“Wala Ko Mamatay”

● Nahibalo ka ba niini nga balak? Nakadungog ka ba nga gikanta kini? Sa nanglabayng dekada, kini nga balak nakahupay sa mga tawo sa tibuok kalibotan. Lainlaing magbabalak ang gituohang nagsulat niini. Ang uban nag-ingon pa gani nga pangadye kini sa mga Navajo panahon sa paglubong.

Kini nga balak nahimong popular nga awit sa Japan pipila na ka tuig ang milabay, apan kini nakapalibog sa mga tawo. Ang mga Hapon sagad moduaw sa lubnganan sa pamilya aron sa pagpasidungog sa ilang namatayng mga paryente nga ilang gituohang buhi pa didto. Tungod sa maong awit nga nagtudlog sukwahi sa ilang gituohan, daghan ang nakapangutana, “Hain man diay ang mga patay?”

Naandan na sa mga Budhistang Hapon ang paghaya sa mga patay ug paghimog mga rituwal sa paglubong. Apan kadaghanang Budhista dili makatubag sa pangutana, Hain ang mga patay? O sa ubang pangutana sama sa: Ang mga patay ba sa ubang relihiyon ug mga nasod parehas rag dulnganan? Nganong ang mga patay walay mahimo?

Daghan ang nagtuo nga dili matubag kana nga mga pangutana ug pag-usik lag panahon ang pagpangitag tubag niana. Apan tingali mangutana ka, ‘Unsay mahitabo dihang kita mamatay?’ Asa makita ang tubag niini? Ang Bibliya nag-ingon nga ang Diyos naglalang sa unang magtiayon nga hingpit ug naghatag kanilag nindot nga tanamang puy-anan. Sila dunay paglaom nga mabuhi sa walay kataposan sa Paraisong yuta kon sila mosunod sa Diyos. Apan sila misupak.

Busa milihok ang Diyos. Iyang gipapahawa ang magtiayon sa ilang Paraisong puy-anan ug gikuha kanila ang paglaom nga mabuhi sa dayon. Iyang gipatin-aw ang resulta sa ilang pagsupak: “Kay abog ikaw ug sa abog ikaw mopauli.” Ang tawo gihimo gikan sa abog, ug sa ngadto-ngadto—dihang mamatay—siya mobalik sa abog.—Genesis 2:7; 3:19.

Usa ka tawo sa Kofu, Japan, nga nag-atiman ug dakong sementeryo, miingon: “Ang butanganan sa abo ug bukog puno sa dihang akong ilubong. Paglabay ug mga lima ka tuig, katunga na lang ang sulod niini. Paglabay ug napulo ka tuig, kini wala nay sulod.” Ang atong lawas gilangkoban ug mga elemento sa yuta, ug paglabay sa panahon kini mahimong abog. Busa, unsa na man lay mabilin?

Bisan tuod dili na kita maglungtad inigkamatay nato, ang atong Magbubuhat, kinsa nahibalo bisan sa kamatayon sa usa ka goryon, mahigugmaong mahinumdom kanato. (Mateo 10:29-31) Sumala sa iyang saad, kita iyang banhawon, oo, kita mabuhi pag-usab. Kita iyang pukawon gikan sa pagkatulog sa kamatayon.—Job 14:13-15; Juan 11:21-23, 38-44.

Kon gusto kang mahibalo ug dugang bahin niini, amo kang gidapit sa pagsulat sa mga tig-imprenta niining magasina, nga malipay sa paghatag ug dugang impormasyon, o tan-awa ang among Web site nga www.watchtower.org.