Ang Labing Maayong Paagi sa Pagtagbaw sa Imong Espirituwal nga mga Panginahanglan
NGANONG NAGKINAHANGLAN ug relihiyon ang mga tawo? Ang uban moingon nga ang mga tawo modangop sa espirituwal nga mga butang aron makakaplag ug kasegurohan niining walay-kasegurohang kalibotan. Apan labaw pa ang nalangkit niana. Ang usa ka artikulo diha sa mantalaang American Sociological Review nag-ingon: “Ang pagtagbaw sa panginahanglan sa kasegurohan dili maoy bugtong makapadani nga hiyas sa relihiyon. Ang mga tawo dugay nang nangitag mga tubag sa mga pangutana sama sa: Diin kita gikan? Asa kita padulong? Nganong ania kita dinhi?”
Tinong mouyon ka nga kini maoy hinungdanon kaayong mga pangutana. Tungod niini, dili ba nagkinahanglan kini ug kasaligang mga tubag? Ang maong mga pangutana hinungdanon kaayo, seryoso kaayo, aron tubagon lang pinaagig pagpili ug relihiyosong mga tinuohan gikan sa nagkadaiyang mga tradisyon tungod kay moangay kita niini sa personal. Aron kita makakaplag ug lig-on, kasaligan nga mga tubag sa mas lalom nga mga pangutana sa kinabuhi, tino nga kita nagkinahanglan ug mas maayong pamaagi.
Aduna bay mas maayong pamaagi? Si Ferrar Fenton, usa ka maghuhubad sa Bibliya, dunay talagsaong gisulti bahin nianang basahona. Kini iyang gitawag nga “ang bugtong yawi nga mobukas sa Misteryo sa Uniberso ngadto sa Tawo, ug sa Misteryo sa Tawo ngadto sa Iyang Kaugalingon.” Oo, ang Bibliya motubag sa mga pangutana bahin sa nangagi, sa presente, ug sa umaabot. Gitug-anan kita niini kon diin kita gikan, kon unsay kahulogan sa kinabuhi, kon sa unsang paagi kita makakaplag ug kalipay, ug kon unsay atong palaaboton. Walay laing basahon sa kasaysayan nga sama ka dakog impluwensiya sa Bibliya; ni dunay laing basahon nga naglungtad gihapon bisan pa sa daghan kaayong madumtanong mga pag-atake. Apan, nganong daghan man kaayo ang dili-magtagad niining talagsaong basahon sa ilang pagpangita ug mga tubag sa mga pangutana sa kinabuhi?
Daghang tawo ang wala maggahin ug panahon sa pagtimbangtimbang sa dagkong mga kalainan tali sa Bibliya ug sa mga relihiyon nga ilang nahibaloan. Ilang nakita kon sa unsang paagi kining gitawag konohay nga mga Kristohanon nagpinatyanay sa usag usa sa ngalan sa Diyos. Sama sa giingon sa The Guardian, daghan ang nagreklamo nga “karong panahona ang mga pari mas interesado sa pagpangolektag salapi kay sa paghimog mga pagduaw sa paghatag ug espirituwal nga giya.” Tingali, sila nagtuo nga giuyonan o gikonsentir sa Bibliya ang maong panggawi. Ang tinuod mao nga ang Bibliya nagsugo sa mga Kristohanon nga “maghigugmaay sa usag usa,” ug giingnan niini kadtong nagawali sa pulong, “Nadawat ninyo nga walay bayad, ihatag nga walay bayad.” (Juan 13:34; Mateo 10:8) Busa, makataronganon ba nga hukman ang Bibliya pinaagi sa mga buhat sa mga tawong nangangkon nga nagtahod niini apan wala magsunod niini?
