga mga nasod] kasagaran mobiya sa ilang mga asawa ug mga anak tungod sa nagdaghang mga kapit-osan sa panginabuhi.” Sa tinuoray, usa ka surbi diha sa usa ka nasod sa Caribbean nagpadayag nga 22 porsiyento lamang sa mga amahang adunay otso-anyos nga mga bata ang nagpuyo ipon sa ilang mga anak.
Ang mga batang walay amahan kasagaran na bisan sa kapanahonan sa Bibliya. (Deuteronomio 27:19; Salmo 94:6) Hinuon, niadtong panahona ang dakong hinungdan nga walay amahan ang mga bata mao ang pagkamatay sa amahan. “Karong adlawa,” matod sa magsusulat nga si David Blankenhorn, “ang pangunang hinungdan sa pagkawalay-amahan maoy pag-abandonar sa amahan.” Sa tinuoray, sumala sa ato unyang makita, ang pagdaghan sa mga batang walay amahan nagpamatuod nga daghang tawo karon walay “kinaiyanhong pagbati.” Sumala sa Bibliya, kini usa lamang ka pamatuod nga kita nagkinabuhi sa “kataposang mga adlaw.”— 2 Timoteo 3:1-3.
Hinuon, alang sa mga bata ang pagkawalay-amahan diha sa ilang mga kinabuhi maoy personal nga trahedya. Magpasugod kini sa usa ka siklo sa kasakitan ug kagul-anan nga mahimong may malungtarong mga sangpotanan. Busa, niining seryeha hisgotan namo ang maong siklo, dili aron pagpaluya sa mga magbabasa, kondili aron pagtaganag impormasyon nga makatabang sa mga pamilya sa pagpahunong niining makadaot nga kiling.