Luwas pa ba Gihapon ang Pagsakay ug Ayroplano?
UPAT ka dagkong depasaherong mga ayroplano gi-highjack. Upat ka ayroplanong nahagsa. Pagkagun-ob sa nagbuntaog nga mga tinukod. Hulagway sa usa ka 767 nga ayroplano nga milagbas sa usa sa Twin Towers, nga gibalikbalik pagpakita diha sa telebisyon.
Gumikan sa mga pag-atake nga nahitabo sa Septiyembre 11, 2001, nahimutang kita sa makahahadlok nga bag-ong yugto sa pagpangatake sa mga terorista. Ang mga kompaniya sa ayroplano nahimong mga galamiton sa pagpatay ug mga tawo, ug ang ayroplano nahimong nagdilaab nga mga kasangkapan sa pagpatay.
Tungod niini, usa ka bag-ong matang sa mahadlokong mga tigbiyahe sa kahanginan ang mitungha: Kadtong mibating luwas kanhi apan karon nahadlok na tungod sa posibilidad nga moatake ang mga terorista. Dugang pa, ang sunodsunod nga malaglagong mga aksidente sa kahanginan nga walay labot sa terorismo human sa Septiyembre 11 nakapasamot sa kahadlok sa daghan sa pagsakay ug ayroplano.
Tinuod, ang pagbiyahe sa kahanginan maoy usa ka kaluho nga dili maabot sa milyonmilyong tawo sa tibuok kalibotan. Apan, alang sa uban ang pagsakay ug ayroplano maoy usa ka butang nga kinahanglan nilang buhaton kanunay. Alang niadtong dunay mga trabaho nga nagkinahanglan ug pagsigeg biyahe tungod sa negosyo, ang pagsakay sa ayroplano dili kalikayan. Ang Kristohanong mga misyonaryo ug mga ministro kasagarang nagkinahanglan nga mobiyaheg dugay sakay sa ayroplano sa pagpaingon ug gikan sa ilang mga asaynment. Bisan alang sa mga kabos, usahay ang usa ka ayroplano mao lamang ang angayang paagi sa pagbiyahe panahon sa medikal nga emerhensiya. Ug libolibong piloto ug mga tripulante ang nanginabuhi pinaagi sa pagsakay sa ayroplano.
Daghan niining mga tigbiyahe sa kahanginan, nga tingali nakuyawan usab, ang kinahanglang magpakalma sa nabalakang mga kapikas ug nangahadlok nga mga anak sa dili pa sila molarga. Ug samtang ang paggikan sa erport nga kanhi naandan na nahimong malisod nga mga kasinatian, naghunahuna ang mga biyahedor kon ang pagsakay ug ayroplano mao pa ba gihapoy maayong paagi sa pagbiyahe.
Aron mahisgotan kining maong mga isyu, ang Pagmata! nangonsulta sa mga batid sa seguridad, kawani sa erport, opisyal sa kompaniya sa ayroplano, ug mga trabahador nga nagmentinar sa ayroplano. Morag nagkauyon silang tanan niini: Bisan tuod ang pagsakay ug ayroplano mao gihapon ang usa sa labing luwas nga paagi sa pagbiyahe, ang bag-ong mga hulga nagkinahanglan ug bag-ong mga paagi sa pagpauswag sa seguridad sa mga tawong mosakay ug ayroplano.
Ang sunod nga mga artikulo maghisgot sa mga problema nga nalangkit ug kon unsay imong mahimo sa personal aron mapauswag ang imong kahilwas ug kaharuhay samtang nagsakay sa ayroplano.