Kon Unsaon Pagdisiplina sa Imong Anak nga Tin-edyer

ANG PROBLEMA

Ang balaod sa balay mao nga ang cellphone patyon na pagka-alas 9 sa gabii, apan ang imong anak nga babaye kaduha nimo masakpi nga nag-text lapas na sa tungang gabii. Ang imong anak nga lalaki imong gibaoran nga kinahanglang naa na siya sa balay pagka-alas 10 sa gabii, pero alas 11 na pod siya miuli.

Tinuod, ang imong anak nakalapas sa imong balaod. Pero kinahanglang mahibalo ka una kon nganong iyang gilapas ang imong balaod. Ayawg kabalaka. Basig ang iyang pagkasukihan puwede pang matul-id.

MGA HINUNGDAN

Walay klarong balaod. Ang ubang batan-on dili mosunod sa mga balaod aron sa pagsulay kon unsang balaora ang ilang malutsan. Pananglitan, kon ang ginikanan moingon nga mao ni ang silot sa ingon niini nga sala, testingan sa batan-on paglapas ang balaod sa pagsusi kon tinud-on ba gyod sa ginikanan ang ilang giingon. Rebelyoso ba gyod kining bataa? Aw, basig dili. Ang tinuod, ang mga batan-on dili mosunod sa balaod kon dili barogan sa ginikanan ang ilang balaod o kon ang mga balaod walay klaro.

Sobra ka estrikto. Gawngan sa ubang ginikanan ang ilang anak pinaagi sa paghatag ug daghan kaayong balaod. Kon ang anak makalapas ug balaod, masuko ang ginikanan ug mohatag siyag dugang balaod. Pero kana makapasamot lang sa problema. “Kon sobra ka kaestrikto, ang imong anak mosukig samot,” nag-ingon ang librong Parent/Teen Breakthrough, ug kini midugang: ‘Kini nga pamaagi parehas ug pagpahid ug gahing mantekilya sa humok nga tinapay: mabitas ang tinapay, busa dili magsilbi kon iduot ug pahid ang gahi nga mantekilya.’

Ang hustong pagdisiplina makatabang. Dili sama sa “pagsilot,” nga nagkahulogang pagpaantos, ang “pagdisiplina” nagkahulogang pagtudlo. Nan, unsay imong himoon aron mosunod ang imong anak sa imong mga balaod?

ANG IMONG MAHIMO

Klaroha ang balaod. Ang imong anak kinahanglang mahibalo kon unsay angay niyang himoon ug kon unsay iyang maagoman kon siya mosupak.​—Prinsipyo sa Bibliya: Galacia 6:7.

Sugyot: Ilista ang imong mga balaod. Dayon pangutan-a ang imong kaugalingon: ‘Daghan ra ba kaayo kog balaod o kulang? Wala na ba kinahanglana ang pipila niini? Kinahanglan bang ipaangay nako ang akong balaod kon makita nako nga medyo kasaligan ang akong anak?’

Ayaw pagpaling-paling. Ang anak maglibog kon ang iyang sala sa miaging semana gipalabay lang apan niini nga semana gidisiplina siya sa parehas ra nga sala.​—Prinsipyo sa Bibliya: Mateo 5:37.

Sugyot: Paghatag ug disiplina nga sibo sa iyang nahimong sala. Pananglitan, kon ang imong anak wala mouli sa gitakdang oras, agig disiplina, papaulia siyag mas sayo.

Magmakataronganon. Hatagig dugang kagawasan ang imong anak kon siya medyo kasaligan na.​—Prinsipyo sa Bibliya: Filipos 4:5.

Sugyot: Hisgoti sa imong anak ang mga balaod. Mahimo pa gani nimo siyang pahunahunaon kon unsang disiplina ang ipahamtang sa usa ka partikular nga sala. Ang anak dakog purohan nga motuman sa balaod kon siya paapilon sa paghimog balaod.

Ipaugmad ang maayong kinaiya. Dili lang pagtudlo sa imong anak sa pagtuman sa balaod ang imong tumong kondili pagtabang usab kaniya sa pag-ugmad ug maayong konsensiya nga makaila kon unsay husto ug unsay sayop. (Basaha ang “Ipaugmad ang Maayong mga Hiyas.”)​—Prinsipyo sa Bibliya: 1 Pedro 3:16.

Sugyot: Pagiya sa Bibliya. Kini ang labing maayong tuboran sa “disiplina nga magahatag ug hait nga salabotan,” ug kini makahatag ug kaalam ngadto sa walay kasinatian, ug kahibalo ug katakos sa panghunahuna ngadto sa batan-ong lalaki o babaye.​—Proverbio 1:1-4.