ANG mga tawo gibombardiyohan ug daghan kaayong paanunsiyo. Unsay tuyo sa mga tigpaanunsiyo? Ilang ipabati kanato nga kanang atong gustong paliton kinahanglanon gyod. Ang mga tigpaanunsiyo nahibalo nga ang mga tawo maaghat sa pagpalit tungod sa emosyon. Busa ang mga paanunsiyo gihimo sa paagi nga makabig pag-ayo ang emosyon.

Ang librong Why People Buy Things They Don’t Need nag-ingon: “Sa dihang magplanong mamalit, ang pumapalit sagad magpanghanduraw nga nangita sa iyang palitonon, nakit-an kana, ug gipalit.” Ang ubang eksperto nagtuo nga ang ubang pumapalit maghinamhinam samtang namalit, gani mobati sila nga mibukal ang adrenaline sa ilang lawas. Ang eksperto sa paanunsiyo nga si Jim Pooler miingon: “Kon mamatikdan sa naninda nga nagpanikad ka sa pagpalit, iya kining pahimudsan.”

Unsay imong himoon aron dili ka mabiktima sa maayong laking mga tigpaanunsiyo? Ayaw padala sa imong emosyon, ug timbang-timbanga kon unsay gipasalig sa mga tigpaanunsiyo ug kon unsay tinuod.

ANG PASALIG: “Moarang-arang ang Imong Kinabuhi”

Normal lang nga ang tawo gustog maarang-arang nga kinabuhi. Kita bombardiyohan sa mga tigpaanunsiyo ug mga mensahe nga ang tanan natong gipangandoy​—maayong panglawas, kasegurohan, pagkawalay-tensiyon, ug suod nga relasyon​—mabatonan pinaagi sa pagpalit sa husto kuno nga produkto.

ANG TINUOD:

Sa magkadaghan ang atong butang, magkamenos usab ang kalidad sa atong kinabuhi. Dugang panahon ug kuwarta ang gikinahanglan sa pag-atiman ug daghang butang. Ang tensiyon mosamot tungod sa pagsigeg hunahuna sa utang, ug momenos ang panahon para sa pamilya ug mga higala.

Prinsipyo: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”​—Lucas 12:15.

ANG PASALIG: “Mosikat Ka”

Pipila lang ang moadmitir nga mamalit sila aron magpabilib sa uban. Apan si Jim Pooler miingon: “Dihang ang mga tawo mamalit, kinaiya nila nga makigkompetensiya sa mga higala, silingan, kauban sa trabaho ug mga paryente.” Tungod niini, ang mga anunsiyo magpakitag mga produkto nga nabatonan sa mga tawong dato. Ang ilang mensahe sa mga pumapalit mao kini: “Mahimong maparehas ka niini!”

ANG TINUOD:

Kon ikomparar nato ang atong kaugalingon sa uban aron lang motaas ang atong pagtamod sa kaugalingon, dili gyod kita makontento. Dihang makab-ot na nato ang atong gipangandoy, mangandoy kitag mas labaw pa.

Prinsipyo: “Ang mahigugmaon . . . sa salapi dili matagbaw sa salapi.”​—Ecclesiastes 5:10.

ANG PASALIG: “Mailhan Ka Kon Kinsa Ka”

Ang librong Shiny Objects nag-ingon: “Sagad ipadayag nato sa uban kon kinsa kita (o kon unsay gusto nato nga mailhan ta) pinaagi sa atong paggamit ug pagpagarbo sa materyal nga mga butang.” Ang mga tigpaanunsiyo nahibalo niini ug ilang manehoon nga ang tatak sa produkto​—ilabina iladong tatak​—malantaw nga para sa mga sosyal ug maayog moral.

Ikaw komosta? Gusto ka bang mailhan nga pasyonista o hilig ug esport? Bisag unsa pay imong gusto, ipasalig sa mga tigpaanunsiyo nga maingon ka niana basta mopalit lang kag produkto sa usa ka partikular nga tatak.

