“Padayon sa Pagbantay!” Distritong Kombensiyon sa mga Saksi ni Jehova
◼ Ang 96 niining tulo ka adlaw nga kombensiyon, nga magsugod dinhi sa Pilipinas sa Oktubre 23-25, 2009, pagahimoon sa tibuok nasod sulod sa pipila ka bulan, nga matapos sa Enero 8-10, 2010. Ang mga sesyon matag adlaw magsugod sa alas 8:20 s.b. pinaagig musika. Ang tema sa Biyernes, nga gipasukad sa Mateo 24:44, maoy ‘Pamatud-i nga Kamo Andam.’ Ang pakigpulong sa tsirman sundan sa mga pakigpulong “Ang mga Kombensiyon Motabang Kanato nga Magmabinantayon Kanunay” ug “Si Jehova—Ang Diyos sa ‘mga Panahon ug sa mga Yugto sa Panahon.’” Dayon ang simposyum nga “Sundoga ang mga Matinumanon nga Nagpadayon sa Pagbantay” maghisgot kon sa unsang paagi si Noe, Moises, ug Jeremias nakapadayon sa pagbantay. Ang sesyon sa buntag taposon pinaagi sa yawing pakigpulong, “Kon Giunsa Pagtabang ni Jehova Kanato sa ‘Pagpadayon sa Pagbantay.’”
Ang unang pakigpulong sa Biyernes sa hapon mao ang “Mga Tubag sa mga Pangutana Bahin sa ‘Kataposang mga Adlaw,’” ug kini sundan sa mga pakigpulong “‘Wala Kamo Mahibalo sa Adlaw Ni sa Takna’—Ngano?” ug “Hibaloi nga Haduol Na ang Kataposan.” Ang sunod maoy unom ka bahin nga simposyum, “Padayon sa ‘Pagtukaw’ Ingong Kristohanong Pamilya!” Ang unang tulo ka bahin maghisgot sa mga bana, asawa, ug mga anak. Ang nahibiling tulo ka bahin nag-ulohan ug “Hupting Yano ang Imong Mata,” “Padayon sa Pagkab-ot ug Espirituwal nga mga Tumong,” ug “Himoang Regular ang Pamilyahanong Pagsimba.” Ang sesyon sa hapon taposon pinaagi sa pakigpulong nga “Kasulatanhong mga Pulong nga Motabang Kanato sa ‘Pagbantay Pag-ayo.’”
Ang tema sa Sabado maoy “Hupti Ninyo ang Maayong Panghunahuna, Magmabinantayon,” nga gipasukad sa 1 Pedro 5:8. Ang lima ka bahin nga simposyum nga nag-ulohang “Tabangi ang mga Tawo nga ‘Momata Gikan sa Pagkatulog,’” naglakip sa mga pakigpulong nga “Atong Ministeryo—Nganong Hinungdanon Kaayo?,” “Magmapaniiron Diha sa Ministeryo,” “Paningkamoti nga Mouswag ang Imong Katakos,” “Ayawg Kalimti ang Imong mga Paryente!,” ug “Hunahunaa Kanunay ang Pagkadinalian sa Panahon!” Human sa mga pakigpulong “Sundoga ang Ehemplo ni Jesus sa Pagkamabinantayon” ug “Magmabinantayon Labot sa mga Pag-ampo,” ang sesyon taposon pinaagi sa pakigpulong sa bawtismo, ug pagkahuman bawtismohan ang mga kandidato.
Ang programa sa Sabado sa hapon maghisgot sa lima ka bahin nga simposyum nga “Pagbantay sa mga Lit-ag ni Satanas!”—“Ang Kalayo,” “Ang Gahong,” “Ang Bitik,” “Ang Lit-ag nga Makatuok,” ug “Ang Lit-ag nga Makaangol.” Sundan kini sa linaing pakigpulong nga nag-ulohang “Hangtod nga Ako Mamatay Dili Ko Wad-on ang Akong Integridad!” Ang mga sesyon niining adlawa taposon pinaagi sa mga pakigpulong “Ayaw Paglingi ‘sa mga Butang nga Anaa sa Luyo’” ug “Kat-oni ang Pagkamabinantayon sa mga Apostoles ni Jesus.”
Ang tema sa Dominggo nga gipasukad sa Habacuc 2:3 maoy “Padayon sa Pagpaabot . . . Kini Dili Maulahi.” Human sa pakigpulong bahin sa tema niining adlawa, ang simposyum nga “Ipunting ang Inyong mga Mata sa mga Butang nga Wala pa Makita” maghisgot niining mga ulohana: “Ang Napulo ka Sungay . . . Magadumot sa Bigaon,” “Ang Kanasoran Makaila Kang Jehova,” “‘Ang Tanang Gingharian’ Pagadugmokon,” “Ang Yawa Pagagaposon Sulod sa Usa ka Libo ka Tuig,” ‘Sila Magtukod ug mga Balay ug Magtanom ug Kaparasan,’ ‘Ang Lobo ug ang Nating Karnero Mag-usa sa Pagpangaon,’ ‘Ang Diyos Magapahid sa Tanang Luha,’ “Ang Tanan nga Anaa sa Handomanang mga Lubnganan . . . Manggula,” ug “Ang Diyos Mahimong ‘Tanang Butang Ngadto sa Tanan.’” Ang sesyon sa buntag taposon pinaagi sa pakigpulong publiko nga nag-ulohang “Sa Unsang Paagi Ikaw Maluwas sa Kataposan sa Kalibotan?”
Ang linaing programa sa Dominggo sa hapon mao ang makahilap sa kasingkasing nga modernong drama nga ‘Ang Imong Igsoon Namatay ug Nabuhi Pag-usab,’ nga gipasukad sa sambingay ni Jesus bahin sa mausikong anak. Human sa sumaryo sa Pagtuon sa Bantayanang Torre, ang kombensiyon taposon pinaagi sa pakigpulong nga “Padayon sa Pagpaabot, Bantayi ang Adlaw ni Jehova!”
Pagplano na karon sa pagtambong. Aron imong mahibaloan ang kinadul-an nga kombensiyon sa imong lugar, kontaka ang Kingdom Hall sa mga Saksi ni Jehova sa inyong dapit o pagsulat sa mga magpapatik niining magasina.