2. Kita bay Mabasol sa Atong Pag-antos?
Kon Nganong Importanteng Mahibalo
Kon oo ang tubag, lagmit naa tay mahimo aron mamenosan ang atong pag-antos.
Hunahunaa Kini
Sa mosunod nga mga hinungdan sa pag-antos, tawo kahay mabasol niini?
Pag-abuso.
Gibanabana sa World Health Organization (WHO) nga 1 sa 4 ka tawo ang nakasinatig pisikal nga pag-abuso sa bata pa sila ug 1 sa 3 ka babaye ang nakasinatig pisikal o seksuwal nga pag-abuso (o pareho) sa ilang kinabuhi.
Mamatyan ug Minahal.
“Sa tibuok kalibotan gibanabana nga 477,000 ang gipatay niadtong 2016,” miingon ang World Health Statistics 2018, nga gi-publish sa WHO. Wala pay labot niana ang 180,000 nga gibanabana nga namatay sa mga gubat ug panag-away nianang tuiga.
Problema sa Panglawas.
Sa artikulo nga gi-publish sa magasing National Geographic, si Fran Smith misulat: “Kapin sa usa ka bilyong tawo ang nanigarilyo, ug ang tabako konektado sa lima ka pangunang hinungdan sa kamatayon: sakit sa kasingkasing, stroke, kanser sa baga, ug mga impeksiyon ug sakit sa baga.”
Dili Patas nga Kahimtang sa Kinabuhi.
“Ang kapobrehon, dili maayong pagtratar tungod sa estado sa kinabuhi, pagpihigpihig sa rasa ug sekso, pagbakwet sa usa ka lugar, ug ang kultura nga magpalabwanay makapasamot sa kasakit, kabalaka, depresyon, ug kahadlok,” mikomento ang psychologist nga si Jay Watts.
DUGANG IMPORMASYON
Tan-awa ang video nga Nganong Gilalang sa Diyos ang Yuta? sa jw.org.
Ang Giingon sa Bibliya
Tawo ang hinungdan sa kadaghanang pag-antos.
Tungod sab sa dili maayong pagmando sa mga gobyerno, lisod kaayo ang kinabuhi sa mga tawo.
“Ang tawo nagmando sa tawo alang sa iyang ikadaot.”—ECCLESIASTES 8:9.
Mamenosan ang pag-antos.
Ang mga prinsipyo sa Bibliya makatabang sa pagbaton ug maayong panglawas ug malinawong relasyon sa uban.
“Ang kalmadong kasingkasing makaayo sa lawas, apan ang pagselos makadunot sa kabukogan.”—PROVERBIO 14:30.
“Wad-a ang tanang klase sa pagdumot, kasuko, kapungot, siningkahay, ug sakit nga sinultihan, apil na ang bisan unsa nga makapahinabog kadaot.”—EFESO 4:31.