3. Nganong Nag-antos ang Maayong mga Tawo?
Kon Nganong Importanteng Mahibalo
Morag dili makataronganon nga mag-antos ang maayong mga tawo. Busa wala ra diay pulos nga magbinuotan.
Hunahunaa Kini
Gituohan sa uban nga ang tawo balikbalik nga mamatay ug ipanganak pag-usab. Miingon sila nga kadtong maayog binuhatan makabatog mas maayong kinabuhi inigkatawo nila pag-usab, samtang kadtong daotag binuhatan mag-antos sa ilang sunod nga kinabuhi. Gani mag-antos kuno gihapon ang usa ka maayong tawo kon nakahimo siyag daotan sa iyang “miaging kinabuhi.” Pero . . .
Unsay katuyoan sa maong pag-antos, nga dili man gani mahinumdom ang tawo sa iyang miaging kinabuhi?
Kon mag-antos ra man diay gihapon ta tungod sa atong binuhatan sa miaging kinabuhi, nganong maningkamot pa man ta nga makabatog maayong panglawas ug maglikay nga maaksidente?
DUGANG IMPORMASYON
Tan-awa ang video nga Nganong Gitugotan sa Diyos ang Pag-antos? sa jw.org.
Ang Giingon sa Bibliya
Ang pag-antos dili silot gikan sa Diyos.
Ang tinuod, ang tawo sagad mag-antos kay natayming nga naa siya sa sayop nga lugar ug oras.
“Ang kusog modagan dili kanunayng modaog sa lumba, o ang kusgan dili kanunayng modaog sa gubat, o ang maalamon dili kanunayng dunay pagkaon, o ang utokan dili kanunayng dunay bahandi, o ang dunay kahibalo dili kanunayng molampos, kay ang panahon ug ang wala damhang panghitabo modangat kanilang tanan.”—ECCLESIASTES 9:11.
Ang atong napanunod nga sala nakadugang sa atong pag-antos.
Ang pulong nga “sala” sagad gamiton sa mga tawo sa pagtumong sa daotang binuhatan. Pero sa Bibliya, nagtumong sab ni sa kahimtang nga napanunod sa tanang tawo—maayo man o daotan.
“Natawo ko nga may kasaypanan, ug makasasala sukad nga gipanamkon ko sa akong inahan.”—SALMO 51:5, Footnote.
Ang sala dunay pait nga resulta sa mga tawo.
Tungod niini, nadaot ang atong relasyon sa atong Maglalalang ug nabulag kita sa ubang kalalangan sa Diyos. Kini miresultag grabeng pag-antos sa matag indibiduwal ug sa tibuok katawhan.
“Dihang gusto nakong buhaton ang matarong, ang daotan ania kanako.”—ROMA 7:21.
“Ang tanang kalalangan duyog nga nag-agulo ug naa sa kasakit.”—ROMA 8:22.