Daghan ang nagtuo nga ang Bibliya dili-siyentipikanhon, nagkasumpaki, ug kinaraan na. Apan ang bug-os nga pagtuki nagpakita sa sukwahi. Tinuod, ang Bibliya dili usa ka teksbok sa siyensiya. Apan, kon kini maghisgot bahin sa mga topikong may kalabotan sa siyensiya—sama sa pagkasunodsunod sa pagtungha sa buhing mga butang dinhi sa yuta, sa porma sa yuta, o sa hustong pagtambal sa makatakod nga mga sakit—walay sayop nga gisulti ang Bibliya. Sa kasukwahi, kini naundan ug mga pamulong nga abante kaayo kay sa siyentipikanhong kahibalo niadtong panahona. Ug bisan tuod ang Bibliya gilangkoban sa 66 ka basahon nga gisulat sulod sa 1,600 ka tuig, kining tanan nagkahiuyon. Dugang pa, ang Bibliya nagpasundayag ug talagsaong pagsabot sa mga kinaiya sa tawo, nga naghimo niini nga nunot gihapon sa panahon.
Kining talagsaong basahon dunay hinungdanong gisulti bahin sa pagsimba sa Diyos. Kini nag-ingon nga ang maong pagsimba kinahanglang himoon, dili pinasukad sa pagbuot sa mga tawo, kondili pinasukad sa pagbuot sa Diyos. (Juan 5:30; Santiago 4:13-15; 2 Pedro 1:21) Apan pipila lang ka tawo ang tinuod nga nagsunod nianang prinsipyoha. Gikan pa sa sayong kapanahonan nga ang mga tawo nagmugnag mga relihiyon aron ipahaom sa ilang kaugalingong mga katuyoan. Mao kanay mahitabo sa dihang ang mga tawo magkulit sa ilang mga diyos gikan sa mga piraso sa kahoy ug magsimba niini. Mao kanay mahitabo sa dihang ang mga relihiyon magtudlo ug mga doktrina nga sila ray nag-imbento. Ug dili ba mao usab kanay mahitabo niadtong mga tawong magmugna sa ilang kinaugalingon nga relihiyon aron ipahaom sa ilang mga gusto?
Tagda ang usa ka kapilian. Nganong dili nimo himoon ang gihimo sa usa ka pangulong huwes sa Korte Suprema sa Tinipong Bansa? Sa samang paagi nga siya naghusay sa mga kaso sa korte, sa walay pagpihig siya nag-imbestigar sa pamatuod dapig ug batok sa pagkatinuod sa Bibliya. Unsay resulta? Siya miingon: “Ako nahidangat sa desisyon nga ang Bibliya maoy usa ka basahong labaw-tawhanon, nga gikan kini sa Diyos.”
Sa unsang paagi ikaw mismo makahimog susamang pagsusi? Ingong sugyot, tingali buot nimong sulayan ang usa ka sistematikong pagtuon sa Bibliya, nga nag-usisa sa mga tubag sa mga pangutanang gipatungha sa sinugdanan niining artikuloha. Dunay mga unom ka milyong Saksi ni Jehova, sa 235 ka nasod, kinsa naghimo ug samang pagtuon. Sila nagboluntaryo sa ilang panahon aron ikapaambit sa uban ang ilang nakat-onan. Ang kurso sa pagtuon sa Bibliya sa balay nga ilang ginatanyag nga walay bayad nakatabang sa minilyon sa pagkakaplag ug pagtuo nga labaw pa sa kon unsay nauso o kon unsay nagustohan sa usa ka tawo. Ang matuod, putli nga Kristiyanidad nga gipresentar diha sa Bibliya dili lamang kay lain na usab nga relihiyon. Kini naghawas sa kamatuoran bahin sa Diyos ug sa iyang mga katuyoan. Busa nganong magmakontento man sa pagdawat sa usa ka butang nga dili mao ang kamatuoran?—Juan 17:17.
[Mga hulagway sa panid 10]
Ang labing maayong paagi sa pagtagbaw sa imong espirituwal nga mga panginahanglan mao ang pagkat-on bahin sa Diyos gikan sa Bibliya ug pagpakig-uban sa matuod nga mga magsisimba