Usa ka Tin-edyer nga Mapasigarbohon sa Iyang Relihiyon

SA 13-anyos pa siya, si Andrew gihatagag proyekto sa eskuylahan nga ang ulohan maoy bahin sa kultural nga panulondon. “Sa sinugdan,” siya miingon, “naghunahuna ko sa pagsulat bahin sa akong apohang lalaki, apan nakahunahuna ko: ‘Yuna pa! Usa ako sa mga Saksi ni Jehova. Kini maoy nindot nga kahigayonan aron ipahayag ang akong pagtuo!’

“Ang akong gihimong tema sa akong proyekto mao ang ‘Barog nga Malig-on,’ ug ako naggamag usa ka dakong poster nga naghulagway sa mapintas nga paglutos nga giatubang sa mga Saksi ni Jehova sa Nazi Alemanya. Lakip sa mga butang nga akong gidispley mao ang hulad sa uniporme nga dunay purpurang triyanggulo ug nagkadaiyang mga letrato ug mga sulat gikan sa pamilyang Kusserow.a Sa pagpang-apod-apod ug impormasyon, may mga kopya ako sa sulat nga gipadala sa mga Saksi ni Jehova sa gobyerno sa Alemanya, nga neyutral sa politikanhong paagi apan lig-ong nagprotesta sa dili-makataronganong mga buhat nga gihimo batok sa mga Saksi ni Jehova. Tapad sa proyekto, ang video nga Jehovah’s Witnesses Stand Firm Against Nazi Assault gipasalida nga walay hunong. Duna usab akoy gidispley nga mga Bibliya, brosyur, ug mga tract.

“Primero, ang among mga proyekto gipasundayag didto sa gimnasyum ngadto sa tanang estudyante ug mga magtutudlo sa eskuylahan. Pagkasunod gabii gidapit ang mga pamilya ug mga higala. Daghan ang nangutana kanako, tungod kay wala silay kalibotan nga ang mga Saksi ni Jehova gilutos diay sa mga Nazi.”

Miadmitir si Andrew nga nagkinahanglag kaisog aron iyang ikapahayag ang iyang pagtuo. “Nahibalo ko nga biaybiayon ko sa ubang mga tawo,” matod niya, “apan maguol gayod unta ako kon wala ko kadto buhata. Sa akong proyekto akong gisentro ang pagtagad diha sa mga tawong misugot nga mamatay aron depensahan ang ilang pagtuo kang Jehova, busa nakahukom ako nga labing menos nga akong mahimo mao ang pag-agwanta ug pipila ka pagsaway.”

Sa kataposan, nalipay si Andrew nga gipahimuslan niya kining maong kahigayonan sa paghatag ug pamatuod. “Nalangkit ako sa daghang panaghisgot bahin sa rason kon nganong dili kami moapil-apil sa gubat, ug nakapahimutang akog mga Bibliya, libro, ug tract sa mga interesado,” miingon siya, nga midugang: “Wala koy mahinumdomang okasyon nga mibati kong labi ka mapasigarbohon nga nahimong usa sa mga Saksi ni Jehova.”

[Footnote]