Ang Dili Daling Mamatay nga Water Bear
TINAMPO SA MAGSUSULAT SA PAGMATA! SA JAPAN
◼ PANGITA diha sa halos tanang matang sa tubigong puy-anan sa tibuok kalibotan—malumot man, yelo, sapa, init nga mga tubod, linaw, dagat, ug bisan sa imong kaugalingong lagwerta—ug lagmit makakita ka ug water bear, usa sa dili daling mamatay nga linalang nga kinagamyan sa tanang kalalangan. Ang water bear nga hilabihan ka giming nga halos dili makita, dunay mubo, upat ka bahin nga lawas nga baga ug panit, ug kini dunay walo ka tiil, ang matag usa niini dunay mga kuyamoy. Ang porma ug linihokan niini kaamgid nianang nagbaguod nga oso.
Ang mga water bear maoy mga tardigrade, nga nagkahulogang “luyahon ug lihok.” Daghang matang niini ang nailhan, ug ang mga baye mangitlog ug 1 ngadto sa 30 ka itlog sa usa ka higayon. Tinagpulo ka libo niining gigming nga mga linalang makita diha sa pipila ka kumkom sa basa nga balas o yuta. Makakita ka ug daghan niini diha sa mga lumot-lumot sa atop.
Ang water bear mabuhi halos sa kinalisdang kahimtang. “Ang mga espesimen nga gibutang diha sa vacuum sulod sa walo ka adlaw, gibalhin diha sa helium gas sulod sa tulo ka adlaw sa normal nga temperatura, ug dayon gibutang sa temperatura nga -272°C (-458°F) sulod sa daghang oras, naulian sa dihang gibalik sa normal nga temperatura,” nag-ingon ang Encyclopædia Britannica. Sila dili usab maunsa bisan pa sa gatos-gatos ka pilo nga radyasyon sa X-ray nga makapatay na ug tawo. Ug, sumala sa teoriya, sila mabuhi bisan sa wanang sa usa ka yugto sa panahon!
Ang ilang sekreto mao ang ilang katakos sa paghimo sa ilang lawas nga daw patay diin ang ilang metabolismo mohinay ug ubos sa 0.01 porsiyento sa normal—nga halos dili na mamatikdan! Aron mahimo kini, ipauk-ok nila ang ilang mga bitiis sulod sa ilang lawas, ang nahurot nga tubig sa lawas ilang pulihan ug linain nga kalamay, ug mobalikugkog sila aron mahimong giming nga bola nga gitawag ug tun, nga naputos sa lapot nga lana. Kon mobalik na ang normal, umogon nga kahimtang, sila maulian sulod sa pipila ka minutos ngadto sa pipila ka oras. Sa usa ka higayon, ang mga water bear nga temporaryong nagpahunong sa ilang kinabuhi sulod sa 100 ka tuig naulian!
Oo, sa ilang hilom apan katingalahang paagi, kining gigming nga “nagakamang nga mga linalang” nanagdayeg kang Jehova.—Salmo 148:10, 13.
[Picture Credit Line sa panid 30]
© Diane Nelson/Visuals Unlimited