Pagmatutog Maayong Mopahiangay nga mga Bata—Sa Unsang Paagi?
“Ang mga bata makakat-on ug pagtahod-sa-kaugalingon ug pagpugong-sa-kaugalingon kon higugmaon ug disiplinahon sila sa mga ginikanan,” matod pa sa taho diha sa The Gazette, usa ka mantalaan sa Montreal, Canada. Unsa ang nalangkit niini? Sumala sa clinical psychologist sa Montreal nga si Constance Lalinec, hinungdanon nga maglatid ug tin-awng mga utlanan sa panggawi sa bata.
Si Lalinec, kinsa nagtabang sa mga bata ug mga pamilya, nag-ingon usab nga “kon atong pugngan nga masinati sa mga bata ang mga sangpotanan sa ilang mga lihok, ato usab gipugngan ang dakong bahin sa ilang pagkat-on.” Ang pagkamatugoton makadaot pag-ayo sa kaugmaran sa bata.
Ang epektibong maalamon nga tambag gikan sa Bibliya bahin sa pagmatuto sa bata haom kaayo. Kini nag-ingon: “Himoa lang ang imong pulong nga Oo nga magkahulogag Oo, ang imong Dili, Dili.” (Mateo 5:37) Sa dihang malatid na ang makataronganong mga lagda ug nasabtan kini sa imong mga anak, ipatuman kini dayon ug sa matubayon. Paluyohi ang imong mga pulong pinaagig aktuwal nga lihok. Mohatag kinig tin-awng mensahe sa mga bata bahin sa ginikananong mga lagda ug mga pagdahom—nga ang mga tawo ‘moani sa kon unsay ilang gipugas.’ (Galacia 6:7; Roma 2:6) Ang gitinguhang tumong sa mahigugmaon ug epektibong disiplina mao nga makakat-on ang mga bata sa pagtuman sa mga lagda ug sa pagtugot nga makasinatig kapakyasan ug dili-dihadihang katagbawan aron ilang maugmad ang mga hiyas nga ilang gikinahanglan aron mahimong maayong mopahiangay, responsableng mga hamtong.
Ang dugang tambag bahin sa gisulti sa Diyos ngadto sa mga ginikanan bahin sa mahigugmaong pagdisiplina sa ilang mga anak makaplagan diha sa librong Ang Sekreto sa Kalipay sa Pamilya. Makadawat ka ug kopya niining 192-panid nga libro pinaagi sa pagpil-ap ug pagpadala sa kaubang kupon ngadto sa adres nga gihatag o ngadto sa nahiangayng adres nga nalista sa panid 5 niini nga magasin.
◻ Interesado ako nga makadawat ug kopya sa librong Ang Sekreto sa Kalipay sa Pamilya.
◻ Palihog kontaka ako bahin sa libreng pagtuon sa Bibliya sa balay.