ANG TINUOD:

Bisag unsa pay atong paliton, dili kana makausab sa atong pagkatawo ni makahatag kana kanato ug dalayegong mga hiyas, sama sa pagkamatinud-anon ug pagkamaayog moral.

Prinsipyo: “Himoa nga ang inyong dayandayan dili . . . sa pagsul-ob ug mga pahiyas nga bulawan o sa pagsul-ob ug panggawas nga mga besti, kondili diha sa natago nga pagkatawo sa kasingkasing.”​—1 Pedro 3:3, 4.

Gawas pa sa pangengganyo sa mga tigpaanunsiyo, ang atong pagbati ug batasan makatukmod kanato sa pagpatuyang ug gasto. Aniay unom ka sugyot nga makatabang aron makapugong ka sa pagsigeg gasto.

1. Ayaw pagdalidalig palit. Ganahan ka bang mamalit ilabinag makakita kag baligya nga gi-sale? Basig matental ka sa pagpalit nga wala sa plano. Aron dili ka matental, palandongag maayo ang sangpotanan sa pagpalit, pagpanag-iya, ug pagmentinar sa butang nga gusto nimong paliton. Hinumdomi kadtong panahon nga nagdalidali kag palit unya nagmahay ka. Hunahunaa unag maayo sa dili ka pa mopalit.

2. Ayaw pamalit agig panghupay sa kaguol. Ang pagpamalit temporaryong makawala sa kaguol. Pero inigbalik sa imong kaguol, mopalit na pod ka para mahupayan na pod ka. Imbes mamalit sa pagpaalibyo sa imong gibati, pakig-uban sa mga higala nga mahingawaon o paghimog ubang kalihokan, sama sa paglakaw-lakaw.

3. Ayawg himoang lingaw-lingaw ang pag-shopping. Ang pagpamalit gihimong kalingawan sa dagkong mga mall. Bisag lingaw-lingaw lang ang pag-adtog mall o pagtan-aw-tan-aw sa Internet, ang kadaghanan sa imong makita gidisenyo aron maengganyo ka sa pagpalit. Pag-shopping lang kon duna ka nay espesipikong butang nga paliton, ug mao ra kanay palita.

4. Magmaalamon sa pagpilig mga kauban. Ang estilo sa kinabuhi ug ang ginaestorya sa imong mga higala dakog impluwensiya kanimo. Kon nanobra ka na sa imong paggasto kay gusto kang makabaton sa nabatonan sa imong mga higala, nan pagpilig mga higala nga dili kaayo mohatag ug dakong importansiya sa kuwarta ug materyal nga mga butang.

5. Magmaalamon sa paggamit ug credit card. Sayon ang pagpamalit pinaagig credit card nga ibalewala lang nimo ang mga epekto niini. Paningkamot nga mabayran kada bulan ang tibuok kantidad nga nautang. Kinahanglang mahibalo ka sa interes ug sa ubang bayranan sa credit card, ug itandi kini sa ubang mga credit card aron mahibalo ka kon hain ang kinaubsan ug interes. Pagbantay sa mga premium card nga dagkog interes ug dunay ubang bayranan ug nagtanyag ug mga benepisyo nga wala nimo kinahanglana. Imbes mamalit pinaagig credit card, pagtigom alang sa mahal nga palitonon ug bayri kinig cash.

6. Sayra ang imong pinansiyal nga situwasyon. Magsige ra kag gasto kon dili ka segurado sa imong pinansiyal nga situwasyon. Paghimog rekord sa imong nagasto ug kon pila na lay nabiling kuwarta. Planoha kon pilay imong ibadyet kada bulan base sa imong kita ug sa miaging gastos. Subaya ang imong gastos, ug tan-awa kon nasunod ba nimo ang imong badyet. Pangutana sa imong kasaligang higala bahin sa pinansiyal nga mga butang nga wala kay hanaw.